1 Maca ɣar umezwar tuɣa din řefruḍ i tsexxart u tuɣa din ict n Zzawect Iqeddsen di ddunect-a. 2 Minzi Tazeddiɣt tamezwarut i tᵉttwagg, tuɣa dayes řqendiř d tzewḍa d weɣrum n wescan uca qqaren as: ‘Aqeddas’. ◘9:2 Uf. 26:1; 36:1; Lawi 24:5. 3 Maca Tazeddiɣt n daxeř, awarni i uřeḥḥaf wiss tnayen, qqaren as ‘Aqdas x Uqeddas’. ◼9:3 ařeḥḥaf - niɣ: ‘arwaq’. 4 Aqa dayes řqecɛet n wureɣ i řebxur uřa d Ttabut n Řɛahd iɣeǧfen s wureɣ ɣar marra iɣezdisen. Tuɣa dayes ijj n uzenbiř n wureɣ dayes ‘manna’, u dayes uřa d taɣɣarct n Harun tenni ittwanuwwcen d teřwiḥin n weẓru n Řɛahd. ◘9:4 Uf. 25:10; 34:29; Řxř. 17:25; 1 Ij. 8:9; 2 Im. 5:10. 5 Sennej i man aya aqa din ‘ixiruben’ n řɛezz, inni iddřin taqebbart n weṣřaḥ i iǧan x Ttabut s tiři n wafriwen nsen. Maca war ɣarneɣ bu řweqt řexxu ḥima ad nessiweř x kuř icten zi tmesřayin-a i ittwasswejden ammu. ◘9:5 Uf. 25:22. 6 Maca ikehhanen tuɣa ttadfen řebda ɣar Tzeddiɣt nni ɣar barra, tenni d tamezwarut, ḥima ad dayes kemmřen tasexxart nsen. ◘9:6 Řxř. 28:3. 7 Maca arrays n ikehhanen tuɣa ittadef ict n twařa deg useggʷas ɣar Tzeddiɣt n daxeř ak-d idammen i iqeddem x yixef nnes uřa x uweddar n řgens. ◘9:7 Uf. 30:10; Lawi 16:2, 34; Ɛbr. 9:25. 8 S tebridt-a isscen Arruḥ Iqeddsen mliḥ belli abrid iqeddsen ɛad war dd-ittwammeḍhar, umi ɛad Tazeddiɣt tamezwarut tbedd. ◘9:8 Yḥ. 14:6. 9 Tanita tuɣa d amedya i řweqt nni di tuɣa ttqeddamen ṣṣdaqi d tɣarṣin nni war zemmarent ad awyent řekmaret ɣar tnefsect n wenni i-tent iqeddmen. 10 Aqa atent tuɣa tthimmant mɣir macca d tsessi d ibriden ifarzen n useɣḍas deg waman, aqa atent d řefruḍ i itthimman ddat waha, ttwamurent ař řweqt n weɛdař n tsegda. ◘9:10 Lawi 11:2; Řxř. 19:7-22.

11 Maca Lmasiḥ i dd-yusin, aqa idweř d Arrays n ikehhanen x řxar i igga. Netta yudef ɣar Tzeddiɣt Tameqqrant ikemmřen, tenni war ittwaggen ca s ifassen, war teǧi zi min dd-ittwaxeřqen. ◘9:11 Ɛbr. 3:1; 4:14; 6:20; 8:1. 12 War yudif ca ak-d idammen n iɣayḍen d iɛejmiyyen n ijj n useggʷas, maca aqa yudef ict n twařa ak-d Idammen n Yixef nnes ɣar Zzawect Iqeddsen u ammu i dd-yiwi asenjem ittduman. ◘9:12 Řex. 20:28; Afa. 1:7; Kul. 1:14; Ɛbr. 10:10; 1 Bṭ. 1:19; Asa. 1:5; 5:9

13 Minzi mařa idammen n iɣayḍen d ifunasen imeẓyanen d iɣɣeḍ n uɛejmi azeggʷaɣ i ittwaruccen x yinni ittwaxemjen, aqa qeddsen u ssizdigen ten zi jjihet n weysum nsen n arrimet, ◘9:13 Lawi 16:14-16; Řxř. 19:4; Ɛbr. 10:4. 14 mecḥař ɛad ad ssizedgen Idammen n Lmasiḥ tanefsect nneɣ zi řexdayem immuten, ḥima ad nexdem AREBBI iddaren, aqa Lmasiḥ wenni iwcin Ixef nnes i AREBBI s Arruḥ n řebda d taɣarṣt war dayes bu řɛib! ◘9:14 Lk. 1:74; Rum. 6:13; Gal. 1:4; 2:20; Afa. 5:2; Tit. 2:14; 1 Bṭ. 4:2; 1 Yḥ. 1:7; Asa. 1:5. 15 S uyenni aqa Netta d Lwasit n Řɛahd n Jdid, maɣar s řmewt nnes idweř Netta d asenjem i yinni ixeṭṭan ḍidd Řɛahd amezwar, ḥima nitni inni ittwařaɣan i řwart n řebda, ad ṭṭfen lwaɛd. ◘9:15 Irm. 31:31; Mt. 26:28, Mk. 14:24, Lk. 22:20, 1 Kur. 11:25, 2 Kur. 3:6, Ɛbr. 8:6, 8, 13; 9:15; 12:24; Rum. 5:6; 1 Bṭ. 3:18.

16 Minzi mani iǧa řɛahd, ittxeṣṣa ad tᵉttwassargeb řmewt n wenni iggin řɛahd. 17 Minzi řɛahd ad idweř iṣřeḥ waha xmi ɣa immet ḥed, war ittiři ca nican min ɣa yekk iddar wenni iggin řɛahd. ◘9:17 Gal. 3:15. 18 S uya uřa d Řɛahd amezwar war ittwaḍmen ca břa idammen. 19 Minzi awarni řami kuř tawṣiyyet nni iǧan di Ccariɛa aqa iweṣṣa i řgens s ufus n Musa, iksi netta idammen n ufunas ameẓyan ak-d waman uřa d taḍuft tazeggwaɣt d tɛelǧet, uca irucc i-ten x idlisen ittwannḍen u x marra řgens, ◘9:19 Uf. 24:6-8 20 inna asen:

“Ina d idammen n Řɛahd,

i d awem yumur AREBBI.” ◘9:20 Uf. 24:8; Mt. 26:28.

21 Tuɣa irucc ɛawed Tazeddiɣt Iqeddsen d marra řeqcuɛ n tsexxart s idammen. 22 Maɣar marra timesřayin nni iǧan di Ccariɛa ttwassizedgent s idammen uca břa asizzeř n idammen war din iǧi ca weɣfar.

23 Tuɣa qaɛ ittxeṣṣa ad ttwassizdegent tmesřayin-a s tɣarṣa i iǧan d řemtuř n timesřayin i iǧan deg ijenwan, maca timesřayin nni iǧan n ujenna simant nsen s tɣarṣin icnan zi tina. ◼9:23 tiɣarṣin - niɣ ‘ddbayeḥ’. 24 Minzi Lmasiḥ war yudif ca ɣar Zzawect Iqeddsen i ittwaggen s ifassen, d wenni netta d lmital n min iǧan d tidett, maca ɣar ujenna simant nnes, ḥima ad dd-iḍhar di ṭṭweɛ nneɣ qibač i AREBBI. 25 War iǧi ḥima ad iqeddem Ixef nnes aṭṭas n twařawin am mammec tuɣa ittadef arrays n ikehhanen kuř aseggʷas ɣar Zzawect Iqeddsen s idammen war iǧin nnes ◘9:25 Uf. 30:10; Lawi 16:2,34; Ɛbr. 9:7. 26 - minzi mařa ammu i iǧa, iři ittxeṣṣa ad iweddeb Yeccu aṭṭas n twařawin zi beddu n ddunect - maca řexxu, ɣar qeṭṭu n ddunect, iwca Netta Ixef nnes ict n twařa ḥima ad ibeṭṭeř ddnub s tɣarṣt nnes.

27 Am mammec d ittwassars i iwdan ad mmten ict n twařa, uca xenni awarni i řmewt nsen ad dd-yas řḥukm, 28 ammu ɛawed immewc Lmasiḥ ict n twařa d taɣarṣt, iwca deg Yixef nnes taɣarṣt n ddenb i waṭṭas, maca ɣar twasit nnes i twařa wiss tnayen ad ittwaẓar břa ddenb i Tudart n yinni t ittrajan. ◘9:28 Rum. 5:6, 8; 1 Bṭ. 3:18.