Luka
1
Tamezwarut
1 Umi aṭṭas idsen tuɣa nwan ad arin imezruyen x tmesřayin i zi nettwasseqneɛ 2 - am mammec tent i d aneɣ xebbaren nitni, inni iẓrin Awař zeg umezwaru u tuɣa aten d imsexxaren nnes - 3 iban ayi-dd uřa i necc, minzi ḍfareɣ marra timesřayin mliḥ zeg umezwaru, ḥima ad ac dd-ariɣ kuřci s usettef, a Tiyufilis iɛizzen, 4 ḥima ad tessned mliḥ tidett n wawařen nni zi tᵉttwassřemded.
Zakariyya d Iliṣabit
5 Tuɣa din deg wussan n Hirudus, ajeǧid n Yahudiyya, ijj n ukehhan, qqaren as Zakariyya. Netta zi terbiɛt n ikehhanen n taddart n Abiya uca tamɣart nnes tuɣa-tt zi tarrawt n Harun, qqaren as Iliṣabit. ◘1:5 1 Im. 24:10. 6 Tuɣa s tnayen idsen d imseggaden ɣar AREBBI, ḍfaren marra tiweṣṣa u uyuren di řatarat n tsegda n SIDI břa řɛib. 7 War tuɣi ɣarsen bu uḥenjir minzi Iliṣabit tuɣa war dd-tᵉttiruw ca u tuɣa s tnayen idsen mɣaren deg wussan.
8 Aqa imsar, řami tuɣa Zakariyya ittegg řxedmet n ukehhan qibač i AREBBI x nnubet n terbiɛt nnes n ikehhanen, ◘1:8 1 Im. 24 9 aqa yusa-dd dayes ukeccuḍ ɛlaḥsab lqaɛida n tukehhant, ḥima ad iqeddem tawhibt n řebxur, uca yudef netta ɣar Zzawect Tameqqrant n SIDI. ◘1:9 Uf. 30:7; Lawi 16:17. 10 Tuɣa qaɛ abarru n řgens ittẓaǧa barra di tsaɛɛet n tewhibt n řebxur. 11 Řexdenni iḍḥar as-dd lmalak n SIDI i Zakariyya nni tuɣa ibedden x ufusi n uɛalṭar n řebxur. 12 Umi t iẓra Zakariyya, innexřeɛ uca iggʷed. 13 Inna as lmalak: “War tteggʷed ca, a Zakariyya, minzi tᵉttwaqbeř tẓaǧit nnec. Aqa Iliṣabit, tameṭṭut nnec, ad ac dd-taruw aḥenjir, ad t tsemmid Yuḥanna. ◘1:13 Lk. 1:60. 14 Ad tfarḥed u ad tesřiwřewed uca aṭṭas n iwdan ad farḥen i wexřaq nnes, ◘1:14 Lk. 1:58. 15 minzi ad yiři d ameqqran ɣar SIDI, war isess binu uřa d ccrab. Ad ittwaccur s Arruḥ Iqeddsen deg uɛeddis n yemmas, ◘1:15 Řqḍ. 13:4. 16 uca ad dd-yarr aṭṭas n iḥenjiren n Israil ɣar SIDI, AREBBI nsen. ◘1:16 Mal. 3:24; Mt. 11:14. 17 Netta ad yuyur zzates s arruḥ d jjehd n unabi Iliya, ḥima ad dd-yarr uřawen n ibabaten ɣar tarrawt nsen u inni war yuminen ɣar tussna n Umsegged, ḥima ad issewjed ijj n řgens ikmeř i SIDI.” ◘1:17 Mal. 3:23-24; Mt. 3:2; Mk. 9:12. 18 Yarra-dd Zakariyya x lmalak: “Mammec i ɣa ggeɣ ad fehmeɣ aya, minzi necc d awessar uřa d tamɣart inu temɣar aṭṭas!” ◘1:18 Amz. 17:17. 19 Yarra-dd lmalak, inna as: “Necc d Jibril, wenni ibedden zzat i AREBBI, ttwassekkeɣ-dd ḥima ad kik ssiwřeɣ, ad cek xebbareɣ řexbar-a wanita aṣebḥan. 20 Zi řexxu ad tegnud u war tzemmared ad tessiwřed ař ass min di i ɣa imsar uya, minzi war tumined ca s wawařen inu nni i ɣa ittwakemmřen di řweqt nsen.” 21 Tuɣa řgens di barra ittraja Zakariyya uca iwdan ttbehten umi iɛeṭṭař daxeř di Zzawect Tameqqrant. 22 Umi dd-iffeɣ Zakariyya, tuɣa war izemmar ad kisen issiweř. Xenni fehmen belli iban as-dd ca n řewḥiy di Zzawect Tameqqrant. Tuɣa ittceyyar asen, maca iqqim ignu. 23 Umi kemmřen wussan n řxedmet n tukehhant nnes, iɛqeb-dd ɣar taddart nnes.
24 Awarni ussan nni teksi tamɣart nnes Iliṣabit s ddeyset. Teffar ixef nnes xemsa n iyuren, uca tebda teqqar: 25 “Ammu i zzayi igga SIDI deg wussan nni umi ɣari dd-ixzar, ḥima ad xafi ikkes aseḥqar n iwdan.” ◘1:25 Amz. 30:23; Ica. 4:1.
Aḍhar n lmalak i Maryam
26 Deg uyur wiss setta issekk-dd AREBBI lmalak Jibril ɣar ict n tendint di Ljalil, qqaren as Nnaṣira, 27 ɣar ict n teɛzarect d tanexḍabt ɣar weryaz zi taddart n ujeǧid Dawud, qqaren as Yusuf. Tuɣa isem n teɛzarect nni Maryam. ◘1:27 Mt. 1:18. 28 Yudef-dd ɣares lmalak, inna as: “Sřam xam, a tamimunt! Siditneɣ akidem! Cem aqa tᵉttwabarked jar temɣarin!” 29 Umi t teẓra, tennexřeɛ zeg wawař nnes uca txarreṣ min ixs ad yini sřam-a. 30 Inna as lmalak: “War tteggʷed ca, a Maryam, minzi tufid arḍa ɣar AREBBI. 31 Ad teksid ddeyset uca ad tarwed Aḥenjir, ad t tsemmid ‘Yeccu’. ◘1:31 Ica. 7:14. 32 Wanita ad yiři d ameqqran, ad xas ttřaɣan Mmis n Umɛuǧi x kuřci, u ad as iwc SIDI AREBBI řɛarc n jeddis Dawud. ◘1:32 2 Ṣm. 7:12; Izhd. 132:11; Ica. 9:6; 54:5. 33 Netta ad iḥkem x taddart n Yaɛqub i řebda, war ittiři uneggar i Tgeldit nnes.” ◘1:33 1 Im. 22:10; Izhd. 45:7; 89:37; Irm. 23:5; Dan. 7:14, 27; Mixa 4:7; Ɛbr. 1:8. 34 Tenna Maryam i lmalak: “Mammec i ɣa yiři uya am war mřiceɣ ca ak-d weryaz?” 35 Yarra-dd lmalak, inna as: “Arruḥ Iqeddsen ad dd-yas uca jjehd n Umɛuǧi x kuřci ad xam yarsa. S uyenni ad yiři wenni i dd ɣa ixeřqen zzayem d amqeddas u ad t semman Mmis n AREBBI. 36 Xzar, Iliṣabit, řaǧ nnem, nettat ɛawed aqa-tt s ddeyset di tewsar nnes. Aqa d ayur wiss setta i nettat umi qqaren ‘war tᵉttiruw!’ 37 Minzi war din min yewɛaren i AREBBI.” ◘1:37 Ayub 42:2; Irm. 32:17; Zak. 8:6; Mt. 19:26; Lk. 18:27. 38 Tenna Maryam: “Xzar, necc d tayya n SIDI, ad ayi imsar ɛlaḥsab awař nnec.” Xas uca yuyur xas lmalak.
Maryam truḥ ad tarzef Iliṣabit
39 Deg wussan nni tekkar Maryam, truḥ deɣya ɣar idurar, ɣar ict n tendint n Yahudiyya. 40 Tudef ɣar taddart n Zakariyya, tseǧem x Iliṣabit. 41 Umi tesřa Iliṣabit i sřam n Maryam, imsar aqa inhezz useymi deg uɛeddis nnes, uca tedweř Iliṣabit teccur s Arruḥ Iqeddsen. 42 Nettat tesɣuy s jjehd, tenna i Maryam: “Cem aqa tᵉttwabarked jar temɣarin, tᵉttwabarek řɣiǧet n uɛeddis nnem! 43 Zi manis ɣari aya, ḥima ad ɣari dd-tas yemmas n Sidi inu? 44 Maɣar řami dd-tiweḍ tmijja n sřam nnem ɣar umezzuɣ inu, inhezz useymi deg uɛeddis inu s řefraḥet tameqqrant. 45 Sseɛd n tenni yumnen aqa ad ittwakemmeř min d as ittwanna zi SIDI.” ◘1:45 Lk. 11:28.
46 Tenna Maryam:
“Řeɛmar inu issemɣara di SIDI,
47 ifarḥ buḥbeř inu s AREBBI,
wenni d ayi itticen Tudart,
48 s minzi ixzar
ɣar umeddur awaḍeɛ n tayya nnes.
Xzar, zi řexxu marra arrawen
ad ayi semman ‘D tamimunt!’
49 Minzi wenni d Amzemmar igga dayi
timesřayin mɣarent,
aqa Isem nnes iqeddes.
50 Arreḥmet nnes x tarwa d jjiřat,
x yinni t ittweqqaren. ◘1:50 Uf. 20:6.
51 S uɣiř nnes aqa yiwi-dd řeɣřeb.
Ifartek inni iɛeffaren
deg ixarriṣen n wuřawen nsen. ◘1:51 Izhd. 33:10; Ica. 51:9; 52:10; 1 Bṭ. 5:5.
52 Inni ɣar teǧa ṣṣulṭa iɣḍeř i-ten
zi řekrasi nsen,
imwaḍɛen issgeɛɛed i-ten. ◘1:52 1 Ṣm. 2:8; Izhd. 113:6.
53 Issjiwen s řxar inni iǧuẓen,
isqad aytbab n wagřa s ifassen xwan. ◘1:53 Izhd. 34:11.
54 Amsexxar nnes Israil, iɛawen i-t,
aqa iɛqeř x arreḥmet nnes, ◘1:54 Ica. 30:18; 41:9; 54:5; Irm. 31:2, 20.
55 am mammec issiweř ak-d řejdud nneɣ,
ak-d Ibrahim d zzariɛet nnes,
i řebda.” ◘1:55 Amz. 17:19; 22:18; Izhd. 132:11.
56 Tekka Maryam ɛřaḥař třata n iyuren ɣar Iliṣabit, xenni teɛqeb ɣar taddart nnes.
Axřaq n Yuḥanna Amseɣḍaṣ
57 Řami dd-tiweḍ řweqt n Iliṣabit, ḥima ad dd-taruw, tejj-dd aḥenjir. 58 Sřin jjiran d řaǧ nnes belli AREBBI isscen as arreḥmet nnes aṭṭas, farḥen nitni akides. ◘1:58 Lk. 1:14.
59 Deg wass wiss tmenya usin-dd, ḥima ad xetnen i uḥenjir uca semman t s yisem n babas Zakariyya. ◘1:59 Amz. 17:12; Lawi 12:3. 60 Maca tᵉṭṭef yemmas deg wawař, tenna: “Lla. war ittwasemma ammu, maca ad ittwasemma Yuḥanna.” ◘1:60 Lk. 1:13. 61 Nnan as: “War iǧi ḥed zi řaǧ nnem ttřaɣan as-dd s yisem-a.” 62 Xenni ciyyaren ɣar babas, mammec ixs ad t isemma. 63 Ittar tařwiḥt uca yura xas, inna: “Isem nnes Yuḥanna.” Uca tbehten iwdan marra. 64 Řexdenni yarzem aqemmum nnes uca ittwaḍřeq yiřes nnes uca issiweř ɛawed, ibarek AREBBI.
65 Tehwa-dd tiggʷudi x marra jjiran nsen, ssiwřen aṭṭas x marra man aya di kuř idurar n Yahudiyya. 66 Marra inni isřin i man aya, xemmřen t deg wuřawen nsen, nnan: “Aqa min ɣa yiři uḥenjir-a?” Tuɣa afus n SIDI akides.
67 Ittwaccur Babas Zakariyya s Arruḥ Iqeddsen, inebba, inna:
68 “Ad ittwabarek SIDI, AREBBI n Israil,
minzi ifekkar di řgens nnes
uca yiwi asen-dd asenjem.
69 Issgeɛɛed aneɣ-dd ijj n yicc n usenjem
di taddart n Dawud, amsexxar nnes, ◘1:69 Izhd. 132:17.
70 - am mammec tuɣa d aneɣ inna
s uqemmum n inabiyyen iqeddsen nnes,
inni din tuɣa zeg wecḥař uya - ◘1:70 Izhd. 72:12; Ica. 40:10; Irm. 23:6; 30:10; Dan. 9:27.
71 ḥima ad aneɣ ifekk zi řɛedyan nneɣ,
zeg ifassen n yinni i d aneɣ icarrhen.
72 Netta igga arreḥmet nnes i řejdud nneɣ,
aqa iɛqeř x řɛuhud nnes iqeddsen,
73 x tajaǧit tenni ijjuǧ i Ibrahim, jedditneɣ,
ḥima ad d aneɣ iwc, ◘1:73 Amz. 22:16; Izhd. 105:9; Irm. 31:33; Ɛbr. 6:13, 17.
74 maḥend ad nettwafekk
zeg ifassen n řɛedyan nneɣ,
ad as nsexxar břa tiggʷudi, ◘1:74 Ɛbr. 9:14
75 s tqeddast d tsegda,
marra ussan n tudart nneɣ. ◘1:75 1 Bṭ. 1:15.
76 I cek, a aḥenjir, ad ac ttřaɣan
anabi n Umɛuǧi x kuřci,
minzi ad traḥed zzat i uɣembub n SIDI,
ḥima ad tesswejded abrid nnes, ◘1:76 Lk. 1:17; Mal. 3:23.
77 ḥima ad iwc i řgens nnes tussna n Tudart,
i iǧan s weɣfar n ddnub nsen, ◘1:77 Lk. 3:3.
78 s řaǧaɣ n arreḥmet n AREBBI nneɣ,
i zi xaneɣ i ɣa iḥinn řefjar zi řuɛřa,
79 ḥima ad issirɣ tfawt i yinni iqqimen
di taǧest d tiři n řmewt,
ḥima ad igewwed iḍaren nneɣ
deg webrid n řehna.” ◘1:79 Ica. 9:1; 42:7; 43:8; 49:9; 60:1.
80 Am iggam uḥenjir, yarenni dayes Arruḥ u tuɣa-t di řexřa ař ass i di dd-iḍhar i Israil. ◘1:80 Lk. 2:40.
◘1:5 1:5 1 Im. 24:10.
◘1:8 1:8 1 Im. 24
◘1:9 1:9 Uf. 30:7; Lawi 16:17.
◘1:16 1:16 Mal. 3:24; Mt. 11:14.
◘1:17 1:17 Mal. 3:23-24; Mt. 3:2; Mk. 9:12.
◘1:18 1:18 Amz. 17:17.
◘1:25 1:25 Amz. 30:23; Ica. 4:1.
◘1:32 1:32 2 Ṣm. 7:12; Izhd. 132:11; Ica. 9:6; 54:5.
◘1:33 1:33 1 Im. 22:10; Izhd. 45:7; 89:37; Irm. 23:5; Dan. 7:14, 27; Mixa 4:7; Ɛbr. 1:8.
◘1:37 1:37 Ayub 42:2; Irm. 32:17; Zak. 8:6; Mt. 19:26; Lk. 18:27.
◘1:51 1:51 Izhd. 33:10; Ica. 51:9; 52:10; 1 Bṭ. 5:5.
◘1:52 1:52 1 Ṣm. 2:8; Izhd. 113:6.
◘1:53 1:53 Izhd. 34:11.
◘1:54 1:54 Ica. 30:18; 41:9; 54:5; Irm. 31:2, 20.
◘1:55 1:55 Amz. 17:19; 22:18; Izhd. 132:11.
◘1:59 1:59 Amz. 17:12; Lawi 12:3.
◘1:69 1:69 Izhd. 132:17.
◘1:70 1:70 Izhd. 72:12; Ica. 40:10; Irm. 23:6; 30:10; Dan. 9:27.
◘1:73 1:73 Amz. 22:16; Izhd. 105:9; Irm. 31:33; Ɛbr. 6:13, 17.
◘1:75 1:75 1 Bṭ. 1:15.
◘1:76 1:76 Lk. 1:17; Mal. 3:23.
◘1:79 1:79 Ica. 9:1; 42:7; 43:8; 49:9; 60:1.