1 Issiweř SIDI ak-d Musa d Harun, inna asen:

2 “Siweř ak-d ayt n Israil uca inim: ‘Ina aqa aten d řmař, inni umi iɛeddeř ad teccem zi jar marra řmař nni din x temmurt. ◘11:2 Aɛwd. 14:4; Řex. 10:14 3 Iɛeddeř ad teccem zi marra řmař i ɣar teǧa tecḍect immsebḍan, aqa farqa n tecḍect imssebḍan qaɛ, u sennej i man aya ttarran ifeẓ.

4 Maca zeg inni ittarran ifeẓ d yinni ɣar teǧa tecḍect immsebḍan, war ttᵉttem ina: ařɣem, minzi itteffeẓ, maca war ɣares bu tecḍect immsebḍan, s uyenni aqa ixmej i kenniw, 5 akawka n teṣḍart, minzi ittarra ifeẓ, maca tacḍect war temmsebḍi, u s uyenni aqa ixmej i kenniw, ◘11:5 Aɛwd. 14:7 6 amenni ayarziz, minzi ittarra ifeẓ, maca war ɣares tacḍect immsebḍan, s uyenni aqa ixmej i kenniw, ◘11:6 Aɛwd. 14:7 7 ɛaweḍ iřef, minzi ɣares tacḍect immsebḍan uca aqa farqa n tecḍect immsebḍan qaɛ, maca war ittarri ifeẓ, s uyenni aqa ixmej i kenniw. 8 Zeg weysum nsen war zzayes ttᵉttem niɣ ad tḥadam řxecbat nsen, aqa xemjen i kenniw.’ ”

9 “Ina iɛeddeř ad ten teccem zi jar marra imuddaren nni iddaren deg waman: marra wi ɣar iǧa wafriwen d teqcurt deg waman u di řebḥur u di tɣezratin, ina iɛeddeř ad ten teccem, 10 maca marra wi war ɣar yeǧi ifriwen niɣ taqcurt di řebḥur u di tɣezratin, zi jar marra i zi sseffyen aman uřa zi jar marra min iddaren deg waman, ad awem yiři d nnɛi. 11 Wah ad awem yiři d nnɛi. War iɛeddeř ad teccem zeg weysum nsen u řxecbat nsen ad ɣarwem iřint d nnɛi. 12 Marra min iǧan deg waman břa ifriwen d teqcurt, ad ɣarwem yiři d nnɛi.”

13 “Zeg ijḍaḍ ad ɣarwem iřin ina d nnɛi, war zzaysen ttᵉttem ca, aqa aten d nnɛi: agider, isɣi, agider n řebḥar, ◘11:13 Aɛwd. 14:12 14 aceffar iṭṭawen s tazřa, amessɣuy amuqḍiɛ n tiṭṭawin ak-d marra markat nnes, ◘11:14 Aɛwd. 14:13 15 marra markat n ubaɣeř, ◘11:15 Aɛwd. 14:14 16 yeǧis n tɣuyyit, aɛennaf, ajḍiḍ n řebḥar, řbaz ak-d markat nnes, ◘11:16 Aɛwd. 14:15 17 aḥemmař n řkas, bu-tcararrut, bu-usuḍi n řmewt, 18 bu-yuntaḥ, bu-uɛuqqi, bu-uḥawar, ◘11:18 Aɛwd. 14:16, 17 19 abellarj, bu-usuḍi iɛeffnen ak-d marra markat nnes, dundun d řweḍwaḍ.” ◘11:19 Aɛwd. 14:18

20 “Marra wi ɣar iǧa afriwen i ittbuɛen u igguren x arebɛa n iḍaren, ad ɣarwem yiři d nnɛi. 21 Maca zi marra inni ittbuɛen am ɣarsen afriwen u gguren x arebɛa n iḍaren, iɛeddeř i kenniw ad teccem inni ɣar iǧa iḍaren i wengaz sennej i iḍaren nsen i tecři, ḥima ad zzaysen negzen x temmurt. 22 Ina tzemmarem ad zzaysen teccem: tamurɣi n weyřaf ak-d markat nnes, tamuɣri n teṣḍart ak-d markat nnes, tamuɣri ineggzen ak-d markat nnes d tamuɣri iřeḥḥfen ak-d markat nnes. 23 Marra wi ɣar iǧa afriwen i ittbuɛen u ɣares arebɛa n iḍaren, ad ɣarwem yiři d nnɛi.”

24 “S imuddaren-a i ɣa tᵉttwaxemjem. Marra wi ɣa iḥadan řxecbat nsen, ad yiři ixmej ař tameddit. 25 Manwen yiwyen ca zi řxecbat nsen, ad issird arruḍ nnes uca ad yiři ixmej ař tameddit. 26 Marra řebhayem, inni ɣar teǧa tecḍect immsebḍan i zi farqa n tecḍect war tfarq qaɛ, uřa war ttarran ifeẓ, ad ɣarwem iřin xemjen. Marra wi ten i ɣa iḥadan, ad yiři ixmej. 27 Kuř amuddar jar imuddaren i igguren x arebɛa n třeqqa n iḍaren nsen, ad ɣarwem yiři ixmej. Marra wi ɣa iḥadan řxecbat nsen, ad yiři ixmej ař tameddit. 28 Wi yiwyen ca n řxecbat nsen, ad issird arruḍ nnes uca ad yiři ixmej ař tmeddit. Ad awem iřin xemjen.”

29 “Zi jar imuddaren ittbuɛen, inni ittbuɛen x temmurt, d ina ad xawem iřin xemjen i kenniw: ajarbuɛ, aɣerda, icfar ak-d markat nnes, 30 iqqli, taknakart, azermummuy, aḥdiḍ d tata.◼11:30 taknakart - niɣ ‘tiqqlit’. 31 Ina ad ɣarwem iřin xemjen zi jar marra imuddaren nni ittbuɛen x temmurt. Marra wi ten i ɣa iḥadan awarni řmewt nsen, ad yiři ixmej ař tameddit. 32 Marra min xef iwḍa ca zi řxecbat nsen ad yiři ixmej, niɣ ict n řqecɛet n tefřawt, niɣ arruḍ, niɣ tiřmect, niɣ taxancet, niɣ min ma řqecɛet i xef iwḍa ca zzaysent, ittxeṣṣa ad ittwassars deg waman, ad yiři ixmej ař tameddit u awarni aya ad yiři izdig. ◘11:32 Lawi 15:12 33 Marra řqecɛet n třaxt, tenni umi di iwḍa cwayt zzayes, aqa marra min dayes iǧan ad yiři ixmej uca ittxeṣṣa i kenniw ad tarẓem ṭṭebṣi. 34 Marra macca nni ttnuman iwdan ad ccen, tenni x wḍan waman nni, ad tiři texmej, u marra tissit nni ttnuman iwdan ad swen, mammec ma tegga řqecɛet i di teǧa macca niɣ tissit, ad tiři texmej. 35 Marra min xef iwḍa ca n řxecbat nsen, ad yiři ixmej. Afarnu d tzewḍa ad ttwarẓen, aqa xemjen uca ad ɣarwem iřin xemjen. 36 Maca řɛunṣar niɣ d anu mani ɣar ssizzřen aman, ad yiři izdeg. Maca wi ɣa iḥadan řxecbat nsen, ad yiři ixmej.

37 Uca mařa iwḍa ca zi řxecbat nsen x ca n zzariɛet i uzarɛ, tenni ittxeṣṣa ɛad ad zarɛen, xenni ad tiři tizdeg. 38 Maca mařa seyyben aman x zzariɛet uca iwḍa xas ca zi řxecbat nsen, xenni ad ɣarwem tiři zzariɛet nni texmej.

39 Uca mařa immut ijj zi jar řmař nni teccim, xenni wi ɣa iḥaḍan řxecbet nnes, ad yiři ixmej ař tameddit. 40 Wenni iccen zi řxecbet nnes, ad issird arruḍ nnes uca ad yiři ixmej ař tameddit. Wenni yarbun ca zi řxecbet nnes, ad issird arruḍ nnes uca ad yiři ixmej ař tameddit.

41 Kuř amuddar ittbuɛen x temmurt, aqa-t d nnɛi. War iɛeddeř ad ittwacc. 42 Zi jar marra imuddaren ittbuɛen, inni ittbuɛen x wudem n temmurt, war ttᵉttem ca marra min igguren x uɛeddis niɣ marra min igguren x arebɛa n iḍaren ař marra min igguren x waṭṭas n iḍaren, minzi aqa aten d nnɛi. 43 War tteggem nnɛi i řeɛmur nwem s marra imuddaren ittbuɛen nni din ittbuɛen x wudem n temmurt, war zzayes ssxemmajem ixef nwem ařami ad zzaysen txemjem. 44 Minzi Necc d SIDI, AREBBI nwem. Kenniw ad tessqedsem ixef nwem uca ad tiřim d imqeddasen, minzi Necc aqa d amqeddas. War ssxemmajem řeɛmur nwem s marra immudaren ittbuɛen, inni ittbuɛen x wudem n temmurt. ◘11:44 Lawi 19:2; 20:7; 1 Bṭ. 1:16 45 Minzi Necc D SIDI, wenni kenniw dd-issgeɛɛden zi temmurt n Miṣra, ḥima ad iřiɣ d AREBBI nwem. Iřim d imqeddasen, maɣar aqa Necc d amqeddas.”

46 Wa d azerf x řmař, x ijḍaḍ u x marra imuddaren nni zzaysen issefyen waman uca x marra imuddaren nni ittbuɛen x temmurt, 47 ḥima ad ittwagg řfarq jar min ixemjen d min izdigen u jar imuddaren inni iɛeddřen i macca d imuddaren inni war iɛeddřen i macca.