1 Munen ɣares Ifarisiyyen d imseřmaden n idlisen i dd-yusin zi Urcalim. ◘7:1 [Mt. 15:1-20] — Mt. 15:1. 2 Umi ẓrin belli ca n imeḥḍaren nnes ccin aɣrum břa ggin ad ssirden ifassen nsen d amezwaru, ɛeyyben xasen. 3 Minzi marra Ifarisiyyen d Wudayen war ttᵉtten mɣir awarni řami ssirden ifassen s yijj n řuḍu mliḥ, minzi tteṭṭfen di tubbart n imɣaren. 4 U řami dd-usin zi ssuq, war ttᵉtten mařa war ssɣeḍṣen ifassen nsen di tbanyut d amezwaru, u aqa din aṭṭas n tmesřayin nneɣni qebřen tent, maḥend ad zzaysent ṭṭfen ɛlaḥsab tubbart nsen, am useɣḍas n řkisan d teydurin d tebriqin n nnḥas d dduri n řectawat deg ict n tbanyut. ◘7:4 Lk. 11::38 5 Xenni sseqsan t Ifarisiyyen d imseřmaden n idlisen: “Mayemmi war ḍfaren imeḥḍaren nnec tubbart n imɣaren, maca ttᵉtten aɣrum am war ssiriden ifassen?” 6 Yarra-dd, inna asen: “Nican inebba Icaɛya xawem, a imnafqen, am mammec tura:

‘Řgens-a iweqqar ayi s iyencicen nnes,

maca uř nsen iggʷej xafi! ◘7:6 Ica. 29:13; Ḥiz. 33:31.

7 Maca nitni cennɛen ayi baṭeř,

minzi sseřmaden tiɣuriwin

tinni d tiweṣṣa n iwdan.’ ◘7:7 Mt. 15:9; Kul. 2:18, 20; Tit. 1:14.

8 Minzi tejjim tawṣeyyet n AREBBI, tᵉṭṭfem di tubbart n iwdan, am useɣḍas n řkisan d teydurin deg ict n tbanyut u aṭṭas n tmesřayin nneɣni am tina.” 9 Inna asen: “Nican aqa tneṭṭařem tawṣeyyet n AREBBI, ḥima ad teqqimem tᵉttᵉṭṭfem di tubbart nwem. 10 Minzi Musa inna: ‘Weqqar babac d yemmac!’, u: ‘Wenni i ɣa ixzan babas niɣ yemmas, ittxeṣṣa as ad immet.’ ◘7:10 Uf. 20:12; 21:17; Lawi 20:9; Aɛwd. 5:16; 27:16; Awřn. 20:20; Afa. 6:2. 11 Maca kenniw teqqarem: ‘Mařa ijj n weryaz inna i babas niɣ i yemmas: Min ma tzemmarem ad zzayi testenfɛem, aqa ggiɣ t d ṣṣedqet!’, 12 ammu war t tᵉttejjim qaɛ ad igg ca i babas d yemmas. 13 Ammu i tesseḥqaram Awař n AREBBI s tubbart nwem i tᵉttsellamem, u tᵉtteggem aṭṭas n tmesřayin am tina.” ◘7:13 Mt. 15:6; 1 Tim. 4:3; 2 Tim. 3:2.

14 Iřaɣa-dd Yasuɛ ɣares marra řɣaci, inna asen: “Sřem-dd ɣari marra uca fehmem man aya mliḥ: ◘7:14 Mt. 15:10. 15 War din uřa d ict n řḥajjet i dd-ittadfen ɣar bnadem zi barra tzemmar ad t tessexmej. Maca min i dd-itteffɣen zi bnadem, aqa man aya issexmaj bnadem. ◘7:15 Řex. 10:15; Rum. 14:17, 20; Tit. 1:15. 16 Wenni ɣar ǧan imezzuɣen i useǧi, ejj i-t ad iseř.”

17 Umi dd-yudef ɣar taddart, iggwej x řɣaci, sseqsan t imeḥḍaren nnes x umedya nni. ◘7:17 Mt. 15:15. 18 Inna asen: “Ma kenniw ɛad břa řefhamet? Ma war tefhimem ca belli marra min ɣa yadfen bnadem zi barra, war izemmar ad t issexmej, 19 minzi man aya war dd-ittidef ca ɣar wuř nnes, maca ɣar uɛeddis, xenni ad iffeɣ ɣar wemcan nnes, ař ittwassizdeg marra macca.” 20 Xenni inna: “Min i dd-itteffɣen zi bnadem d man aya issxemmaj bnadem. 21 Minzi zi daxeř, zeg wuřawen n iwdan i dd-itteffɣen inwayen iɛeffanen: zzina, farq-ccɣeř, tukkarḍa, anɣay, ◘7:21 Amz. 6:5; 8:21; Awřn. 6:14; Irm. 17:9. 22 ṭṭmeɛ, řɣar, taḥraymect, afucceḥ, tiṭṭ taɛeffant, aceqqef, tuffet d tubbuheřya. 23 Marra timesřayin-a tiɛeffanin tteffɣent-i-dd zi daxeř uca ssxemmajent bnadem.”

24 Ikkar ssenni uca iruḥ ɣar temmurt n weymir n Ṣur d Ṣaydun. Řami dd-yudef ɣar ict n taddart, war ixs ad t issen ḥed, waxxa amenni war izemmar ad innuffar. ◘7:24 [Mt. 15:21-28] — Mt. 15:21. 25 Minzi ict n tmeṭṭut, ɣares yeǧis dayes ijj n řaryaḥ d amengus, tesřa xas deɣya. Nettat tusa-dd ɣares, tewḍa as ɣar iḍaren nnes. 26 Tuɣa tamɣart-a d ict n temɣart takafriwt zi temmurt n Finiqiya nni tuɣa d tasɣart n Suriya. Nettat tzawg i-t maḥend ad issuffeɣ cciṭan zeg yeǧis. 27 Maca Yasuɛ inna as: “Ejj iḥenjiren amezwar ad jjiwnen, minzi war ittřiq ad ittwakkes weɣrum n iḥenjiren ḥima ad immenḍar i yiṭan.” 28 Maca nettat tarra-dd, tenna as: “Wah, a Sidi, uřa d iṭan ttᵉtten iřeqqʷaz n iḥenjiren sadu ṭṭabřa.” 29 Inna as Yasuɛ: “Uyur, minzi x ssibbet n wawař-a i tennid, aqa iffeɣ cciṭan zeg yeǧim.” 30 Řami dd-tusa ɣar taddart nnes, tufa yeǧis tezzeř di qama u cciṭan ittwassuffeɣ zzayes.

31 Iffeɣ-dd Yasuɛ ɛawed zi temmurt n Ṣur d Ṣaydun, yiweḍ ɣar řebḥar n Ljalil ɣar ṭṭarf n temmurt n Dikapulis. ◘7:31 Mt. 15:29. 32 Iwyen-dd ɣares ijj n udehcur, itewtaw, uca ttaren zzayes ad xas issars afus nnes. ◘7:32 Mt. 9:32; Lk. 11:14. 33 Issiggʷej i-t zi řɣaci ɣar uɣezdis uca igga as iḍewḍan deg imezzuɣen nnes, issusef uca iḥada iřes nnes. 34 Xenni ixzar ɣar ujenna, izehhar, inna as: “Nurzem!” 35 Řexdenni nnurzmen imezzuɣen nnes uca tefsi tesɣunt n yiřes nnes, ibda issawař nican. 36 Iɛřem asen war t qqaren i ḥed, maca mecḥař ma ten yumur, waxxa amenni tuɣa ssuffuɣen xas řexbar mahu. 37 Uca tbehten s unexřiɛ ařami nnan: “Marra igga i-t mliḥ! Yarra idehcar ttesřan d ignawen ssawařen.” ◘7:37 Amz. 1:31.