1 Deg wass wiss tmenya imsar, aqa Musa iřaɣa i Harun d warraw nnes d imɣaren n Israil 2 uca inna i Harun: “Ksi ɣarek ijj n uɛejmi, ameẓyan n ufunas, am tɣarṣt n ddenb, uřa d ijj n icarri am tɣarṣt n wecmaḍ, aqa ad iřin cnan qaɛ, uca ejj i-ten ad dd-qarrben ɣar wudem n SIDI. ◼9:2 aɛejmi - niɣ ‘ayenduz’ niɣ ‘yuggu’. Uřa di ayat 3 d 8.  ◘9:2 Uf. 29:1 3 Siweř ak-d ayt n Israil uca ini: “Ksim ijj n umyan zeg iɣayḍen am tɣarṣt n ddenb u ksi ijj n uɛejmi d ijj n yezmar, aqa ad iřin imuddaren cnan qaɛ n ijj n useggʷas, i tɣarṣt n wecmaḍ, 4 uca ksi ɛawed ijj n ufunas d ijj n ucarri am tɣarṣa n řehna, maḥend ad ten qeddmen d ddbiḥet i SIDI, uřa d ict n tewhibt n řɣiǧet ixeǧḍen s zzect, minzi ass-a ad awem dd-iban SIDI.”

5 Xenni awyen min xef iweṣṣa Musa ɣar zzat n Uqiḍun n Umsagar uca tamesmunt tqarreb-dd uca bedden nitni zzat i wudem n SIDI.

6 Uca Musa inna: “D man aya min xef iweṣṣa SIDI maḥend ad t teggem. Uca xenni ad awem dd-iban uɛuǧi n SIDI.”

7 Inna Musa i Harun: “Qarreb-dd ɣar uɛalṭar uca sewjed taɣarṣt nnec n ddenb d tɣarṣt nnec n wecmaḍ uca egg aṣřaḥ x yixef nnec u x řgens. Sewjed ɛawed tawhibt n řgens uca egg xasen aṣřaḥ am mammec t iweṣṣa SIDI.” ◘9:7 Lawi 16:6; Ɛbr. 7:27 8 Xenni iqarreb-dd Harun ɣar uɛalṭar uca iɣarṣ i uɛejmi n tɣarṣt n ddenb i iǧan i yixef nnes. 9 Arraw n Harun iwyen as-dd idammen uca netta issuf aḍaḍ nnes deg idammen uca igga i-ten x waccawen n uɛalṭar. Min iceṭṭen n idammen iseyyeb i-ten ɣar uḍar n uɛalṭar. 10 Issbexxar tadunt d tiẓẓař d min yuyřen ɣar tsa n tɣarṣt n ddenb x uɛalṭar am mammec yumur SIDI i Musa. ◼9:10 tiẓẓař - niɣ ‘tigeẓřin’. Uřa di ayet 19. 11 Issecmeḍ aysum d yiřem s tmessi barra i řmargeḥ n řɛeskar.

12 Iɣarṣ taɣarṣt n wecmaḍ uca arraw n Harun qeddmen as idammen uca netta izeǧeɛ i-ten x uɛalṭar ɣar marra iɣezdisen nnes. 13 Xenni qeddmen as taɣarṣt n wecmaḍ i ttwabḍan d iceǧiqen, uřa d azeǧif, uca netta issbexxar i-tt x uɛalṭar. 14 Issird adan d iḍaren uca issbexxar i-ten x tɣarṣt n wecmaḍ i iǧan x uɛalṭar.

15 Awarni as issqarreb-dd tawhibt n řgens. Netta iksi amyan n tɣarṣt n ddenb i řgens uca iɣarṣ as uca issewjed i-t d taɣarṣt n ddenb am mammec issewjed icarri amezwaru. ◘9:15 Lawi 4:13

16 Issqarreb-dd taɣarṣt n wecmaḍ uca issewjed i-tt ɛlaḥsab lfariḍa. 17 Iqeddem tawhibt n řɣiǧet uca iksi zzayes ijj n wuru iccur uca issbexxar aya x uɛalṭar, zzat i tɣarṣt n wecmaḍ n ṣṣbeḥ. ◘9:17 Uf. 29:38; Lawi 2:1

18 Iɣarṣ ɛawed i ufunas u i yicarri n tɣarṣt n řehna di ṭṭweɛ n řgens, uca arraw n Harun qeddmen as idammen uca izeǧeɛ i-ten x uɛalṭar ɣar marra iɣezdisen nnes. 19 X tadunt n ufunas u n icarri: anewwar s tadunt nnes d min idřin aḍan d tiẓẓař d min yuyřen ɣar tsa, 20 aqa ssarsen tadunt nni x idmaren uca netta issbexxar tadunt x uɛalṭar. 21 Maca idmaren d ucekrud afusi issenhezz i-ten Harun amecnaw ict n tewhibt n wenhezzi zzat i wudem n SIDI, am mammec t iweṣṣa Musa. ◘9:21 Lawi 7:32

22 Xenni issgeɛɛed Harun ifassen nnes ɣar řgens uca ibarek i-ten uca ihwa awarni řami iqeddem taɣarṣt n ddenb d tɣarṣt n wecmaḍ d tɣarṣt n řehna. 23 Uca yudef Musa ak-d Harun ɣar Uqiḍun n Umsagar uca nitni ffɣen zzayes ɛawed uca barken řgens uca iban uɛuǧi n SIDI i marra řgens 24 uca teffeɣ-dd tmessi zi zzat i wudem n SIDI, tecca taɣarṣt n wecmaḍ x uɛalṭar uřa d tadunt. Umi iẓra řgens man aya, sřiweřwen uca wḍan ɣar temmurt x uɣembub nsen. ◘9:24 1 Ij. 18:38; 2 Im. 7:1