1 Malkiṣadiq wanita tuɣa d ajeǧid n Salim, akehhan n AREBBI wenni d Amɛuǧi x kuřci, u netta iffeɣ-dd ḥima ad iřqa Ibrahim řami dd-idweř zi tareẓẓit n ijeǧiden, u netta ibarek Ibrahim. ◘7:1 Amz. 14:17-20. 2 Ibrahim iksi ijj n řeɛcur zi marra min ɣares i netta. Isem nnes ixs ad yini: ‘ajeǧid n tsegda’, u ɛawed: ‘ajeǧid n Salim’, min ixs ad yini ‘ajeǧid n řehna’. ◘7:2 Izhd. 85:11 3 Nḥřa ma ttwazemmen babas d yemmas deg idlisen n jjadira, u nḥřa beddu n wussan nnes niɣ aneggar n tudart nnes, maca deg warwas n Mmis n AREBBI, aqa teqqim tukehhant nnes i řebda.

4 Xzarem řexxu, mecḥař tuɣa imɣar wanita x arrays n řejdud nneɣ Ibrahim i t iwcin řeɛcur zi min iṣebḥen qaɛ! 5 Maɣar inni iksin tukehhant zeg ayt n Lawi, aqa ɣarsen tawṣeyyet ɛlaḥsab Ccariɛa ḥima ad ksin řeɛcur zi řgens, iɛna zeg aytmatsen, umi nitni ffɣen-dd ɛawed zi dwaxeř n Ibrahim. ◘7:5 Řxř. 18:21; Aɛwd. 18:1; Yac. 14:4; 2 Im. 31:5. 6 Maca Malkiṣadiq wanita, wenni war izemmen deg idlisen nsen n jjadira, iksi zi Ibrahim řeɛcur uca ibarek i wenni iṭṭfen lwaɛd. ◘7:6 Amz. 14:20. 7 Aqa břa awař, wenni iǧan qell, aqa ad ittwabarek zeg wenni iǧan ḥsen zzayes. 8 Aqa danita iwdan ifennan kessin řeɛcur, maca dinni ten iṭṭef netta, netta d wenni x cehhdent Tira Iqeddsen, aqa iddar. 9 Ammu nzemmar ad nini belli Lawi, wenni iksin řeɛcur, aqa iɛeccar ɛawed s ufus n Ibrahim, 10 minzi tuɣa-t ɛad di dwaxeř n babas ařami imsagar wanita ak-d Malkiṣadiq.

11 Mařa řekmařet tuɣa-tt s tukehhant n Lawi, minzi tanita tᵉttwaḍmen i řgens s Ccariɛa, mayemmi ɛad ittxeṣṣa ad dd-ikkar ukehhan nneɣni deg warwas n Malkiṣadiq? Mařa ammu i teǧa, zeɛma inna Netta belli ad yiři di ṣṣifet n Harun! ◘7:11 Izhd. 110:4; Gal. 2:21. 12 Maca am mammec tuɣa din ijj n ubeddeř n tukehhant, ammu tuɣa din ɛawed ijj n ubeddeř n Ccariɛa. 13 Minzi Wenni mixef ittwanna aya, aqa ittwaxřeq-dd zi teqbič nneɣnit, i zi uřa d ijj war isexxar ɛemmarṣ ɣar uɛalṭar. 14 Aqa bayen belli Siditneɣ iffeɣ-dd zi Yahuda, zi taqbič i war x issiweř Musa uřa s yijj n wawař x tukehhant. ◘7:14 Ica. 11:1; Mt. 1:3. 15 S man aya ɛawed tban qaɛ mliḥ, aqa Netta inna belli ad dd-ikkar ukehhan nneɣni deg warwas n Malkiṣadiq, 16 wenni war ittwaggen ɛlaḥsab Ccariɛa n tweṣṣa i itthiman arrimet, maca ɛlaḥsab jjehd n Tudart war ifennan. 17 Minzi Netta iched xas:

“Cek d Akehhan i řebda

deg warwas n Malkiṣadiq!” ◘7:17 Izhd. 110:4; Ɛbr. 5:6.

18 Minzi tawṣeyyet tenni tuɣa qbeř tᵉttwaxřef zi ssibbet n tuḍɛeft nnes d břa nnfaɛ nnes. 19 Minzi Ccariɛa war tᵉttiwi qaɛ akemmeř, maca deg wemcan nnes yusa-dd usitem d ameqqran i zi nzemmar ad nades AREBBI, ◘7:19 Yḥ. 1:17; Řex. 13:39; Rum. 3:21, 28; 8:3; Gal. 2:16. 20 u Netta iḍmen man aya s ict n tjaǧit. 21 Maɣar nitni dewřen d ikehhanen břa tajaǧit, maca Wanita s ict n tjaǧit umi Netta d as inna s uqemmum n Dawud:

“Aqa SIDI ijjuǧ,

war issxarriq ɛemmarṣ:

‘Cek d Akehhan i řebda

di ṣṣifet n Malkiṣadiq.’ ” ◘7:21 Izhd. 110:4.

22 Di marra man aya iǧa Řɛahd-a, i zi idweř Yasuɛ d aḍman, qaɛ ḥsen.

23 Tuɣa din di řweqt nni ɛawed aṭṭas n ikehhanen, minzi nitni mmuten, ttwamenɛen ad qqimen. 24 Maca x Wanita war xas tɛeddu Tukehhant nnes, minzi Netta ad iqqim ibedd i řebda. 25 S uyenni izemmar ad iwc Tudart ittduman i yinni zzayes i dd ɣa qarrben ɣar AREBBI, minzi Netta iddar i řebda uca iwehheb tiẓaǧitin di ṭṭweɛ nneɣ. ◘7:25 1 Tim. 2:5; 1 Yḥ. 2:1. 26 Minzi tuɣa ittřiq aneɣ ijj n Ukehhan am Wanita: amezdag, břa řɣecc d taxmuji, ittwafarzen zeg imednab, yuɛřan x ijenwan, 27 wenni war ɣar iǧi řxeṣṣ ass x wass am irruyas n ikehhanen, ḥima ad iqeddem amezwar tiɣarṣin x ddnub n yixef nnes, uca xenni ɛawed x ddnub n řgens, minzi aya igga i-t ict n twařa i řebda qaɛ, řami iwca Ixef nnes d taɣarṣt. ◘7:27 Lawi 9:7; 16:6; Ɛbr. 5:3. 28 Aqa Ccariɛa tessgeɛɛed iwdan iḍeɛfen d ikehhanen, maca awař n tjaǧit, wenni awarni Ccariɛa, issgeɛɛed Mmis wenni ittwakemmřen i řebda.