1 “Siwḍem ixef nwem di řaman zi řwest n Urcalim, a ayt n Binyamin, uca suḍem deg uyicc n icarri di Taquɛa. Sgeɛɛdem acenyal s ddexxan zi Bayt-Ha-Karim, minzi issigʷad řɣar zi ccamal, lmuṣiba tameqqrant. ◘6:1 Irm. 1:13, 14 2 Tamɣart icewwaren d ittwassubuḍen, yeǧis n Ṣihyun, ad tt sshellkeɣ. 3 Imeksawen ad ɣares dd-asen ak-d tḥimriwin nsen, nitni ad as dd-qewwaren, ad wten iqiḍan nsen xas, kuř ijj ad yarwes di tesɣart nnes. ◼6:3 Imeksawen - niɣ: ‘iničan’. 4 Ad inin ‘Qeddsem amenɣi ḍidd nnes, kkarem, jjem aneɣ ad ɣares ngeɛɛed s uziř. Uct xaneɣ, maɣar ass ɛřayen iɛdu, minzi tiřiwin n tmeddit ttsarrḥent-i-dd. 5 Kkarem, jjem aneɣ ad ngeɛɛed s ǧiřet, ad nehdem řeqṣur nnes!’ 6 Maɣar ammu i iqqar SIDI n řeskarat: Qessem ticejjura, sbeddem acbar i řeḥṣaret ḍidd i Urcalim. Ta d tandint i ɣa tᵉttwaɛaqeb, aqa ddeǧ di řwest nnes marra. 7 Am wanu ittejja aman nnes ttbeqbuqen, ammu i tᵉttejja Urcalim ad ibeqbeq min war iḥřin. Řḥess n lɛunf d wareddeǧ ittwaseř dayem, řeḥřac d teyyita aqa-tent řebda zzat i tiṭṭawin inu. 8 Ejj i cem ad tᵉttwawebbxed, a Urcalim, ḥima řeɛmar inu war xam tᵉttemsebḍi, ḥima war cem ttarriɣ d tammurt ittwareddǧen d tammurt ixřan zeg imezdaɣ.”

9 “Ammu i iqqar SIDI n řɛeskarat: ‘Am tzayart ad řeqḍen min iqqimen n Israil s cḍaret. Arr afus nnec ɣar tseḍwin am wenni iřeqqḍen aḍiř.’◘6:9 Ica. 24:13 10 Wi ɣar i ɣa ssiwřeɣ niɣ umi ɣa ɛeřmeɣ necc, ḥima ad sřen? Xzar, amezzuɣ nsen war ittwaxten, ařami war zemmaren ad sřen i walu. Aqa da, awařen n SIDI ttafen ten d aḥecci, war ten ḥdijen.” ◘6:10 Irm. 7:26

11 “S uyenni ccureɣ s wesɛar n SIDI, aqa uḥřeɣ ad t menɛeɣ. ‘Zeǧeɛ asɛar nnec xenni x iḥenjiren deg webrid uřa x umuni n iḥudriyyen, maɣar ɛad aryaz d temɣart ad ten ḥebbsen, ammu uřa d amɣar d uwessar. 12 Tudrin nsen ad dewřent i inneɣni, jmiɛ ak-d iḥwicen, uřa d timɣarin, maɣar Necc ad swiẓẓḍeɣ s ufus inu ḍidd imezdaɣ n temmurt-a, ammu i iqqar SIDI. ◘6:12 Aɛwd. 28:30 13 Maɣar zeg umeẓyan ař ameqqran arezzun marra nitni tizi nsen, u zeg unabi ař akehhan marra tcemmet. ◘6:13 Ica. 56:11; Irm. 8:10 14 Tareẓẓit n řgens inu xsen ad tt ssgenfan s řehwen, qqaren: ‘Řehna, řehna!’, maca war din iǧi řehna. ◼6:14 qqaren: ‘Řehna, řehna!’, maca war din iǧi řehna. - man aya ixs ad yini ‘qqaren ‘Mliḥ, mliḥ!’, maca war din min iǧan d lemliḥ’.  ◘6:14 Irm. 8:11; Ḥiz. 13:10 15 Ma ad seḍḥan minzi tteggen jjɛifect? Nitni war ttseḍḥin ca, řeḥya war t ssinen. S uya nitni ad wḍan jar inni iweṭṭan. Ɣar řweqt nni ad zzaysen xeřfeɣ ad nnqarḍen!’, ammu i iqqar SIDI.”

16 “Ammu i iqqar SIDI: ‘Beddem ɣar ibriden, uca ḥdam, seqsam x ibriden n wecḥař uya, mani iǧa webrid nican uca uyurem xas, xenni ad tafem arraḥet i řeɛmar nwem!’ Nitni maca qqaren: ‘Neccin war xas neggur!’ ◘6:16 Mt. 11:29 17 Necc ggiɣ awem iɛessasen, nniɣ: ‘Sřem i usuḍi deg uyicc n icarri!’, maca nitni qqaren: ‘Neccin war ɣares nesḥessi ca!’ 18 S uya sřem, a kenniw řegnus, u cem, a tamesmunt!, ssen min ɣarsen i ɣa imsaren! 19 Seř, a tammurt, xzar, Necc ad ssiwḍeɣ řɣar d ameqqran x řgens-a, řɣiǧet n inwayen nsen tiɛeffanin, maɣar nitni war xezzaren ca ɣar wawařen inu u nḍaren Ccariɛa inu. 20 Mayemmi d ayi dd ɣa yawyen jjawi zi Caba d uɣanim uḥemmum ittfuḥen zi temmurt yiggʷejen? Tiɣarṣa n wecmaḍ nwem war d ayi dd-usint i řxaḍar u tiɣarṣa nwem war d ayi ɛjibent. ◘6:20 Ica. 1:11; 66:3; Ɛam. 5:21; Mixa 6:6-8 21 S uya ammu i iqqar SIDI: ‘Xzar, Necc ad ggeɣ tiɛenkrifin i řgens-a uca nitni ad daysent nnqarḍen jmiɛ ak-d ibabaten d iḥenjiren, ak-d wajjar d umɛacar nnes, ammu i ɣa hellken.’ ”

22 “Ammu i iqqar SIDI: ‘Xzar, ad dd-yas ijj n řgens zi ccamal, ijj n řgens ameqqran ad ittwařaɣa zeg ineggura n temmurt. ◘6:22 Irm. 50:41,42,43 23 Nitni ṭṭfen řqews d weḥric, aqa-t d ijj n řgens iwɛar, war arreḥmen. Ddriz nsen igga am zzhir n řebḥar uca nitni nyin x yeysan. Am weryaz n umenɣi ammu i issbedd netta ixef nnes ḍidd nnem, a yeǧis n Ṣihyun!”

24 “Neccin nesřa xas řexbar, arxun aneɣ ifassen nneɣ, iřqef aneɣ unedqef, řeḥriq am n temɣart ittarwen. ◘6:24 Irm. 4:31; 49:24; 50:43 25 War tteffɣem ɣar barra ɣar yeyyar, war ggurem deg webrid, maɣar aqa din ssif n řeɛdu, tiggʷudi aqa-tt mani ma! 26 A yeǧis n řgens inu, beyset ixef nnem s txancet n wecḍan, zuzzar xam iɣɣeḍ, ceḍnet am x uyenni n mmis nnem, sɣuyy s tɣuyyit tamerzagt, maɣar deɣya ad xaneɣ dd-yas umteḥḥay.” ◘6:26 Irm. 4:8

27 “Necc ggiɣ cek d ṣṣumɛet n tɛessast di řgens inu, d ict n lqelɛa, ḥima ad tessned abrid nsen, ad dayes tarzud.”

28 “Nitni marra d inni iḥeyyden x webrid zi markat iwɛaren qaɛ, gguren ttennḍen di temmurt ttceqqafen, nitni am nnḥas d wuzzař, marra idsen d ayt n bu-imurḍas. ◘6:28 Ḥiz. 22:18 29 Arrabuz icmeḍ, řexfif tecca t tmessi, maca di řbaṭeř issefsi ufessay ammu s wecḍar, iɛeffanen war zemmaren ad ttwafarzen. 30 Qqaren as: ‘Nnuqart immenḍaren!’, maɣar inḍar i-ten SIDI.” ◘6:30 Ica. 1:22