1 S uya iřim d imeḍfaren n AREBBI am iḥenjiren iɛizzen, 2 uyurem di tayri am mammec uřa d Lmasiḥ tuɣa ittexs aneɣ, iwca ixef nnes xaneɣ d tawhibt d tɣarṣt i AREBBI, aqa-tt d ict n řefwaḥet taṣebḥant. ◘5:2 Yḥ. 13:34; 15:12; Gal. 2:20; 1 Ts. 4:9; Tit. 2:14; 1 Bṭ. 3:18; Ɛbr. 8:3; 9:14; 1 Yḥ. 3:23; 4:21

3 Maca x farq-ccɣeř d marra řexmej d ṭṭmeɛ, war xas ittiři bu wawař jar awem am mammec icuwwar i imqeddasen, ◘5:3 Mk. 7:21; Afa. 4:29; Kul. 3:5. 4 uřa x řhard issbehdřen niɣ x wawařen ixwan niɣ x tqeṣṣart niɣ x řefḍiḥet, timesřayin i war neffɛent di walu, maca mammec nneɣni ittxeṣṣa aqadi. 5 Minzi tessnem aqa kuř ijj wenni itteggen farq-ccɣeř, niɣ wenni dayes řexmej niɣ ṭṭmeɛ, aqa wanita iɛebbed l’aṣnam, war ɣares bu tesɣart di tgeldit n Lmasiḥ u n AREBBI. ◘5:5 1 Kur. 6:10; Gal. 5:19; Kul. 3:5; Asa. 22:15.

6 War ttejjim uřa d ijjen ad kenniw iɣekkwi s wawařen ixwan, aqa zi man aya dd-ihekkwa weɣḍab n AREBBI x tarwa n řmuɛṣiyyet. ◘5:6 Irm. 29:8; Mt. 24:4; Mk. 13:5; Lk. 21:8; Kul. 2:4, 18; 2 Ts. 2:3; 1 Yḥ. 4:1. 7 War carrcem ca akidsen! 8 Minzi zic tuɣa kenniw d taǧest, maca aqa řexxu kenniw d tafawt di Siditneɣ. S uyenni uyurem am tarwa n Tfawt, ◘5:8 1 Ts. 5:4. 9 minzi řɣiǧet n Tfawt tᵉttiři di marra tcuni d tsegda d tidett. ◘5:9 Gal. 5:22. 10 Farzem min ɣa yarḍan Siditneɣ. 11 War carrcem ca di řexdayem tibarcanin i war dd-ittiwyen řɣiǧet, maca webbxem tent. ◘5:11 Mt. 18:17; 1 Kur. 5:8; 10:20; 2 Kur. 6:14; 2 Ts. 3:14. 12 Minzi min tteggen di tnuffra, aqa-t d nnɛi i war tzemmared uřa ad t tɛawded. 13 Minzi marra ad ittwasegged s Tfawt u ad ittwassargeb s Tfawt u marra min issargaben d Tifawt i yeǧa. ◘5:13 Yḥ. 3:20, 21. 14 S uyenni qqaren:

“Faq cek, a bu yiḍeṣ.

Kkar-dd zi taddart n imettinen,

uca ad xak igg Lmasiḥ tafawt.” ◘5:14 Rum. 13:11; 1 Ts. 5:6.

15 Ḥḍam ad tuyurem s uweqqar, war iǧi am ibuhařiyyen, maca am imiɣisen, ◘5:15 Kul. 4:5. 16 inni i ɣa yawyen ariqqi i řweqt nsen, minzi ussan-a d iɛeffanen. ◘5:16 Rum. 13:11. 17 X uyenni war ttiřim d ibuhařiyyen, maca fehmem min ixs AREBBI. ◘5:17 Rum. 12:2; 1 Ts. 4:3. 18 War seccaram ca s binu i ittawyen ɣar řeqjaḥet, maca iřim tɛemmarem s Arruḥ. ◘5:18 Awřn. 23:29; Ica. 5:11, 22; Lk. 21:34. 19 Siwřem di řeɛmur nwem s izehhiden d izřan n uṣebbeḥ d izřan n Arruḥ, ɣennjem deg wuřawen nwem i SIDI. ◘5:19 Kul. 3:16. 20 Qadam řebda AREBBI Babatneɣ x kuř ijjen deg Yisem n Siditneɣ Yasuɛ Lmasiḥ. ◘5:20 Kul. 3:17; 1 Ts. 5:18. 21 Waḍḍɛem ixef nwem i wayawya di tayri n Lmasiḥ.

22 A timɣarin, waḍḍɛent i yeryazen nkent am tᵉttwaḍḍɛent i Siditneɣ, ◘5:22 Amz. 3:16; 1 Kur. 14:34; Kul. 3:18; Tit. 2:5; 1 Bṭ. 3:1. 23 minzi aryaz aqa d azeǧif n temɣart am uřa d Lmasiḥ i yeǧan d Azeǧif n tmesmunt d wenni itticen Tudart i Arrimet. ◘5:23 Rum. 12:5; 1 Kur. 11:3; 12:27; Afa. 1:22, 23; 4:12, 15; Kul. 1:18, 24. 24 Am tmesmunt tᵉttwaḍḍeɛ ixef nnes i Lmasiḥ, amenni ɛawed timɣarin ad waḍḍɛent ixef nsent i yeryazen nsent di marra.

25 A iryazen, xsem timɣarin nwem am mammec tuɣa ixs Lmasiḥ tamesmunt uca isellem Ixef nnes di ṭṭweɛ nnes, ◘5:25 Gal. 1:4; Afa. 5:2; Kul. 3:19. 26 ḥima ad tt yarr d tamqeddast u ad as issizdeg s usird n Waman Iddaren u s Wawař. ◘5:26 Tit. 3:5; 1 Bṭ. 3:21. 27 Netta ad igg tamesmunt qibač i Yixef nnes s uɛuǧi, břa abeqqiḍ niɣ acebriq, břa uřa d ict n řḥajjet zi marra man aya, maca ad tiři d tamqeddast u břa řɛib. ◘5:27 Kul. 1:22.

28 Ammu ittxeṣṣa ad xsen yeryazen timɣarin nsen am arrimet nsen. Aqa wenni ittexsen tamɣart nnes, aqa ittexs ixef nnes. 29 Uřa d ijj war icarh ɛemmarṣ arrimet nnes, maca issecca i-t, ittḥawař xas am mammec ittḥawař ɛawed Lmasiḥ x tmesmunt, 30 minzi neccin d ixfawen n Arrimet nnes, n weysum nnes u n iɣsan nnes. ◘5:30 Rum. 12:5; 1 Kur. 12:27.

31 S uyenni aryaz ad yejj babas d yemmas maḥend ad iqqen ɣar temɣart nnes, ad iřin s tnayen idsen d ijj n weysum. ◘5:31 Amz. 2:24; Mt. 19:5, 6; Mk. 10:8; 1 Kur. 6:16. 32 Ssirr-a d ameqqran, maca necc qqareɣ t zi jjihet n Lmasiḥ d tmesmunt. 33 Maca ittxeṣṣa ɛawed i kuř ijj zzaywem maḥend ad ixs amenni tamɣart nnes am yixef nnes, maca tamɣart ad tweqqar aryaz.