1 Nadab d Abihu, arraw n Harun, ksin kuř ijj řmejmar nnes uca ggin dayes řebxur uca ammu i yiwyen nitni timessi teɣrib zzat i wudem n SIDI, min war d asen iweṣṣa Netta. 2 Teffeɣ-dd tmessi zi zzat i wudem n SIDI, tecc i-ten uca mmuten zzat i wudem n SIDI. ◘10:2 Řxř. 3:4; 26:61; 1 Im. 24:2 3 Inna Musa i Harun: “D man aya x min xef issiweř SIDI umi inna: ‘S yinni i ɣari dd ɣa iqarrben ad ttwaqeddseɣ uca zzat i wudem n marra řgens ad ttwassɛuǧeɣ.’ ” Uca isqar Harun. ◘10:3 Lawi 8:35 4 Iřaɣa Musa i Micayil d i Ilṣafan, arraw n Ɛuzziyil, ɛemmis n Harun, uca inna asen: “Qarrbem-dd, tarbum aytmatwem zi qibač n Zzawect Iqeddsen, awyi ten barra i řmargeḥ n řɛeskar.” 5 Qarrben-dd nitni uca arbun ten di tcamirat nsen barra i řmargeḥ n řɛeskar, am mammec t inna Musa. 6 Xenni inna Musa i Harun u i Aliɛazar d Itamar, arraw nnes: “War ḍeǧqem i ucuwwaf x izeǧifen nwem niɣ ttcarrgem arruḍ nwem i wecḍan, ḥima war tᵉttmettim uca ad yiři uduqqez n weɣḍab x marra tamesmunt. Maca aytmatwem, marra taddart n Israil, ad run x tmessi-ya, tenni issecmeḍ SIDI. 7 War dd-tteffɣem ca zi wadaf n Uqiḍun n Umsagar, ḥima war tᵉttmettim ca, minzi zzect n wedhan n SIDI aqa tt xawem.” Uca nitni ṭṭaɛen i wawař n Musa. ◘10:7 Lawi 21:12

8 Issiweř SIDI ak-d Harun, inna:

9 “War iɛeddeř ad tsessed binu niɣ ccrab ijehden xmi ɣa tadfem ɣar Uqiḍun n Umsagar, cek lla uřa d iḥenjiren nnec nni akidek lla, ḥima war tᵉttmettim ca. Aqa-tt d ict n tewṣeyyet i řebda i marra jjiřat nwem, 10 ḥima ad af tzemmarem ad tfarzem jar min iǧan iqeddsen d min war iǧin iqeddsen u jar min iṣfan d min war iṣfin, 11 u ḥima ad tessřemdem i ayt n Israil marra tiweṣṣa nni ɣarsen issiweř SIDI s tsexxart n Musa.”

12 Uca issiweř Musa ak-d Harun u ak-d Aliɛazar d Itamar, arraw nnes iqqimen: “Ksim tawhibt n řɣiǧet nni iceṭṭen zi tewhibin n tmessi i SIDI uca ccem tt břa antun zzat i uɛalṭar, minzi aqa-tt d tamqeddast qaɛ. 13 Ad tt teccem deg ijj n wemcam iqeddsen, minzi ta d taɣarṣt i cek u i iḥenjiren nnec zi tewhibin n tmessi n SIDI, minzi ammu i d ayi ittwaweṣṣa. ◘10:13 Lawi 2:3; 6:16 14 Deg ijj n wemcan iṣfa ad teccem ɛawed idmaren n wenhezzi d ucekrud n tewhibt i dd-ittwassgeɛɛden, cek d iḥenjiren nnec d tḥenjirin nnec akidek, minzi d man aya d tasɣart nnec d tasɣart n tarwa nnec zi tɣarṣa n řehna n ayt n Israil. 15 Ad awyen acekrud n tewhibt i dd-ittwassgeɛɛden uřa d idmaren n wenhezzi ak-d tewhibin n tmessi n tadunt, maḥend ad ten ssenhezzen zzat i wudem n SIDI am tewhibt n wenhezzi. Aqa d ict n tewṣeyyet i řebda i cek u i iḥenjiren nnec akidek, am mammec t iweṣṣa SIDI.”

16 Uca Musa yarzu s cḍaret x umyan n tɣarṣt n ddenb, maca xzar, icemḍ. Xenni iffugem x Aliɛazar d Itamar, arraw iqqimen n Harun, inna: 17 “Mayemmi war teccim taɣarṣt n ddenb deg wemcan iqeddsen? Minzi aqa-tt d tamqeddast qaɛ uca netta iwca awem tt-i-dd ḥima kenniw ad tarbum řmuɛṣiyyet n tmesmunt, maḥend ad xasen teggem aṣřaḥ zzat i wudem n SIDI. 18 Xzarem, ḥdam war ssidfen walu zeg idammen daxeř i Zzawect Iqeddsen. Tuɣa ittxeṣṣa kenniw ad tt teccem di Zzawect Iqeddsen am mammec d awem weṣṣiɣ necc.” ◘10:18 Lawi 4:5; 6:19; 16:27 19 Xenni issiweř Harun ak-d Musa: “Xzar, ass-a aqa qeddmen taɣarṣt n ddenb d tɣarṣt n wecmaḍ zzat i wudem n SIDI. Mařa necc, awarni řami xafi kkent tmesřayin-a, aqa cciɣ zi tɣarṣt n ddenb ass-a, ma xenni man aya icna di tiṭṭawin n SIDI?” 20 Umi isřa Musa aya, iban as-dd man aya d lemliḥ di tiṭṭawin nnes.