1 “D man aya i d asen ɣa tegged, ḥima ad ten tessqeddsed, maḥend ad ayi iřin d ikehhanen. Ksi ijj n ufunas - ameẓyan n ufunas - d tnayen n wacraren icnan qaɛ, ◘29:1 Lawi 8:2; 9:2 2 u ɛawed aɣrum břa antun d řemsemnat břa antun ixeǧḍen s zzect d teřfaf břa antun ttwadehnent s zzect, tinni i ɣa tegged marra s waren azdad n yirden. 3 Ad tent tegged deg ict n tsuǧet uca ad tent tawyed di tsuǧet jmiɛ ak-d ufunas ameẓyan d tnayen n icarriyyen. 4 Ad dd-tessqarrbed Harun d warraw nnes ɣar wadaf n Uqiḍun n Umsagar uca ad ten tessirded s waman. 5 Ad teksid arruḍ, ad tyarḍed Harun tcamir d useřḥam i upalṭu d upalṭu simant nnes d tejmect uca ad as tbeysed s tḥezzamt izewwqen n upalṭu. 6 Ad tessarsed areẓẓet x uzeǧif nnes u x areẓẓet ad tegged ttaj iqeddsen n weɛzař. 7 Ad teksid zzect i wedhan uca ad tt tzeǧɛed x uzeǧif nnes uca ad t tdehned. ◘29:7 Uf. 30:25 8 Xenni ad tawyed iḥenjiren nnes, ad asen tyarḍed tcamirat. 9 Ad asen tbeysed s tḥezzamt, i Harun d warraw nnes, uca ad asen tarekkbed ticuccay. Ad ɣarsen tiři tukehhant ɛlaḥsab ict n tewṣeyyet i řebda. Ad tařeqqmed Harun d warraw nnes. ◼29:9 tukehhant - awař-a ixs ad yini ‘řxedmet n ukehhan’. Ad tařeqqmed Harun d tarwa nnes. - s Tɛibranit ‘Ad teccured ifassen n Harun d tarwa nnes.’

10 Xenni ad tawyed afunas ameẓyan zzat i Uqiḍun n Umsagar u Harun d warraw nnes ad ssarsen ifassen nsen x uzeǧif n ufunas ameẓyan. ◘29:10 Lawi 1:3 11 Ad tɣarṣed i ufunas ameẓyan zzat i wudem n SIDI, ɣar wadaf n Uqiḍun n Umsagar. 12 Xenni ad teksid idammen n ufunas ameẓyan uca ad ten tegged s uḍaḍ nnec x waccawen n uɛalṭar uca ad tzeǧɛed marra idammen iqqimen ɣar iḍaren n uɛalṭar. ◼29:12 accawen - niɣ ‘iqiccawen’. 13 Ad teksid ɛawed marra tadunt nni idřin adan d min yuyřen ɣar tsa, d tnayen n tiẓẓař ak-d tadunt i xasent iǧan uca ad tessbexxared aya x uɛalṭar. ◼29:13 tiẓẓař - niɣ ‘tigeẓřin’. Uřa di ayet 22. 14 Maca aysum n ufunas ameẓyan d yiřem nnes d umessař nnes ad ten tesscemḍed s tmessi barra i řmargeḥ n řɛeskar, aqa d taɣarṣt n ddenb. ◘29:14 Lawi 4:12; Ɛbr. 13:11

15 Xenni ad teksid ijj n ucarri uca Harun d warraw nnes ad ssarsen ifassen nsen x uzeǧif n icarri. 16 Ad tɣarṣed i icarri uca ad teksid idammen nnes, ad ten tzeǧɛed x uɛalṭar zi marra iɣezdisen nnes. ◘29:16 Ɛbr. 9:12, 19 17 Ad tebḍid icarri d iceǧiqen, ad tessirded adan nnes d icekrad nnes uca ad ten tegged x iceǧiqen nnes u x uzeǧif nnes. 18 Ad tessiɣed i icarri am ikmeř x uɛalṭar, aqa d taɣarṣt n wecmaḍ i SIDI, ict n řefwaḥet ittfuḥen, aqa d ict n tewhibt n tmessi i SIDI. 19 Xenni ad teksid icarri nneɣni uca Harun d warraw nnes ad ssarsen ifassen nsen x uzeǧif n icarri.

20 Ad tɣarṣed i icarri uca ad teksid zeg idammen nnes uca ad tegged man aya x iɣes n umezzuɣ afusi n Harun u x iɣes n umezzuɣ afusi n warraw nnes u ɛawed x uḍaḍ n yimez n ufus nsen afusi u x uḍaḍ n yimez n uḍar nsen afusi uca ad tzeǧɛed iḍammen iqqimen x uɛalṭar zi kuř jjihet. 21 Xenni ad teksid zeg idammen nni iǧan x uɛalṭar u zi zzect i wedhan uca ad zzaysen trucced Harun d warruḍ nnes uca ad trucced ɛawed arraw nnes d arruḍ n warraw nnes akides, ḥima ad yiři ittwaqeddes, netta d arruḍ nnes, uřa d tarwa nnes d arruḍ n tarwa nnes akides. 22 Ad teksid tadunt n icarri řa d tadunt ɣar unewwar řa tadunt nni idřin adan, uřa min yuyřen ɣar tsa d tnayen n tiẓẓař s tadunt i xasent iǧan d acekrud afusi, minzi wa d icarri i udeccen n ikehhanen. 23 Ksi ɛawed ict n tecnift n weɣrum d ict n temsemment n weɣrum ittwasswejden s zzect d ict n teřfeft zi tsuǧet n weɣrum břa antun i iǧan zzat i wudem n SIDI. 24 Sars man aya marra x ifassen n Harun u x ifassen n warraw nnes uca ad ten tessenhezzed zi ssa ɣar da am ict n tewhibt n wenhezzi zzat i wudem n SIDI. 25 Awarni as ad tt teksid zeg ifassen nsen uca ad tt tessbexxared x uɛalṭar, x tɣarṣt n wecmaḍ, ad tiři d ict n řefwaḥet ittfuḥen zzat i wudem n SIDI. Aqa-tt d ict n tewhibt n tmessi i SIDI. 26 Ad teksid idmaren n icarri i udeccen n Harun uca ad ten tᵉssenhezzed zi ssa ɣar da am ict n tewhibt n wenhezzi zzat i wudem n SIDI. Tanita ad tiři d tasɣart nnec. 27 Ad tessqeddsed idmaren n tewhibt n wenhezzi i ittwanhezzen zi ssa ɣar da, uřa d ucekrud i ittwanhezzen zi ssa ɣar da d wenni ittwassgeɛɛden. Aqa-ten zeg icarri n udeccen, am zeg wenni i yeǧan i Harun am zeg wenni i yeǧan i warraw nnes. 28 Aya ad yiři i Harun d warraw nnes d ict n tewṣeyyet i řebda zi jjihet n ayt n Israil, minzi d tawhibt n usgeɛɛed i teǧa. Ad tiři d ict n tewhibt i ɣa ssgeɛɛden ayt n Israil zi tɣarṣa nsen n řehna. Aqa d tawhibt nsen n usgeɛɛed i SIDI. ◘29:28 Lawi 7:31,34; 10:14

29 Arruḍ iqeddsen n Harun ad yiři i warraw nnes awarni as, maḥend ad ten dehnen u ad ten ařeqmen dayes. 30 Man wen zeg iḥenjiren nnes i ɣa yiřin d akehhan deg wemcan nnes uca ad yadef ɣar Uqiḍun n Umsagar, maḥend ad isexxar di Zzawect Iqeddsen, ad t yarḍ sebɛa n wussan.

31 Ad teksid icarri i udeccen uca ad tᵉssengwed aysum nnes deg ijj n wemcan iqeddsen. 32 Harun d warraw nnes ad ccen aysum n icarri d weɣrum i iǧan di tsuǧet ɣar wadaf n Uqiḍun n Umsagar. ◘29:32 Lawi 8:31; 24:9 33 Ad ccen zi min zi ittwagg wesřaḥ, ḥima ad ten řeqqmen u ad ten ssqeddsen. Maca ijj n ubarrani war zzayes ittett, minzi aqa d ict n řḥajjet d tamqeddest. ◘29:33 Lawi 10:14; Mt. 12:4 34 Mařa iceṭṭ ca zeg weysum n tɣarṣa i udeccen niɣ zeg weɣrum ař ṣṣbeḥ, ad tesscemḍed min iceṭṭen di tmessi. Ittxeṣṣa war t ittett ḥed, minzi d ict n řḥajjet iqeddsen i yeǧa.

35 Ammu i ɣa tegged ak-d Harun u ak-d warraw nnes, ad tegged ɛlaḥsab marra min d ac weṣṣiɣ. Ad ten tařeqqmed sebɛa n wussan. 36 Kuř ass ad tesswejded afunas ameẓyan d taɣarṣt n ddenb i weṣřaḥ uca ad tekksed ddenb x uɛalṭar umi xas ɣa tessiwḍed aṣřaḥ, uca xenni ad t tdehned, maḥend ad t tessqeddsed. 37 Sebɛa n wussan ad tegged aṣřaḥ x uɛalṭar uca ad t tessqeddsed, xenni ad yiři d amqeddas qaɛ. Wenni i ɣa iḥadan aɛalṭar, ad yiři d amqeddas. 38 D man aya i ɣa tesswejded x uɛalṭar: tnayen n izmaren n ijj n useggʷas, kuř ass řebda. ◘29:38 Řxř. 28:3 39 Ad tesswejded ijj n yezmar di ṣṣbeḥ u izmar nneɣni ad t tesswejded jar beddu n wezyen n wass ař dd-tewḍa tmeddit. 40 I yijj n yezmar ad teksid ɛecra di tesɣart n ijj n ifa n waren azdad ixeǧḍen s zzect ddzen tt-i-dd zi zzitun, u arebɛa di tesɣart n ijj n uhinu n binu d tawhibt n useyyeb. ◼29:40 ahinu - ijj n ‘uhinu’ dayes 6 ½ litru n waman niɣ n uceffay u n řeḥwayej nneɣni, u 6,5 litru ittawi-dd 1/6 ‘bath’. Ijj n ‘bath’ imun dayes xenni 6 n ‘uhinu’, ixs ad yini ɛřayen 40 litru. 41 Ad tɣarṣed i yezmar nneɣni jar beddu n wezyen n wass ař dd-tewḍa tmeddit. Ad ɣares tarnid tawhibt n řɣiǧet am mammec tenni n ṣṣbeḥ u ɛawed tawhibt nnes n useyyeb. Aqa d řefwaḥet ittfuḥen. Aqa d tawhibt n tmessi i SIDI. 42 Ad tiři d taɣarṣt n wecmaḍ řebda di marra jjiřat nwem ɣar wadaf n Uqiḍun n Umsagar zzat i wudem n SIDI, mani ɣa ssmuneɣ akidwem, maḥend ad kidek ssiwřeɣ din. 43 Ad mmsagareɣ din ak-d ayt n Israil, u Aqiḍun ad ittwaqeddes s uɛuǧi inu. 44 Ad ssqeddseɣ Aqiḍun n Umsagar d uɛalṭar. Ad ssqeddseɣ ɛawed Harun d warraw nnes, ḥima ad ayi iřin d ikehhanen. 45 Ad zedɣeɣ di řwesṭ n ayt n Israil, ad asen iřiɣ d AREBBI ◘29:45 Uf. 25:8; Lawi 26:12; Izhd. 78:60; Zak. 2:14; 2 Kur. 6:16; Asa. 21:3 46 uca ad ssnen belli Necc d SIDI, AREBBI nsen, wenni ten issuffɣen zi temmurt n Miṣra, maḥend ad zedɣeɣ di řwesṭ nsen. Necc d SIDI, AREBBI nsen.”