1 Inna Yasuɛ i imeḥḍaren nnes: “War tɛeddeř ila ad iřint tɛenkrifin, maca uct x wenni zi i dd ɣa yasent! ◘17:1 [Mt. 18:6-7; 21-22; Mk. 9:42] — Mt. 18:7; Mk. 9:42. 2 Iḥřa as ad xas tᵉttwagg ict n teṣḍart n tsirt tedqeř ɣar yiri nnes uca ad immenḍar di řebḥar x minni ɣa issenqarḍ ijjen zeg imeẓyanen-a. 3 Ḥḍam ixef nwem. Mařa ixḍa umac, webbex i-t, u mařa itub, samḥ as. ◘17:3 Lawi 19:17; Awřn. 17:10; Mt. 18:15; Yaɛ. 5:19. 4 Mařa ixḍa akidek sebɛa n twařawin deg ijj n wass uca idweř-dd ɣarek sebɛa n twařawin, iqqar: ‘Aqa tubeɣ!’, ittxeṣṣa ad as tsamḥed.” ◘17:4 Mt. 18:21.

5 Nnan rrusul: “A Siditneɣ, arni aneɣ l’iman nneɣ!” 6 Netta inna asen: “Mři tuɣa daywem l’iman am yict n tḥebbuct n zzariɛet n uxerdel uca ad tinim i tcejjart-a n tut: ‘Twaqřeɛ zeg iẓewran nnem, twaẓẓu di řebḥar!’, xenni ad awem tᵉṭṭaɛ.” ◘17:6 Mt. 17:20; 21:21; Mk. 11:23.

7 Man wen zzaywem i ɣar iǧa umsexxar icarrez niɣ yarekkwes uǧi, ad as yini deɣya mařa iɛqeb-dd zeg iyyar uca yudef ɣar taddart: ‘Qarreb-dd, teqqimed ɣar ṭṭabřa’? 8 Ma war d as iqqar: ‘Sewjed min ɣa mmunesweɣ, tbeysed, tsexxared xafi ař ɣa cceɣ, sweɣ. Awarni man aya ad tecced, ad teswed uřa d cek’? 9 Ma ad iksi umsexxar nni aqadi, minzi netta igga min d as ittwannan ad t yegg? Ittɣiř ayi, lla! 10 Ammu uřa d kenniw, xmi teggim marra min d awem yumuren, ittxeṣṣa ad tinim: ‘Aqa neccin d imsexxaren war ineffɛen, minzi negga min tuɣa xaneɣ’.”

11 Rami iruḥ Yasuɛ ɣar Urcalim icuq di řwesṭ n temmurt n Isamariyyen, tenni iǧan zzat n Ljalil. 12 Ařami tuɣa ittadef ɣar ijj n dcar, řqan t ɛecra n yeryazen daysen řbarṣ, qqimen bedden ɣar řaggʷaj. 13 Ssgeɛɛden tmijja nsen, nnan: “A Amseřmad nneɣ, Yasuɛ, arḥem aneɣ!’ ” 14 Umi daysen ixzar, inna asen: “Ruḥem, secnem ixef nwem i ikehhanen!” Xenni imsar, am gguren nitni, aqa ttwassizedgen. ◘17:14 Lawi 13:2; 14:2; Mt. 8:4; Lk. 5:14.

15 Ijjen zzaysen iɛqeb, umi iẓra belli iggenfa, uca issemɣara di AREBBI s tmijja tejhed. 16 Iwḍa x uɣembub nnes ɣar iḍaren n Yasuɛ, iqada t. Wa tuɣa d ijj n weryaz Asamiri. 17 Iṭṭef Yasuɛ deg wawař, inna: “Ma war ttwassizedgen marra s ɛecra? Mani qqimen tesɛa? 18 Mayemmi jjin nitni ad dd-asen ḥima ad ssɛuǧen AREBBI, mɣir wanita waha, wenni iǧan zeg ijj n řgens d abarrani?” ◘17:18 Lk. 4:25-27 19 Xenni inna as: “Kkar, truḥed, aqa l’iman nnec issenjem i cek!”

20 Umi Ifarisiyyen sseqsan Yasuɛ: “Meřmi i dd ɣa tas Tgeldit n AREBBI?”, yarra-dd xasen, inna: “War dd-tᵉttis Tgeldit n AREBBI s yijj n wudem ittwasscanen. ◘17:20 [Mt. 24:23-28; 37-41] 21 War qqaren: ‘Aqa-tt da!’, niɣ: ‘Aqa-tt diha!’, minzi Tageldit n AREBBI aqa-tt di ca zzaywem.” ◘17:21 Mt. 24:23; Mk. 13:21; Lk. 21:7, 8. 22 Inna i imeḥḍaren nnes: “Ad dd-awḍen wussan i di i ɣa texsem ad tẓarem ijj n wass waha zeg wussan n Mmis n bnadem, maca kenniw war t tẓarrem. 23 Mařa nnan awem: ‘Aqa-t da!’ niɣ: ‘Aqa-t diha!’, war din ttriḥem. ◘17:23 Mt. 24:23; Mk. 13:21. 24 Minzi am mammec iccat wassam zi ṭṭarf sadu ujenna ɣar ṭṭarf nneɣni sadu ujenna, ammu ɛawed ad yiři Mmis n bnadem deg wass nnes. 25 Maca ittxeṣṣa as amezwaru ad iweddeb aṭṭas uca ad ittwammenḍar zi jjiř-a! ◘17:25 Mt. 16:21; 17:22; 20:18; Mk. 8:31; 9:31; 10:33; Lk. 9:22; 18:31; 24:6, 7

26 Am mammec tuɣa deg wussan n Nuḥ, ammu i ɣa yiři ɛawed deg wussan n Mmis n bnadem. ◘17:26 Amz. 6:2; 7:7; Mt. 24:37,38; 1 Bṭ. 3:20. 27 Tuɣa ttᵉtten, sessen, ttawyen timɣarin, smeǧacen timɣarin i yeryazen ař ass i di yudef Nuḥ ɣar uɣarrabu uca yusa-dd ṭṭufan, isshellek i-ten marra. 28 Ammu tuɣa imsar ɛawed deg wussan n Lut. Tuɣa ttᵉtten, sessen, ssaɣen, zznuzan, tteẓẓun, bennan. 29 Maca deg wass i di dd-iffeɣ Lut zi Sadum, ijja SIDI ad dd-tewḍa tmessi d řecbareyyet zeg ujenna, iteḥḥa ten marra. ◘17:29 Amz. 19:24; Aɛwd. 29:22; Ica. 13:19; Irm. 50:40; Ḥuc. 11:8; Ɛam. 4:11; Yah. 7.

30 Ammu i ɣa yiři deg wass i di i ɣa ittwassargeb Mmis n bnadem. 31 Wenni iǧan x tzeqqa deg wass nni u řqecc nnes aqa-t di taddart, war dd-ihekkwi ca maḥend ad t iksi. Ammu uřa d wenni iǧan deg iyyar, war dd-ittɛiqib ca. 32 Ɛeqřem x temɣart n Lut! ◘17:32 Amz. 19:15-17, 26. 33 Wenni yarezzun ad issenjem tudart nnes, ad tt ixsar, u wenni tt i ɣa ixsaren, ad tt issenjem. ◘17:33 Mt. 10:39; 16:25; Mk. 8:35; Lk. 9:24; Yḥ. 12:25. 34 Ad awem iniɣ, aqa di ǧiřet nni ad din iřin tnayen x ict n tassut: ijjen ad ittwaksi, wenneɣni ad ittwajj. ◘17:34 Mt. 24:40,41; 1 Ts. 4:17. 35 Ad din iřint tnayen n temɣarin ḥarryent jmiɛ, ict ad tᵉttwaksi, tenneɣni ad tᵉttwajj. 36 Ad din iřin tnayen deg iyyar: ijjen ad ittwaksi, wenneɣni ad ittwajj.”

37 Arrin-d, nnan as: “Mani, a Siditneɣ?” Netta inna asen: “Mani teǧa arrimet din ittmunan ɛawed igidaren.” ◘17:37 Ayub 39:30; Mt. 24:28.