1 Inna asen: “S tidett, Necc ad awem iniɣ, aqa ca zeg inni da ibedden war ttqasin ca řmewt ař ɣa ẓaren Tageldit n AREBBI ad dd-tas s jjehd.” ◘9:1 [Mt. 17:1-13; Lk. 9:28-36] — Mt. 16:28; Lk. 9:27. 2 Awarni setta n wussan Yasuɛ yiwi-dd akides Buṭrus d Yaɛqub d Yuḥanna weḥḥedsen ɣar ijj n wedrar yuɛřan, uca ibeddeř qibač i tiṭṭawin nsen. ◘9:2 Mt. 17:1; Lk. 9:28. 3 Arruḍ nnes idweř yařeqq d acemřař aṭṭas am wedfeř, war izemmar uřa d ijj n bnadem x temmurt ad issemřeř amenni. 4 Iḍhar asen-dd Iliya ak-d Musa am tuɣa ssawařen ak-d Yasuɛ. ◘9:4 Uf. 24:1, 9, 10, 16 5 Inna as Buṭrus: “A Amseřmad inu, aqa mliḥ umi da neǧa, ejj aneɣ ad newwet třata n iɛuccuten n tseṭṭa, ijjen i Cek, ijjen i Musa u ijjen i Iliya.” ◘9:5 Mt. 17:4; Mk. 9:5; Lk. 9:33 6 Maca tuɣa iweddar as min ɣa yini, minzi nitni ggʷeden aṭṭas. 7 Ikka-dd useynu issduriy i-ten s tiři nnes, uca třaɣa-dd ict n tmijja zeg useynu, teqqar: “Wa d Mmi iɛizzen, sřem ɣares!” ◘9:7 Aɛwd. 18:15; Ica. 42:1; Mt. 3:17; 17:5; Mk. 1:11; Lk. 3:22; 9:35; Kul. 1:13; 2 Bṭ. 1:17. 8 Umi ssgeɛɛden nitni tiṭṭawin nsen, deg ict n tecti war qqimen ttwařan ɛad ḥed akidsen, mɣir Yasuɛ weḥḥdes.

9 Ařami dd-hwan zeg wedrar, yumur i-ten ḥima war ttɛiwiden i ḥed walu zi min ẓrin ař dd ɣa ikkar Mmis n bnadem jar imettinen. ◘9:9 Mt. 17:9; Lk. 9:36. 10 Xemmřen awař-a deg yixef nsen am tuɣa ttseqsan ixef nsen min ixs ad yini wawař-a: ‘Ař dd ɣa ikkar zi taddart n imettinen’? 11 Sseqsan t, nnan as: “Mayemmi qqaren imseřmaden n idlisen belli ittxeṣṣa ad dd-yas Iliya d amezwaru?” ◘9:11 Mal. 3:23; Mt. 11:14; Lk. 1:17. 12 Yarra-dd, inna asen: “Aqa Iliya ad dd-yas d amezwaru uca ad yarr kuřci, uca ad tiři am mammec tura x Mmis n bnadem, aqa ad iweddeb aṭṭas uca ad t sseḥqaren. ◘9:12 Izhd. 22:7; Ica. 53:4; Dan. 9:26, Asa. 11:4-7 13 Maca Necc ad awem iniɣ, Iliya aqa yusa-dd uca ggin zzayes min xsen am mammec xas tura.” ◘9:13 Mal. 3:23, 24.

14 Řami dd-yusa ɣar imeḥḍaren, iẓra ijj n řɣaci d ameqqran ittenneḍ asen-dd u imseřmaden n idlisen ttqacaḥen ten. ◘9:14 [Mt. 17:14-20; Lk. 9:37-43] 15 Deɣya iẓra i-t marra řɣaci, tbehten aṭṭas, uca uzzřen-dd ɣares, seǧmen xas. 16 Xenni isseqsa imseřmaden n idlisen: “Min xef kidsen tᵉttqacaḥem?” 17 Yarra-dd ijjen zi řɣaci, inna: “A Amseɣɣar, iwyeɣ-dd mmi ɣarek. Aqa dayes řaryaḥ nni t yarrin d agnaw. ◘9:17 Mt. 17:14; Lk. 9:37,38. 18 Řebda xmi t itteṭṭef, ineṭṭar i-t ɣar temmurt, itteffeɣ as-dd ukuffu zeg uqemmum, ittɣezza tiɣmas nnes uca ittaẓeɣ. Nniɣ i imeḥḍaren nnec ad t ssuffɣen, maca war d as zemmaren.” 19 Yasuɛ yarra-dd, inna asen: “A jjiř war yuminen, mecḥař kidwem i ɣa qqimeɣ, mecḥař i kenniw i ɣa yarbuɣ ɛad? Awyem t-i-dd ɣari!”

20 Uca iwyen t-i-dd ɣares. Umi t iẓra, řexdenni immenḍar i-t řaryaḥ, ařami iwḍa ɣar temmurt, ibda ittbarkikkiḍ, ittekk as-dd ukuffu zeg uqemmum. ◘9:20 Mk. 1:26. 21 Yasuɛ isseqsa babas: “Mecḥař zeg wami t-i-dd-iḥkem uya?” Inna as: “Zi temẓi nnes. 22 Aṭṭas n imuren ineṭṭar i-t di tmessi u deg waman ḥima ad t isshellek. Maca mařa tzemmared x ca, ɛawen ayi u ḥinn xafi!” 23 Inna as Yasuɛ: “Mařa tzemmared ad tamned, aqa kuřci izemmar i wenni yumnen.” ◘9:23 Lk. 17:6. 24 Řexdenni isɣuy babas n uḥenjir s imeṭṭawen, inna: “Umneɣ, a Sidi! Ɛawen l’iman ineqṣen inu.” 25 Umi iẓra Yasuɛ řɣaci ittazzeř uca ssmunen-dd ɣares nitni, iwebbex řaryaḥ amengus, inna as: “A řaryaḥ agnaw, Necc umureɣ cek: Ffeɣ zzayes! War ttdekkwiř dayes ɛemmarṣ!” 26 Isɣuy cciṭan nni aṭṭas, ijebbed i-t aṭṭas ammu d wammu uca iffeɣ zzayes. Xenni idweř uḥenjir am yijj n umettin, ařami tuɣa nnan aṭṭas, aqa immut. 27 Maca Yasuɛ iṭṭef i-t zeg ufus nnes, issbedd i-t.

28 Umi dd-yudef ɣar taddart, sseqsan t imeḥḍaren nnes weḥḥedsen: “Mayemmi war nzemmar neccin ad t nessuffeɣ?” ◘9:28 Mt. 17:19. 29 Inna asen: “Ddegg-a war izemmar ad ittwassuffeɣ uřa s ict n řḥajjet mɣir s uẓummi d tẓaǧit waha.”

30 Ffɣen-dd ssenni uca cuqen di Ljalil. Netta tuɣa war ixs ad t iɛqeř uřa d ijjen. ◘9:30 [Mt. 17:22-23; Lk. 9:43-45] — Mt. 16:21; 17:22; 20:18; Mk. 8:31; 10:33; Lk. 9:22; 18:31; 24:7. 31 Maɣar tuɣa isseřmad imeḥḍaren nnes, iqqar asen: “Aqa Mmis n bnadem ad immewc deg ifassen n iwdan, ad t nɣen uca awarni řami t ɣa nɣen, ad dd-ikkar deg wass wiss třata.” 32 Maca nitni war fhimen i wawař-a uca ggʷeden ad t sseqsan x uya.

33 Usin-dd ɣar Kafarnaḥum u awarni řami udfen ɣar taddart, isseqsa ten: “Di min di tuɣa tḥarrḍem ak-d wayawya deg webrid?” ◘9:33 [Mt. 18:1-5; Lk. 9:46-48] — Mt. 18:1; Lk. 9:46; 22:24. 34 Maca sqaren, minzi tuɣa ttemqacaḥen deg webrid di win iǧan d ameqqran zzaysen. 35 Iqqim, iřaɣa-dd i tenɛac, inna asen: “Mařa ixs ḥed ad yiři d amezwar, ad yiři d aneggar uřa d amsexxar i marra.” ◘9:35 Mt. 20:27; Mk. 10:43. 36 Iksi aḥenjir, issbedd i-t di řwesṭ nsen, idarreɛ as, uca inna asen: ◘9:36 Mk. 10:16. 37 “Wi ɣa iqebřen mɣir ijj n uḥenjir am uḥenjir-a s Yisem inu, aqa iqbeř ayi u wi d ayi ɣa iqebřen, war d ayi iqebbeř, maca iqebbeř wi d ayi-dd-issekken.” ◘9:37 Mt. 18:5; Lk. 9:48; Yḥ. 13:20.

38 Yarra-dd xas Yuḥanna, inna as: “A Amseřmad inu, neẓra ijjen issuffuɣ ccwaṭen s Yisem nnec u nemneɛ i-t minzi netta war dd aneɣ iḍeffar.” ◘9:38 [Lk. 9:49-50] — Lk. 9:49. 39 Inna asen Yasuɛ: “War t mennɛem ca, minzi war din uřa d ijj i ɣa yeggen timegga ijehden s Yisem inu, uca řexdenni deɣya ad xafi issiweř s řɣar. ◘9:39 1 Kur. 12:3. 40 Minzi wi war iǧin ḍidd nwem, aqa-t akidwem. ◘9:40 Mt. 12:30; Mk. 9:39; Lk. 9:50; 11:23. 41 Wi kenniw i ɣa isseswen s yijj n řkas n waman waha, minzi aqa kenniw n Lmasiḥ i teǧam, aqa s tidett, Necc ad awem iniɣ, netta war ixessar ca řmunet nnes. ◘9:41 Mt. 10:42.

42 Wi ɣa issenqraḍen ijjen zeg imeẓyanen-a i dayi yumnen, iḥřa as ad as tᵉttwagg ict n teṣḍart n tsirt tedqeř deg iri nnes, ad immenḍar di řebḥar. ◘9:42 [Mt. 18:6-9; Lk. 17:1-2] — Mt. 18:6; Lk. 17:2. 43 Mařa issenqarḍ cek ufus nnec, qess i-t. Iḥřa ac ad tadfed ɣar Tudart d ameɛḍuř x wadaf s tnayen n ifassen di jᵉhennama, ◘9:43 Aɛwd. 13:7; Mt. 5:30; 18:8. 44 mani tikecca nsen war tᵉttmetti u timessi nsen war txessi. ◘9:44 Ica. 66:24. 45 Mařa issenqarḍ cek uḍar nnec, qess i-t. Iḥřa ac ad tadfed ɣar Tudart d aqejdaḥ x uweṭṭu s tnayen n iḍaren di jᵉhennama, 46 mani tikecca nsen war tᵉttmetti u timessi nsen war txessi. ◘9:46 Ica. 66:24 47 Mařa tessenqarḍ cek tiṭṭ nnec, qeřɛ i-tt. Iḥřa ac ad tadfed ɣar Tgeldit n AREBBI s ict n tiṭṭ x uweṭṭu s tnayen n tiṭṭawin di tmessi n jᵉhennama, 48 mani tikecca nsent war tᵉttmetti u timessi nsent war txessi. ◘9:48 Ica. 66:24 49 Minzi kuř ijjen ad ittwameǧeḥ s tmessi u kuř taɣarṣt ad tᵉttwameǧeḥ s tmeǧaḥt. ◘9:49 Lawi 2:13. 50 Tameǧaḥt teṣbeḥ, maca mařa tameǧaḥt ixsar uředdi nnes, s min zi tt i ɣa ɛedřen. Ad tiři tmeǧaḥt daywem uca ḥḍam řehna jar awem.” ◘9:50 Mt. 5:13; Lk. 14:34; Rum. 12:18; Ɛbr. 12:14.