1 Awarni řami ikemmeř Yasuɛ řumur nnes i tenɛac n imeḥḍaren nnes, yuyur ssenni ḥima ad isseřmed u ad ibarreḥ di tneddam nsen. ◘11:1 [Lk. 7:18-35]

2 Řami tuɣa Yuḥanna ittesřa di řeḥbes x řexdayem n Lmasiḥ, issekk ca zeg imeḥḍaren nnes. ◘11:2 Lk. 7:18. 3 Inna as: “Ma d Cek d wenni dd ɣa yasen niɣ ittxeṣṣa ad nraja ijjen nneɣni?” 4 Yarra-dd Yasuɛ, inna asen: “Ruḥem, tɛawdem i Yuḥanna min tesřam d min teẓrim! 5 Aqa idarɣařen ttwařan, ineɛḍaben gguren d yinni di iǧa řbarṣ ttwassizdigen, idehcar dewřen ttesřan, imettinen ttwassnekkaren-dd u Řexbar Aṣebḥan ittwabarraḥ i imezřaḍ. ◘11:5 Ica. 29:18; 35:5; 61:1; Lk. 4:18. 6 Sseɛd n wenni war dayi ittendrifen.”

7 Řami uyuren ina, ibda Yasuɛ issawař ak-d řɣaci x Yuḥanna, inna: “Min ɣar dd-teffɣem ɣar řexřa maḥend ad t tẓarem? Ma ɣar ijj n uɣanim issenhezza t usemmiḍ? ◘11:7 Lk. 7:24. 8 Mařa lla, min ɣar dd-teffɣem ad t tẓarem? Ma ɣar ijj n bnadem s warruḍ yarḍeb? Xzar, inni yarrḍen arruḍ iɣřan yarḍeb, aqa aten di tudrin n ujeǧid. 9 Min ɣar dd-teffɣem xenni maḥend ad t tẓarem? Ijj n unabi? Wah, Necc ad awem iniɣ, aqa d ameqqran ɛad x unabi. 10 Maɣar aqa d wa d wenni i xef ittwari wawař-a: ‘Xẓar, ad dd-ssekkeɣ lmalak inu zzat i wudem nnec, wenni i ɣa isswejden abrid nnec zzatek.’ ◘11:10 Uf. 23:20; Mal. 3:1; Mk. 1:2; Lk. 7:27. 11 S tidett, Necc ad awem iniɣ, jar inni dd-ittwaxeřqen zi temɣarin, war dd-iffiɣ uřa d ijj d ameqqran x Yuḥanna Amseɣḍaṣ. Waxxa amenni ameẓyan di Tgeldit n ijenwan d ameqqran xas. 12 Zeg wussan n Yuḥanna Amseɣḍaṣ ař iḍa temmars Tgeldit n ijenwan i lɛunf, uca ayt n bu-řexcunet arezzun ttᵉṭṭfen tt. ◘11:12 Lk. 16:16. 13 Minzi marra inabiyyen d Ccariɛa tuɣa ttnabban ař dd-yas Yuḥanna. ◼11:13 Ccariɛa - aqa-t d xemsa n idlisen imezwura n Wedlis Iqeddsen di Řɛahd Aqdim nni yuran s ufus n Musa: Amezwaru, Uffuɣ, Ilawiyyen (niɣ ‘Ayt n Lawi’), Di Řexřa (niɣ ‘Lɛadad’) d Aɛawed n Ccariɛa (niɣ ‘Awařen n Musa’). Di tutlayt n Tɛibranit qqaren as ‘Ttawrat’, ixs ad yini ‘Aseřmed’ niɣ ‘Taɣuri’. 14 Mařa texsem, qebřem aqa wanita d Iliya wenni tuɣa igga ad dd-yas. ◘11:14 Mal. 3:23; Lk. 1:17. 15 Wenni ɣar iǧa imezzuɣen i useǧi ad iseř.”

16 “Wi ak-d i ɣa ssemquddeɣ jjiř-a? Aqa-t amecnaw iḥenjiren iqqimen di řeswaq ttřaɣan x imeddukkař nsen, ◘11:16 Lk. 7:31. 17 qqaren: ‘Aqa nɣennej i kenniw, kenniw war tecḍiḥem. Aqa newta awem agejdur, war tecḍinem.’

18 Maɣar yusa-dd Yuḥanna, war ittett, war isess, uca qqaren nitni: ‘Dayes ijj n cciṭan!’ ◘11:18 Mt. 3:4; Mk. 1:6. 19 Aqa Mmis n bnadem yusa-dd, ittᵉtt, isess, uca nitni qqaren: ‘Aqa din bnadem iřhef x macca d binu, Netta d ameddukkeř n ayt n ḍḍariba d imednab!’ Maca tiɣit tᵉttwasegged s řexdayem nnes.”

20 Řexdenni ibda ittwebbex tineddam i di igga aṭṭas n řeɛjayeb nnes, minzi nitenti war tubent ca. ◘11:20 [Lk. 10:13-15] 21 “Uct xam, a Xurazin, uct xam, a Bayt-Ṣayda! Mři tuɣa ttwaggent di Ṣur d Ṣaydun řeɛjayeb ijehden tinni ittwaggen daykent, iři aqa tubent aṭṭas zeg wami s txancet n wecḍan d yiɣɣeḍ x izeǧifen nsent. ◘11:21 2 Ṣm. 13:19; 2 Ij. 6:30; 19:1. 22 Maca Necc ad awem iniɣ: Ad yiři řḥař i tendint n Ṣur d Ṣaydun ihwen zi řḥař nwem deg wass n lḥisab. ◘11:22 Mt. 10:15. 23 I cem, a tandint n Kafarnaḥum, tenni ittwassgeɛɛden ař ajenna? Ɣar řaxart i ɣar dd ɣa tehwid. Minzi mařa ttwaggent di Sadum řeɛjayeb ijehden i dayem ittwaggen, iři aqa teqqim ař ass n yiḍa. 24 Maca Necc ad am iniɣ, ad yiři řḥař i temmurt n Sadum ihwen zi řḥař nnem deg wass n lḥisab.” ◘11:24 Mt. 10:15.

25 Di řweqt nni ibda Yasuɛ ad yini: “Ḥemdeɣ Cek a Baba, Sidi n ujenna d temmurt, minzi tessnuffared aya x imiɣisen d imusnawen, maca tessaregbed aya i iḥenjiren. ◘11:25 [Lk. 10:21-22] — Ayub 5:12; Ica. 29:14; 1 Kur. 1:19; 2:7, 8. 26 Wah, a Baba, minzi d wa d arḍa i Cek. 27 Marra min iǧan immewc ayi-dd zi Baba, uca uřa d ijj war issin Mmis mɣir Babas, uca uřa d ijj war issin Babas mɣir Mmis u wi umi ixs Mmis ad t issargeb.” ◘11:27 Mt. 28:18; Lk. 10:22; Yḥ. 1:18; 3:35; 6:46.

28 “Asem-dd ɣari marra kenniw, inni yuḥřen d yinni yarbun ddqeř, uca Necc ad awem wceɣ arraḥet, 29 ksim-dd azayřu inu xawem, řemdem zzayi, minzi Necc d amhin d amwaḍeɛ n wuř uca ad tafem arraḥet i řeɛmur nwem. ◘11:29 Izhd. 45:5; Irm. 6:16. 30 Minzi azayřu d řeḥmeř inu fsusen.” ◘11:30 1 Yḥ. 5:3.