1 Mařa xenni ɣarwem ca n ufewwej di Lmasiḥ, awařen s tayri i wuř, niɣ tamunt n Arruḥ, niɣ řeḥnunect di daxeř d arreḥmet, 2 kemmřem řefraḥet inu umi ɣa imun array nwem, ad ɣarwem tiři tayri d icten, d řeɛmar d ijjen uřa d uxarraṣ d ijjen. ◘2:2 Rum. 12:16; 15:5; 1 Kur. 1:10; Fil. 3:16; 1 Bṭ. 3:8. 3 War tteggem ca uřa d ict n řḥajjet s umɛaned niɣ zi tuffet ixwan, maca ejj kuř ijj ad iweqqar wenneɣni ktar zeg ixef nnes s uwaḍeɛ. ◘2:3 Rum. 12:10; 1 Bṭ. 5:5. 4 War ixezzar uřa d ijj ɣar ixef nnes waha, maca ejj kuř ijj ad ixzar ɛawed ɣar wenni d as yudsen. ◘2:4 1 Kur. 10:24; 13:5. 5 Ejj ad daywem tiři nneyyet i tuɣa ɛawed di Yasuɛ Lmasiḥ, ◘2:5 Mt. 11:29; Yḥ. 13:15; 1 Bṭ. 2:21; 1 Yḥ. 2:6. 6 wenni, am iǧa deg warwas n AREBBI, war iḥsib ca d takeccaḍt umi imqudda ak-d AREBBI, ◘2:6 2 Kur. 4:4; Kul. 1:15; Ɛbr. 1:3. 7 maca issexwa Ixef nnes, iksi ṣṣifet n umsexxar. Netta idweř deg warwas n bnadem, uca ittwaf di furma n bnadem. ◘2:7 Izhd. 8:6; Mt. 20:28; Yḥ. 13:14. 8 Netta isswaḍeɛ Ixef nnes uca idweř iṭṭaɛ ař řmewt, wah, ař řmewt n ṣṣalib. ◘2:8 Ɛbr. 2:9, 14, 17; 4:15; 12:2. 9 S uya issuɛřa i-t AREBBI qaɛ sennej uca iwca as Isem sennej i kuř isem, ◘2:9 Řex. 2:33; Ɛbr. 1:4. 10 ḥima deg Yisem n Yasuɛ ad aḍaren marra ifadden nni iǧan deg ujenna u x temmurt u sadu temmurt, ◘2:10 Ica. 45:23; Rum. 14:11. 11 u ḥima ad iched kuř iřes belli Yasuɛ Lmasiḥ d SIDI i uɛuǧi n AREBBI, Babas. ◘2:11 Yḥ. 13:13; 1 Kur. 8:6; 12:3.

12 S uyenni, a imɛizzen inu, am mammec tuɣa tᵉṭṭaɛem řebda, war iǧi xmi akidwem ǧiɣ waha, řexxu ɛad ktar xmi xawem i ɣa aggʷjeɣ, xedmem s ufeyyeḍ i Tudart nwem s tiggʷudi d tarjijat, 13 minzi AREBBI d wenni daywem ixeddmen ař ɣa texsem u ad teggem min di tᵉmmeẓřem kenniw. ◘2:13 2 Kur. 3:5. 14 Ggem marra břa řeɛkaset u břa amcubbec, ◘2:14 Rum. 12:17; 1 Bṭ. 2:12; 4:9. 15 ḥima ad tiřim břa řɛib, am tarwa imezdagen n AREBBI inni izeddɣen di řwesṭ n jjiř iɛewwjen d ifarɣen, u ḥima ad tbanem jar asen am tfawin di ddunect, ◘2:15 Awřn. 4:18; Mt. 5:14. 16 maḥend ad tiřim di ṭṭweɛ nsen deg wemcan n Tudart, ḥima ad ɣari yiři usemɣar deg wass n Lmasiḥ, war uyureɣ baṭeř niɣ xedmeɣ s walu. ◘2:16 2 Kur. 1:14; 1 Ts. 2:19. 17 Maca mařa ttᵉttwarucceɣ am yict n tewhibt n useyyeb x tɣarṣt u x tsexxart di ṭṭweɛ n l’iman nwem, ad farḥeɣ ɛawed uca ad arecqeɣ akidwem marra. ◘2:17 2 Kur. 7:4. 18 Xenni uřa d kenniw, farḥem uca farḥem ɛawed akidi.

19 Maca necc ssitimeɣ di Siditneɣ Yasuɛ ad awem dd-ssekkeɣ Timutiyu deɣya, ḥima ad iřiɣ x řxaḍar inu xmi ɣa ssneɣ ameddur nwem. ◘2:19 Řex. 16:1; Rum. 16:21; 1 Ts. 3:2. 20 Minzi war ɣari danita uřa d ijjen am necc, wenni ikessin s wemnus x mammec iffeɣ umeddur nwem s cḍaret. 21 Minzi marra yarezzun di min nsen, war iǧi di min iǧan n Yasuɛ Lmasiḥ. ◘2:21 1 Kur. 10:24; 13:5. 22 Maca kenniw tessnem taqeǧebt nnes, belli tuɣa ixeddem akidi di tbarreḥt n Řexbar Aṣebḥan am yijj n mmis ɣar babas. 23 Necc ssitimeɣ ad ɣarwem t-i-dd-ssekkeɣ deɣya, xmi ɣa ẓareɣ mammec ɣa iffeɣ umeddur inu. 24 Maca ttiqqeɣ di Sidi inu, belli ɛawed necc ad ɣarwem dd-aseɣ deɣya.

25 Maca ittɣiř ayi belli tuɣa ittxeṣṣa ad dd-awem ssekkeɣ uma Ipafruditus, wenni d amɛawen inu d amsexxar akidi, maca netta ɛawed d rrasul nwem d amsexxar nwem di min ḥdajeɣ. ◼2:25 rrasul - niɣ ‘amazan’. 26 Minzi tuɣa iweḥḥec aṭṭas ad kenniw iẓar marra, uca tuɣa iksi s wemnus minzi kenniw tesřim belli tuɣa ihřec. 27 S tidett, tuɣa ihřec ař řmewt, maca AREBBI tuɣa yarḥem i-t, war iǧi netta waha, aḥeqqa uřa d necc, ḥima war ɣari ittiři ufeqquṣ x ufeqquṣ. 28 S uyenni ssekkeɣ t s tazřa aṭṭas, ḥima, xmi t ɣa tẓarem ɛawed, ad tfarḥem uca ad dayi yiři drus n wemnus. 29 S uyenni qebřem t di SIDI, s marra řefraḥet, weqqarem inni iǧan am wanita, ◘2:29 1 Kur. 9:14; Gal. 6:6; 1 Ts. 5:12; 1 Tim. 5:17; Ɛbr. 13:17. 30 minzi x ssibbet n řxedmet n Lmasiḥ, tuɣa iqarreb ɣar řmewt am isebbeř tudart n yixef nnes, maḥend ad ikemmeř min ineqṣen di tsexxart nwem i necc.