1 Zi jjihet min d ayi turim, aqa mliḥ i bnadem war ittḥidi ca tamɣart. 2 Maca zi ssibbet n farq-ccɣeř, kuř aryaz ad yawi tamɣart nnes uca kuř ict n temɣart ad tᵉṭṭef aryaz nnes. 3 Ejj aryaz ad isscen i temɣart nnes tayri i d as dd-yusin, ammu ɛawed tamɣart i weryaz nnes. ◘7:3 1 Bṭ. 3:7. 4 Tamɣart war tᵉttḍebbari ca di arrimet nnes, maca aryaz nnes. Uca ammu ɛawed aryaz war ittḍebbari ca di arrimet nnes, maca tamɣart nnes. 5 War tt qeṭṭɛem ca x wayawya, mɣir mařa tekksem deg wawař ca n umur ḥima ad ceɣřem s uẓummi d tẓaǧit. Awarni man aya munem ɛawed maḥend ad tawyem ariqqi i řemrac, ḥima war kenniw ittjarrib cciṭan zi ssibbet n meẓri n arrimet. ◘7:5 Yuw. 2:16. 6 Qqareɣ man aya di ṭṭweɛ n yinni iḍeɛfen, war iǧi s řumur. 7 Xseɣ ɛad mliḥ mařa marra iwdan ad iřin am necc di tazdugi, maca kuř ijj ɣares tawhibt nnes i d as iwca AREBBI, ijjen ammu, wenneɣni ammu. ◘7:7 Mt. 19:12; Řex. 26:29; 1 Kur. 12:11.

8 Maca i yinni war ɣarsen bu temɣart u i tijjař qqareɣ, aqa mliḥ i nitni mařa qqimem am necc. 9 Maca mařa war zemmaren ad qqimen ṭṭfen di man aya, ejj i-ten ad meřcen, minzi iḥřa ad awyen tamɣart x wecmaḍ n nnecwet. ◘7:9 1 Tim. 5:14.

10 Maca i yinni yiwyen ict n temɣart, umureɣ, war iǧi d necc, maca Sidi inu, belli tamɣart war tbeṭṭi x weryaz. ◘7:10 Mal. 2:14; Mt. 5:32; 19:9; Mk. 10:11; Lk. 16:18. 11 Uca mařa tebḍa, ad teqqim břa aryaz, niɣ ad tᵉmmesseṣřeḥ ak-d weryaz nnes, uca aryaz war ittejji tamɣart nnes.

12 Xenni i inneɣni qqareɣ necc, war iǧi Sidi: Mařa ijj n tawmat ɣares tamɣart war ittimnen, uca nettat teqbeř ad tezdeɣ akides, war tt ineṭṭar ca. 13 Uca mařa ict n temɣart tenni ɣar iǧa weryaz war yuminen, u netta ixs ad kides izdeɣ, war tsemmeḥ ca nettat deg weryaz nnes. 14 S minzi aryaz war yuminen ittwaqeddes di temɣart tenni yumnen, uřa d tamɣart war yuminen tᵉttwaqeddes deg weryaz i yumnen, mařa mammec nneɣni ad iřin iḥenjiren nwem d imengas, maca řexxu aqa nitni d imezdagen.

15 Maca mařa wenni war ittimnen ad iǧef, ejj i-t ad iǧef. Xenni tawmat niɣ tawečmat war ttwaqqnen ca di řḥař nni. Aqa AREBBI iřaɣa aneɣ-dd ɣar řehna. 16 Minzi manis tessned cem, a tamɣart, ad tessnejmed aryaz nnem? Niɣ manis tessned cek, a aryaz, ad tessnejmed tamɣart nnec? ◘7:16 1 Bṭ. 3:1.

17 Maca kuř ijj am mammec d as iwca SIDI, am mammec i d iřaɣa AREBBI i kuř ijj, ejj i-t ad iddar ammu. Ammu i umureɣ i marra timesmunin. 18 Mařa ittwařaɣa i weryaz ittwaxetnen ɣar umuni ak-d Lmasiḥ, wanita war yarezzu ad dd-idweř ɣar břa axtan nnes, uca mařa ittwařaɣa i ḥed břa axtan, ejj i-t war yarezzu ad t xetnen. 19 Axtan d walu u břa axtan d walu, maca aḥeṭṭu n tweṣṣa n AREBBI, wah! 20 Ejj kuř ijjen ad iqqim di třaɣit i zi dd-ittwařaɣa. ◘7:20 Afa. 4:1; Fil. 1:27; Kul. 1:10; 1 Ts. 2:12. 21 Mařa tuɣa cek tᵉttwařaɣid-dd d ismeɣ war tessḥissifed ca i man aya, maca mařa tzemmared ad tᵉttwassarḥed, ixḍar xenni s yixef nnec, maḥend ad tsexxared. 22 Minzi wenni ittwařaɣan di Siditneɣ am tuɣa d ismeɣ, aqa-t d aḥurri n AREBBI, am mammec wenni ittwařaɣan d aḥurri, aqa-t d ismeɣ n Lmasiḥ. 23 Aqa temmesɣem-dd s ttaman, xenni war iɛeddeř ad tiřim ɛad d isemɣan n iwdan. ◘7:23 1 Kur. 6:20; Ɛbr. 9:12; 1 Bṭ. 1:18. 24 A aytma, ejj kuř ijjen ad isiɣi ak-d AREBBI deg webrid nni di dd-ittwařaɣa.

25 Deg wazzay n tuɛezriya, aqa war ɣari bu řumur n AREBBI, maca ad wceɣ array inu, am wi yiwḍen s arḍa n AREBBI ḥima ad yiři d amtiqqi. 26 Ittɣiř ayi mliḥ i řeɣben i iǧan di řweqt-a, belli aqa icna i bnadem ad iqqim am iǧa. 27 Ma třeṣqed di temɣart? War arezzu ca ad zzayes tennfekked. Mařa cek war třeṣqed di temɣart? War arezzu x temɣart. ◼7:27 Ma cek war třeṣqeḍ di temɣart? - awař-a ixs ad yini: ‘Ma cek břa tamɣart?’ 28 Maca mařa tiwyed tamɣart, war txeṭṭid. Uca mařa taɛzarect tedweř ɣar weryaz, nettat war txeṭṭi ca. Maca inni iqqnen i wayawaya s řemřac, tᵉttraja i-ten řmeḥnet di arrimet, uca xseɣ ad tt xawem kkseɣ.

29 D man aya i qqareɣ, a aytma, aqa řḥař imẓi. S uyenni inni ɣar iǧa temɣart, ejj i-ten ad iřin axmi war ɣarsen teǧi, 30 inni ittrun axmi war ttrun, inni ifarrḥen axmi war friḥen, inni issaɣen axmi war mellken, 31 u inni istenfaɛen zi ddunect-a, ittxeṣṣa war ttaggʷijen x ustenfeɛ i dd-ittřiqen, minzi udem n ddunect aya ad iɛdu. ◘7:31 Ica. 40:6; Yaɛ. 1:10; 4:14; 1 Bṭ. 1:24; 1 Yḥ. 2:17.

32 S uyenni xseɣ ad tiřim břa amnus, maɣar wenni war ɣares teǧi temɣart, ad ixarreṣ di min iǧan n Sides d mammec ɣa yarḍa Sides. ◘7:32 1 Tim. 5:5. 33 Maca wenni ɣar teǧa temɣart, ad iksi s wemnus i tmesřayin n ddunect-a u mammec ɣa yarḍa tamɣart nnes.

34 Aqa din ijj n řfarq jar temɣart d teɛzarect. Tenni war ɣar iǧi weryaz ɛemmarṣ, ad txarreṣ di Sides, ḥima ad tiři tqeddes am di arrimet am di arruḥ, maca tenni ɣar teǧa weryaz, ad txarreṣ di tmesřayin n ddunect, i mammec ɣa tarḍa aryaz nnes. 35 Degga qqareɣ awem-dd i tizi nwem, war iǧi ḥima ad awem ggeɣ řfex, maca nniɣ t ḥima ad teqqimen d imtiqqan i Siditwem x ubrid nican, am war tseřhim ak-d ddunect.

36 Maca mařa ixarreṣ ḥed belli aqa sthezzan zzayes zi ssibbet n yeǧis taɛzarect, tenni x ɛdun wussan n temẓi nnes am war tt issemřec ɛad i weryaz, uca ittɣiř as nican ad tt issemřec, netta war ixeṭṭi ca. Ejj i-tt ad tmeřc. 37 Maca wi iǧan nican deg wuř nnes, břa ma yuca s uziyyar, uca ɣares ṣṣulṭa x yixef nnes, ikkes deg wuř nnes ad yejj taɛzarect nnes teṣfa, mliḥ i yegga. 38 S uyenni, wenni issmeřcen yeǧis taɛzarect igga mliḥ, u wenni war issmeǧicen yeǧis taɛzarect, igga mliḥ aṭṭas.

39 Tamɣart teqqen ɣar weryaz nnes s Ccariɛa min ɣa yekk weryaz nnes iddar, maca mařa aryaz nnes immut, aqa-tt tsarreḥ zzayes, tzemmar ad temřec ak-d wi texs, maca di Siditneɣ waha. ◘7:39 Rum. 7:2. 40 Maca necc ɣari, aqa nettat ad tᵉttwabarek ktar mařa teqqim amenni. U aqa Necc ttwařiɣ Arruḥ n AREBBI ixeddem ɛawed dayi. ◘7:40 1 Ts. 4:8.