1 “Xzar, Amsexxar inu Wenni ttɛawaneɣ, d Wenni farzeɣ, d Wenni dd-yusin x řxaḍar inu. Necc ssarseɣ xas Arruḥ inu. Netta ad issuffeɣ řeḥkam ɣar řegnus. ◘42:1 Ica. 11:2; Mt. 3:17; 17:5; Yḥ. 3:34; Afa. 1:6 2 War isɣuyyu u war issgiɛɛid tmijja nnes u war ittarri tmijja nnes ad as sřen di barra. 3 Aɣanim inḍefsen war t ittareẓẓi ca u taftič n tiffest ittduxxunen war t issexsiy ca, wah, s tidett ad issuffeɣ tasegda. 4 Netta war ittiḥeř u war ittwareẓẓi ař dd-issbedd tasegda x temmurt u ɣar Ccariɛa nnes ad rajant tigzirin.”

5 “Ammu i iqqar Arebbi, SIDI, wenni iggin u ibezzɛen ijenwan, wenni iggin tammurt d min xas iɣemmyen, wenni itticen twarrit n nnefs i řgens i dayes izeddɣen, u buḥbeř i yinni igguren x temmurt: 6 ‘Necc, SIDI, řaɣiɣ ac di tsegda uca ad Cek menɛeɣ zeg ufus, ad Cek ḥḍiɣ uca ad Cek arreɣ d Řɛahd i řgens d tfawt i řegnus, ◘42:6 Yḥ. 8:12 7 ḥima ad tarzmed tiṭṭawin idaɣařen, ad tessuffɣed imeḥbas zi řeḥbes u yinni iqqimen di taǧest zi taddart n tɛessast. 8 Necc d SIDI, wa d Isem inu, uca war tticeɣ ccan inu i wenneɣni u asemɣar inu war t tticeɣ i řexyařat ineqcen. ◘42:8 Ica. 48:11 9 Xzar, timesřayin timezwura iwḍent uca timesřayin n jdid ad tent barrḥeɣ. Qbeř mma ad ffɣent, ad awem tent ssecneɣ.’ ”

10 “Ɣennjem izři n jdid i SIDI, asemɣar nnes zeg ineggura n temmurt, kenniw inni ineddhen řebḥar, d marra min dayes: kennint a tigzirin d imezdaɣ nsent. ◘42:10 Izhd. 33:3 11 Ad issgeɛɛed řexřa tmijja nnes uca uřa d tneddam nnes, jmiɛ ak-d ředcur nni di izeddeɣ Qidar. Ejj inni izeddɣen di řejruf ad sřiwřewen, ejj i-ten ad sɣuyen s řefraḥet x tqiccitin n idurar, 12 ejj i-ten ad ssɛuǧen SIDI, ad barrḥen ccan nnes x marra tigzirin. 13 SIDI ad dd-iffeɣ am bu-teɣruḍṭ, ad issekkar meẓri deg umenɣi am weryaz imeḥḍen, Netta ad isřiwřew, ad isɣuy i umenɣi, ad iḥṣar qaɛ řɛedyan nnes.”

14 “Necc tuɣa sseɣdeɣ zeg wecḥař uya, tuɣa sqareɣ, ttebbateɣ ixef inu. Ad sɣuyeɣ am yicten ittarun, ad ten areddǧeɣ u ad ten ṣarḍeɣ jmiɛ. 15 Idurar d tewririn ad ten arreɣ d amessuci u ad jjeɣ aɣemmuy aziza nsen marra ad yaẓeɣ, iɣezran ad ten ggeɣ d tigzirin, uca ad ssiẓɣeɣ iyeřmamen. 16 Idarɣařen ad ten nedheɣ x ijj n webrid war t ssinen, ad ten jjeɣ ad uyuren x tbridin war tent argben. Ṭṭram zzat i tiṭṭawin nsen ad t ggeɣ d tfawt, min ifarɣen, ad t seggdeɣ. Tina d timesřayin i ɣa ggeɣ di ṭṭweɛ nsen u war daysen semḥeɣ. 17 Inni ittcařan x řexyařat ineqcen, inni iqqaren i řexyařat ifesyen: ‘Kenniw d irebbiten nneɣ!’, aqa nitni ad dewřen ɣar ḍeffar, ad seḍḥan aṭṭas.” ◘42:17 Izhd. 97:7; Ica. 1:29; 44:11; 45:16

18 “Sřem, kenniw iduhcar! Idarɣařen, xzarem u wařam. 19 Man wen iǧan d adarɣař am umsexxar inu, d adehcur am ureqqas inu? Man wen iǧan d adarɣař am umtiqqi u d adarɣař am umsexxar n SIDI? 20 Aṭṭas i tᵉttwařid, maca war tucid walu, iwa netta yarzem imezzuɣen, maca war ittesři ca. ◘42:20 Rum. 2:2-11 21 Tuɣa yarḍa SIDI di ṭṭweɛ n tsegda nnes maḥend ad issemɣar d issɛuǧa Ccariɛa. 22 Maca řexxu nitni d ijj n řgens acaren tt, keccḍen tt. Marra ttwacedden deg ifran, ttwaqqnen di řeḥbes. Nitni dewřen d taymart, am war din iǧi umsenjem, dewřen nitni i tkeccaḍt, maca uřa d ijj iqqar: ‘Arr i-t-i-dd!’ 23 Man wen zzaywem ad iwc amezzuɣ i man aya? Man wen i ɣa iḥekkaren, man wen i ɣa iseř di ṭṭweɛ n min ɣa yiřin awarni man aya? 24 Man wen issiwḍen Yaɛqub am teymart d Israil i ixewwanen? Ma war tt iggi SIDI, wenni di nexḍa? Maɣar nitni war xsen ad uyuren x ibriden nnes, war xsen ad sřen ɣar Ccariɛa nnes. 25 S uyenni izeǧeɛ xas asɛar n weɣḍab nnes uřa d lɛunf n garra. Iqewwar as s iceɛɛařen, maca netta war d as iḥekkar, iqqed as timessi, maca netta war tt ikessi ɣar wuř nnes.”