1 Minzi kuř arrays n ikehhanen ittwakkes-dd zeg iwdan, ittwassgeɛɛed di ṭṭweɛ n iwdan x min iǧan n AREBBI, maḥend ad iqeddem tiwhibin d tɣarṣin x ddnub. 2 Izemmar ad immars ixef nnes, ad iḥinn x iqubbaniyyen d imweddaren, minzi uřa d netta simant nnes yarḍ tuḍɛeft. 3 Maɣar s man aya d icten ittxeṣṣa as ad issgeɛɛed tiɣarṣin x ddnub n řgens uca ɛawed x ddnub n yixef nnes. ◘5:3 Lawi 9:7; 16:6; Ɛbr. 7:26. 4 Uřa d ijjen ad iksi i yixef nnes ccan-a, mɣir wenni ittwařaɣan zi AREBBI am mammec ittwařaɣa Harun. ◘5:4 Uf. 28:1; 1 Im. 23:13; 2 Im. 26:16. 5 Ammu ɛawed Lmasiḥ war issɛuǧi ca Ixef nnes umi idweř d Arrays n ikehhanen, maca issɛuǧa wenni dd ɣares issiwřen:

“Cek d Mmi,

Necc jjiɣ-dd Cek ass-a!” ◘5:5 Izhd. 2:7; Řex. 13:33; Ɛbr. 1:5.

6 Am mammec inna ɛawed di mani nneɣni:

“Cek d Akehhan i řebda,

deg warwas n Malkiṣadiq.” ◘5:6 Izhd. 110:4; Ɛbr. 7:17.

7 Řami tuɣa yarreḍ arrimet n weysum nnes, iqeddem tiẓaǧitin d tutra s iɣuyyan aṭṭas u s imeṭṭawen i Wenni tuɣa izemmaren ad t-i-dd-issnekkar zi řmewt i Tudart, uca Netta isřa as. ◘5:7 Mt. 26:39; 27:46, 50; Yḥ. 17:1. 8 Netta, waxxa tuɣa-t d Mmis, aqa iřmed ṭṭaɛet s tiggʷudi u zeg uweddeb i iksi. ◘5:8 Fil. 2:6. 9 Ammu i idweř Netta ikemmeř, idweř d ssibbet n Tudart ittduman i marra inni d as i ɣa iṭṭaɛen, 10 uca igga i-t AREBBI d Arrays n ikehhanen deg warwas n Malkiṣadiq. ◘5:10 Izhd. 110:4

11 Aqa ɣarneɣ aṭṭas min ɣa nini x Malkiṣadiq wanita, maca iwɛar ad t nfessar, minzi tdewřem tewɛarem ad tesřem. 12 Maɣar tuɣa ittxeṣṣa ad tiřim d imesɣaren zi jjihet n řmijař n řweqt i tḍeffarem tɣuri-ya. Maca řexxu ittxeṣṣa awem ɛad ad třemdem lḥuruf imezwura n beddu n wawařen n AREBBI, kenniw teḥdajem ɛad aɣi deg wemcan n macca ijehden. ◘5:12 1 Kur. 3:1, 2, 3. 13 Minzi kuř ijjen wenni icarcen deg uɣi, war iqedd x wawař n tsegda, minzi netta d aseymi ɛad. 14 Maca macca ijehden iffeɣ-dd i yinni imɣaren, inni aqa nnumen ad darrben tacit nsen ḥima ad farzen řxar x řɣar.