1 “Ad dd-teffeɣ Tseṭṭa zi jjdeɛ n Yassa u Taɣeddut zeg iẓewran nnes ad dd-tawi řɣiǧet. ◘11:1 Ica. 4:2; Řex. 13:22, 23 2 Ad xas yarsa Arruḥ n SIDI, Arruḥ n tiɣit d řeɛqeř, Arruḥ n ccwar d jjehd, Arruḥ n tussna d tiggʷudi zi SIDI. ◘11:2 Uf. 31:3; 35;13; 1 Kur. 12:8; Kul. 1:9 3 Arḍa nnes ad yiři di tiggʷudi n SIDI. War icarreɛ ɛlaḥsab min ttwařant tiṭṭawin nnes, war iḥekkem ɛlaḥsab min ttesřan imezzuɣen nnes. 4 Ad icarreɛ imuqřiřen s tsegda u ad iḥkem imwaḍɛen n temmurt s řḥeqq, maca tammurt ad tt iwwet s uzeǧaḍ n uqemmum nnes u s usuḍi n uqemmum nnes ad ineɣ aɛeffan. 5 Tasegda ad tiři d abyas n tejɛinnatin nnes u tidett d abyas x tmeṣṣaḍin nnes.

6 Ad izdeɣ wuccen ɣar izmar, aɣiras ad ijen ɣar iɣayḍ ameẓyan. Aɛejmi d wayrad ameẓyan d řmař iṣeḥḥen ad iřin munen uca aḥenjir ameẓyan ad ten indeh. ◼11:6 aɛejmi - niɣ ‘amwa’, ‘ayenduz’ niɣ ‘yuggu’.  ◘11:6 Ica. 65:25; Ḥuc. 2:20 7 Tafunast d ddub ad hdan jmiɛ, uca imeẓyanen nsen ad jnen ɣar wayawya uca ayrad ad yecc řum am ufunas. 8 Aḥḍiḍ ad yarr mezři zzat i wexbuc n třefsa u anibu i kksen zeg uṭṭuḍ, ad isswiẓẓeḍ afus nnes ɣar warzam n tfawt n weḥfur n ufiɣar.

9 War tteggen řɣar u war tteggen areddeǧ x wedrar inu iqeddsen marra, maɣar tammurt teccur s tussna n SIDI am mammec dřen waman tisi n řebḥar. 10 Deg wass nni ad ibedd Weẓwar n Yassa am tɛeǧant i weyduden. Ɣares ad sseqsan řegnus uca amcan n arraḥet nnes ad yiři icewwar.” ◘11:10 Rum. 15:12

11 “Deg wass nni ad issgeɛɛed Sidi inu afus nnes ict n twařa nneɣnit, ḥima ad isellek min iqqimen n řgens nnes zi Accur, Miṣra, Fatrus, Kuc, Ɛilam, Cinɛar d Ḥamat u zi tegzirin n řebḥar. ◼11:11 řebḥar - niɣ ‘il’. 12 Netta ad issbedd taɛeǧant i řegnus u ad ijarw ɛawed imenneɛraq n Israil, ḥima ad issmun inni ittwazeǧɛen zi Yahuda zi arebɛa n tɣemmura n temmurt.

13 Xenni ad iggʷej wasam n Ifrayim u inni iḥeṣṣaren Yahuda ad ttwaqeḍɛen. Ifrayim war ittisem ɛad zi Yahuda u Yahuda war iḥeṣṣar ɛad Ifrayim. 14 Ad ffɣen ɣar řɣarb axmi ṭṭawen x tɣarḍin n Ifilisṭiniyyen uca munen ad keccḍen ayt n ccarq. Ad sswiẓẓḍen ifassen nsen ɣar Idum d Mu’ab uca ayt n Ɛammun ad asen ṭṭaɛen. 15 Ad iḥarrem SIDI iřes n řebḥar n Miṣra uca Netta ad issgeɛɛed afus nnes x yeɣzar n Lfuraṭ s uḥaduq n Arruḥ nnes u ad t iwwet ař ɣa idweř sebɛa n tɣezratin, uca ad yarr aqa zemmaren ad kken x webrid s sandaliyat. ◘11:15 Asa. 16:12-14. 16 Ad din yiři webrid iseggmen i min iqqimen n řgens nnes nni i ɣa iceṭṭen zi Accur, am mammec tuɣa iǧa webrid i Israil umi dd-igeɛɛed zi Miṣra.” ◘11:16 Uf. 14:29