1 Xenni teẓẓuǧ Ḥanna, tenna:

“Uř inu ittesřiwřiw

s řefraḥet di SIDI.

Icc inu ittwassgeɛɛed di SIDI.

Aqemmum inu yarzem d arzam

x řɛedyan inu,

maɣar farḥeɣ x usenjem nnec.◘2:1 Lk. 1:46.

2 Uřa d ijj d amqeddes am SIDI,

maɣar war din iǧi ḥed mɣir Cek,

u war din teǧi teṣḍart

am AREBBI nneɣ! ◘2:2 Aɛwd. 3:24; Izhd. 86:8.

3 War tarennim tessawařem

ammu s nnfaxet,

war dd-tteffiɣ uřa d ca n tuffet

zeg uqemmum nwem,

maɣar SIDI d ijj n Arebbi

issen marra,

timegga nnes ttwaweznent.

4 Řqews n ayt n bu-teɣruḍt ittwarẓa,

maca inni inqarḍen

ḥezzmen s jjhed.

5 Inni ijjiwnen arehnen ixef nsen

i weɣrum,

maca inni iǧuẓen,

war qqimen ɛad ǧuzen.

Tenni war ittirwen

turuw-dd sebɛa n iḥenjiren,

tenni ɣar iǧa ubarru n iḥenjiren, tisřaw. ◘2:5 Izhd. 34:11; Igjd. 5:6; Lk. 1:53.

6 AREBBI ineqq u ittic tudart,

Netta isshekkʷwa ɣar řaxart

u issgeɛɛad-dd ssenni.◘2:6 Aɛwd. 32:39; Ḥiz. 37:11-14

7 SIDI ittarra ijj d amezřuḍ

u ijj nneɣni yarra i-t d bu-wagřa,

isshekkwa d issgeɛɛad.

8 Amuqřiř issekkar i-t zi tɛejjajt,

řmeskin ijebd i-t-i-dd zeg wefraḍ,

maḥend ad ten issɣim

ɣar tarwa n taṣiřet,

maḥend ad iwc

ijj n řkursi n řɛezz d řwart,

minzi dsusa n temmurt iǧan n SIDI

u Netta issbedd xasen ddunect.◘2:8 Ayub 36:15; Izhd. 113:7, 8; Lk. 1:52; Izhd. 24:2; 102:26; 104:5.

9 Netta i issřeqqan

x iṣuraf n imtiqqan nnes,

maca iɛeffanen

ad ttwassbekmen di taǧest,

minzi aryaz war ittiři ca d bu teɣruḍt

zi jjehd n yixef nnes.

10 Wenni ittemcubbucen ak-d SIDI,

ad ittwarẓ.

Ad xasen isshemhem deg ujenna.

SIDI ad iḥkem tineggura n ddunect,

ad iwc tizemmar i ujeǧid

uca ad issgeɛɛed icc n lmasiḥ nnes.”◘2:10 1 Ṣm. 7:10; Izhd. 2:6; 89:25.

11 Iɛqeb Ilqana ɛawed ɣar taddart nnes ɣar Rama, maca aḥenjir isexxar i SIDI zzat i wudem n ukehhan Ɛali. 12 Maca tarwa n Ɛali tuɣa d tarwa i war isekkwin. Nitni war ssinen ca SIDI. 13 Ikehhanen nnumen ad ggen ak-d řgens ammu: mařa yiwi ijj n weryaz ict n tɣarṣt, xenni, umi tuɣa aysum ɛad ittnenna, yusa-dd ijj n umsexxar n ikehhanen ak-d ict n furcita n třata n icukḍan deg ufus nnes, 14 ijju tt di řburmet niɣ deg uṭenjir niɣ di marmita niɣ di teydurt u marra min ɣa teksi furcita, iksi t ukehhan i yixef nnes. Ammu i t ggin ɣar marra ayt n Israil inni dd-yusin ɣar Cilu. 15 Ammu ɛawed, qbeř ɣa bexxaren tadunt, yusa-dd ijj n umsexxar n ikehhanen, inna i weryaz nni dd-iwyen taɣarṣt: “Ewc ayi aysum ḥima ad t qřiɣ i ukehhan, minzi netta war xak iksi ca aysum ittwanennan, maca mɣir aziza.” ◼2:15 aziza - niɣ ‘war ittwanennin’. 16 Mařa yarra-dd xas weryaz: “Amezwar ittxeṣṣa ad bexxaren tadunt marra, xenni ksi min ixs wuř nnec i yixef nnec!”, inna as umsexxar n ukehhan: “Lla, ittxeṣṣa ad t tewced řexxu, mařa lla, ad t ksiɣ s uɣiř!” 17 Ddenb n imsexxaren tuɣa imɣar aṭṭas zzat i wudem n SIDI, maɣar iryazen sseḥqaren tawhibt n řɣiǧet n SIDI.

18 Maca Camwil tuɣa ittsexxar zzat i wudem n SIDI, aqa-t d ijj n uḥenjir iḥezzmen s yijj n upalṭu n ukehhan n řeqṭen. 19 Yemmas tegga as ijj n useřham uca tᵉttawyi as t-i-dd zeg useggʷas ɣar useggʷas, xmi tᵉttgeɛɛed ak-d weryaz nnes ḥima ad tawi din taɣarṣt n kuř aseggʷas. 20 Igga Ɛali lbaraka di Ilqana d temɣart nnes, inna: “Iři ad ac iwc SIDI zi temɣart-a ijj n uḥenjir deg wemcan n uḥenjir i tsellem nettat, deg wemcan n uḥenjir i immewcen i SIDI.” Xenni ɛeqben nitni ɣar wemcan n tzeddiɣt nnes. ◼2:20 ijj n uḥenjir - s Tɛibranit ‘ict n zzariɛet’. deg wemcan n uḥenjir - s Tɛibranit ‘deg wemcan n tutra’. 21 SIDI maca ixzar ɣar Ḥanna u nettat teksi s ddeyset uca turuw-dd třata n iḥenjiren d tnayen n tḥenjirin, am tuɣa imeqqar Camwil ameẓyan ɣar SIDI.

22 Idweř Ɛali iwsar aṭṭas. Netta isřa x marra min ggin iḥenjiren nnes i marra Israil uca isřa ɛawed aqa nitni ṭṭṣen ak-d temɣarin i tuɣa ttsexxarent ɣar wadaf n Uqiḍun n Umsagar. ◘2:22 Uf. 38:8 23 Netta inna asen: “Mayemmi tᵉtteggem aya ammu, ařami i ttesřiɣ zi marra řgens-a x tmegga nwem tiɛeffanin? 24 Lla, a iḥenjiren inu, aya war iǧi d ijj n řexbar iḥřa i sřiɣ. Kenniw tᵉttarram řgens-a n SIDI ad iwḍa di xeṭṭu. 25 Mařa ijj n bnadem ixḍa ak-d ijj bnadem nneɣni, xenni ad xas iḥkem AREBBI, maca mařa ijj n bnadem ad ixḍa x SIDI, wi xas ɣa iwten?” Waxxa amenni nitni war sřin ca ɣar babatsen, maɣar SIDI tuɣa ixs ad ten ineɣ. ◼2:25 ɣar babatsen - s Tɛibranit ‘ɣar tmijja n babatsen’. 26 Maca Camwil ameẓyan tuɣa imeqqar uca yarni ittas-dd x řxaḍar i SIDI uřa ɣar iwdan. ◘2:26 Lk. 2:52.

27 Uca yusa-dd ijj n weryaz n SIDI ɣar Ɛali, inna as: “Ammu i iqqar SIDI: ‘Ma war i d ssecneɣ ixef inu nican i taddart n babac umi ten tuɣa di Miṣra, di taddart n firɛun? ◘2:27 Řex. 7:25. 28 Necc farzeɣ t zi marra tiqebbař n Israil d akehhan i Necc maḥend ad igeɛɛed ɣar uɛalṭar inu ḥima ad din issarɣ řebxur u maḥend ad yarḍ apalṭu n ukehhan zzat i wudem inu. Necc wciɣ ɛawed i taddart n babac marra tiɣarṣa n tmessi n ayt n Israil. ◘2:28 Lawi 10:14. 29 Mayemmi tɛeffsem kenniw x tɣarṣt inu d tewhibt n řɣiǧet i zi umureɣ maḥend ad tent twehhbem di Tzeddiɣt inu, u mayemmi tᵉttweqqarem iḥenjiren nwem aṭṭas xafi umi tmesřem kenniw ixef nwem s mummu n marra tiwhibin n řɣiǧet n řgens inu Israil?’ ◘2:29 Aɛwd. 32:15. 30 S uya iqqar SIDI, AREBBI n Israil: ‘Necc nniɣ nican: Taddart nnec d taddart n babac ad uyurent zzat i wudem inu i řebda!’, maca řexxu iqqar SIDI: ‘Aya aqa iggʷej xafi, maɣar inni d ayi ittweqqaren, ad ten weqqareɣ, maca inni i d ayi isseḥqaran, ad ttwaḥesben d imuqřiřen. ◘2:30 Uf. 28:43; 29:9. 31 Xzar ad asen wussan, ad qeḍɛeɣ aɣiř nnec d uɣiř n taddart n babac ařami war ittiři ɛad d awessar di taddart nnec. 32 Cek ad texzared belli ad dd-yas ijj n weɣrim n Tzeddiɣt, waxxa Netta ittegg tcuni-ya marra i Israil, uca ɛemmarṣ ad yiři ɛad ijj n uwessar di taddart nnec, marra ussan. 33 War qeṭṭɛeɣ ca kuř aryaz i ɣ̮arek iǧan x uɛalṭar inu, ařami ɣa uḥřent tiṭṭawin nnec qaɛ, ad tefna řeɛmar nnec uca marra arraw n taddart nnec ad mmten d iryazen. 34 D ta i d ak ɣa tiři d řeɛřamet nni dd ɣa tas x tnayen n iḥenjiren nnec, Ḥufni d Finaḥas: ad mmten s tnayen deg ijj n wass. ◘2:34 1. Sm. 4:11 35 Necc maca ad ggeɣ i Ixef inu ijj n ukehhan d amtiqqi. Netta ad igg ɛlaḥsab uř d řeɛmar inu. Necc ad as ssbeddeɣ ict n taddart temten uca netta ad yuyur řebda zzat i wudem n lmasiḥ inu. 36 Uca ad imsar, belli marra wi ɣa iqqimen zi taddart nnec, ad dd-yas ad as ibendeq i yict n tuqiyyat n nnuqart niɣ i yict n tecnift n weɣrum, ad yini: ‘Arni ayi mɣir ɣar ict n řxedmet n tsexxart n ikehhanen, maḥend ad ɣari yiři ijj n uřeqqim n weɣrum i macca.’ ”