1 X tmesřayin n arruḥ, a aytma, xseɣ ad tessnem, 2 tuɣa kenniw d lkuffar u tᵉttwanedhem ɣar l’aṣnam ignawen břa ma tucim. 3 S uyenni ssaregbeɣ kenniw, aqa war din uřa d ijjen wenni i ɣa issiwřen s Arruḥ n AREBBI, ad yini: ‘Aqa ittwanɛeř Yasuɛ!’, u war din uřa d ijjen wenni i ɣa yinin: ‘Yasuɛ d SIDI!’, mɣir s Arruḥ Iqeddsen waha. ◘12:3 Mk. 9:39; Yḥ. 13:13; 1 Kur. 8:6.

4 Aqa din tiwhibin ifarzen, maca Arruḥ aqa-t d Ijj. ◘12:4 Rum. 12:6; 1 Bṭ. 4:10. 5 U aqa din řexdayem n tsexxart ifarzen, maca SIDI aqa-t d Ijj. 6 Uca aqa din řeɛjayeb ifarzen, maca AREBBI aqa-t d Ijj, d Wenni itteggen marra di marra bnadem. 7 Maca asargeb n Arruḥ ad immewc i kuř ijj ḥima ad t iɛawen.

8 Aqa s Arruḥ immewc i yijjen awař n tiɣit, i wenneɣni awař n tussna s Arruḥ d ijjen, ◘12:8 Uf. 31:3; 35;13; Ica. 11:2; Kul. 1:9 9 i wenneɣni l’iman s Arruḥ, i wenneɣni tawhibt i usgenfi s Arruḥ d ijjen, 10 i wenneɣni maḥend ad igg řeɛjayeb, i wenneɣni mahend ad inebb, i wenneɣni řfarz n arruḥat, i wenneɣni ɛřam kuř iřsawen uca i wenneɣni afessar n iřsawen. 11 Maca man aya marra ittegg i-t Arruḥ d Ijjen, wenni ibeṭṭan i kuř ijj anect mammec ixs Netta. ◘12:11 Rum. 12:3, 6; 1 Kur. 7:7; 2 Kur. 10:13; Afa. 4:7.

12 Minzi am arrimet aqa-tt d ict u ɣares aṭṭas n iɣezdisen, ɛad aqa aten marra d iɣezdisen n ict n arrimet. Waxxa nitni deg waṭṭas, aqa tteggen ict n arrimet waha, uca ammu i teǧa tmesřact uřa ak-d Lmasiḥ. ◘12:12 Rum. 12:4, 5; Afa. 4:16. 13 Minzi nettwasseɣḍeṣ marra s yijj n Arruḥ deg ict n Arrimet, niɣ Udayen niɣ Iramiyyen niɣ isemɣan niɣ iḥurriyyen, uca marra neccin nsu zeg ijj n Arruḥ. ◘12:13 Yḥ. 7:37-39; Gal. 3:28. 14 Uřa d arrimet war teǧi ca s ijj n uɣezdis waha, maca s waṭṭas n iɣezdisen. 15 Mařa aḍar ad ini: “Minzi war ǧiɣ d afus, war ǧiɣ zi arrimet!”, ma xenni war ittiři zi arrimet?” 16 Uca mařa amezzuɣ inna: “Minzi war ǧiɣ d tiṭṭ, war ǧiɣ zi arrimet!”, ma xenni war ittiři zi arrimet? 17 Mařa marra arrimet tuɣa-tt d tiṭṭ, manis d ikka useǧi? Mařa marra arrimet tuɣa-tt d aseǧi, manis d ikka ucemmi?

18 Maca řexxu AREBBI igga iɣezdisen di arrimet, kuř ijj zzaysen am mammec ixs Netta. 19 Minzi mařa marra tuɣa d ijj n uɣezdis, mani teǧa arrimet xenni? 20 Maca řexxu aqa din aṭṭas n iɣezdisen, maca d ict n arrimet waha. 21 Tiṭṭ war tzemmar ad tini i ufus: “War cek ḥwijeɣ ca!”, niɣ ɛawed azeǧif i iḍaren: “War kenniw ḥwijeɣ ca!” 22 Maca s řɛeks iɣezdisen n arrimet inni nḥesseb ḍeɛfen, aqa nitni ttwaḥdajen aṭṭas. 23 Iɣezdisen nni n arrimet i d aneɣ ittɣiřen d imuqřiřen, nᵉttegg asen ccan ktar, uca iɣezdisen inni ittawyen aseḍḥi, ad asen nessḥinneb s waṭṭas n řehzuṭ. 24 Minzi iɣezdisen nneɣ nni ɣar iǧa řehzuṭ, war ḥdajen man aya, maɣar AREBBI igga arrimet, uca i iɣezdisen i iǧan d qell, iwca asen ccan ktar, 25 ḥima war ittiři ubeṭṭu di arrimet, maca iɣezdisen ad wcen taynit ijjen i wenneɣni deg uqaren d ijjen. 26 Mařa ijj n uɣezdis tᵉttekk xas tamara, marra iɣezdisen ad ksin tamara akides, u mařa ijj n uɣezdis ifarḥ, ad farḥen marra iɣezdisen akides. 27 Kenniw d Arrimet n Lmasiḥ d iɣezdisen deg wemcan i d awem ittwaggen. ◘12:27 Rum. 12:5; Afa. 1:23; 4:12; 5:23; Kul. 1:24.

28 Zeɛma AREBBI aqa igga di tmesmunt d amezwaru rrusul, awarni asen inabiyyen, awarni asen imesɣaren, awarni asen inni itteggen řeɛjayeb, awarni asen tiwhibin n usgenfi, inni itticen afus, inni iḍebbaren uca uřa d ɛřam kuř iřsawen. ◘12:28 Afa. 4:11; 2:20. 29 Ma zeɛma marra nitni d rrusul? Ma marra d inabiyyen? Ma marra d imesɣaren? Ma marra nitni tteggen řeɛjayeb? 30 Ma marra ɣarsen tiwhibin n usgenfi? Ma ssawařen marra s iřsawen? Ma ttfessaren marra iřsawen? 31 Maca mařa tarzum xenni di tewhibin timeqqranin qaɛ, aqa necc ad awem ssecneɣ ijj n webrid yuɛřan.