1 Ařami dd-iffeɣ zi Zzawect Tameqqrant, inna as ijjen zeg imeḥḍaren nnes: “A Amseɣɣar, xzar, mammec ǧan iẓra-ya d řebni-ya!” ◘13:1 [Mt. 24:1-44; Lk. 21:5-33] — Mt. 24:1; Lk. 21:5. 2 Yarra-dd Yasuɛ, inna as: “Ma teẓrid řebni-ya imɣaren? War da ittɣimi uřa d ijj n weẓru x weẓru nneɣni i war ittnehdim.” ◘13:2 1 Ij. 9:7, 8; Mixa 3:12; Lk. 19:44.

3 Řami tuɣa iqqim x wedrar n Zzitun qibač i Zzawect Tameqqrant, sseqsan t Buṭrus d Yaɛqub d Yuḥanna d Andrawus řami ten tuɣa weḥḥedsen: ◘13:3 Mt. 24:3; Lk. 21:7. 4 “Ini aneɣ meřmi i ɣa yiři man aya, u man ad tiři řeɛřamet aqa marra timesřayn-a ad awḍent?” ◘13:4 Řex. 1:6.

5 Ibda Yasuɛ iqqar asen: “Xzarem, ḥima war kenniw iɣekkwi ḥed. ◘13:5 Irm. 29:8; Afa. 5:6; 2 Ts. 2:2, 3; 1 Yḥ. 4:1. 6 Aqa aṭṭas ad dd-asen s Yisem inu qqaren: ‘Aqa d Necc!’, uca ad ɣwan aṭṭas. ◘13:6 Irm. 14:14; 23:21. 7 Mařa tesřim x imenɣan d řexbar n garrat, war ttnexřiɛem ca, minzi s uɣiř ad yiři man aya, maca war ittiři ɛad d aneggar. 8 Minzi řgens ad ikkar ḍidd i řgens nneɣni u tageldit ḍidd i tgeldit nneɣni. Ad iřin inhezzan n temmurt zeg wemcan ɣar wemcan nneɣni uca ad yiři řaẓ d uɣewwuɣ. Timesřayin-a d beddu n řewjeɛ n tarwa. ◘13:8 Ica. 19:2.

9 Ḥḍam ixef nwem, minzi ad kenniw sellmen i tudrin n ccreɛ, ad kenniw hettken s urekkuḍ di temzidawin nsen uca ad kenniw ssiwḍen ɣar ijeǧiden d řḥukkam di ssibbet inu, d cchadet i nitni. ◘13:9 Mt. 10:17; 24:9; Lk. 21:12; Yḥ. 15:19; 16:2; Asa. 2:10. 10 Maca ɣar umezwar ittxeṣṣa ad ittwabarreḥ s Řexbar Aṣebḥan di marra řegnus. 11 Xmi kenniw i ɣa gewwden ḥima ad kenniw sellmen, war kessim s wemnus qbeř zi min ɣa tinim, war dayes txarriṣem ca, maca min ma d awem i ɣa immewcen di tsaɛɛet nni, siwřem zzayes, minzi war teǧim d kenniw i issawařen, maca d Arruḥ Iqeddsen. ◘13:11 Mt. 10:19; Lk. 12:11; 21:4. 12 Umas ad isellem umas maḥend ad t nɣen, u babas ad isellem mmis, uca ad tekkar tarwa x lwalidin nnes uca ad ten nɣen. ◘13:12 Ḥiz. 38:21; Mixa 7:6. 13 Ad kenniw carhen marra di ssibbet n Yisem inu, maca wenni i ɣa iṣbaren ař aneggar, ad ittwassenjem. ◘13:13 Mt. 10:22; 24:13; Lk. 21:19; Asa. 2:7, 10.

14 Xmi ɣa tẓarem nnɛi n wareyyeb, min xef tuɣa issawař unabi Daniyal, ittbedda mani war ittxeṣṣa ad ibedd - wenni iɣrin ad ifhem! - řexdenni ittxeṣṣa i yinni iǧan di Yahudiyya, ad arewřen ɣar idurar, ◘13:14 Dan. 9:27; Mt. 24:15; Lk. 21:20, 21. 15 u wenni iǧan x tzeqqa war dd-ihekkwi ca ɣar taddart u war ittidef ca ḥima ad iksi ca zi taddart nnes, 16 u wenni iǧan deg iyyar war dd-ittɛiqqib ca ḥima ad iksi aseřham nnes. 17 Uct x tinni iǧan s ddeyset d tinni issuṭuḍen deg wussan nni! 18 Ẓaǧem ḥima war tᵉttiři tarewřa nwem di řmecta, 19 Minzi deg wussan nni ad din tiři ict n řmeḥnet i war tuɣi am nettat zeg wami dd-ixřeq AREBBI ddunect ař řexxu, uca war tᵉttiři ɛemmarṣ ɛawed. ◘13:19 Mt. 24:21 20 Mařa SIDI war issemẓi ussan nni, war tnejjem uřa d ict n ddat, maca di ṭṭweɛ n yinni ittwafarzen, inni i ixḍar Netta, aqa issemẓi ussan nni.

21 Xenni mařa inna awem ijjen: ‘Aqa Lmasiḥ da!’, niɣ: ‘Aqa-t diha!’, war t ttamnem. ◘13:21 Mt. 24:23; Lk. 21:8. 22 Minzi ad kkaren imasiḥen ifalsuten d inabiyyen issxarriqen, ad ggen řeɛřamat d řeɛjayeb ḥima, mařa izemmar, ad xedɛen ɛad inni ittwafarzen. ◘13:22 Aɛwd. 13:2; 2 Ts. 2:11. 23 Kenniw maca, ḥḍam, aqa marra nniɣ awem t qbeř.

24 Maca deg wussan nni, awarni řmeḥnet nni, ad tebbarcen tfuct uca taziri war tᵉttic ɛad tafawt nnes, ◘13:24 Ica. 13:10; Ḥiz. 32:7; Yuw. 3:4; 3:15; Mt. 24:29; Lk. 21:25; Asa. 6:12. 25 itran ad dd-wḍan zeg ujenna uca ṣṣulaṭat i iǧan deg ijenwan ad ttwanhezzent. ◘13:25 Ica. 13:10; 34:4. 26 Xenni ad ẓaren Mmis n bnadem xmi dd ɣa yas deg iseynuten, s jjehd d uɛuǧi ameqqran. ◘13:26 Dan. 7:10; Mt. 16:27; 24:30; Mk. 14:62; Lk. 21:27; Řex. 1:11; 1 Ts. 4:16; 2 Ts. 1:10; Asa. 1:7. 27 Řexdenni ad issekk lmalakat nnes uca ad iyru inni zzayes ittwafarzen zi arebɛa n tɣemmura n usemmiḍ, zi ṭṭarf aneggaru n temmurt ař ṭṭarf aneggaru n ujenna. ◘13:27 Aɛwd. 30:4, 5

28 Řemdem zeg wartu n tazart amettiř-a: xmi ɣa dewřen řefruɛ nnes ad dd-areḍben uca tifray ad dd-ffɣent, xenni ad tessnem aqa anebdu yiweḍ-dd. ◘13:28 Mt. 24:32; Lk. 21:29. 29 Ammu ittxeṣṣa uřa d kenniw, xmi ɣa tẓarem timesřayin-a ttemsarant, ad tessnem, aqa man aya yudes-dd, x tewwart. 30 S tidett ad awem iniɣ, jjiř-a war iɛeddu ca ař d ɣa yiři man aya marra. 31 Ajenna d temmurt ad ɛdun, maca awařen inu war ɛeddun ɛemmarṣ. ◘13:31 Izhd. 102:27; Ica. 40:8; 51:6; Ɛbr. 1:11. 32 Maca ass nni d tsaɛɛet nni uřa d ijj war t issin, uřa d lmalakat nni iǧan deg ujenna, uřa d Mmis, mɣir Babas. ◘13:32 Mt. 24:36; Řex. 1:7.

33 Xẓarem, ḥḍam, ẓaǧem, minzi war tessinem ca meřmi dd ɣa taweḍ řweqt nni. ◘13:33 Mt. 24:42; 25:13; Lk. 12:40; 21:36; 1 Ts. 5:6. 34 Aqa-t am yijj n bnadem ittxeṣṣa as ad isafar, ijja taddart nnes, iwekkeř imsexxaren nnes s ṣṣulṭa, iwca i kuř ijj zzaysen řxedmet nnes, uca iɛřem as i uɛessas n tewwart maḥend ad iqqim ad iḥḍa. 35 Iwa ḥḍam xenni, minzi war tessinem ca meřmi i dd ɣa yas bab n taddart, ɣar uɛecci niɣ ɣar wezyen n ǧiřet niɣ ɣar usquqeɛ n uyaẓiḍ niɣ ɣar ṣṣbeḥ zic, 36 ḥima, mařa dd-ittis deɣya, war kenniw ittif tᵉtteṭṭṣem. 37 Min d awem qqareɣ řexxu, qqareɣ t i marra: Faqem!”