1 Yusa-dd ɣari wawař n SIDI, inna: 2 “A mmis n bnadem, siweř ak-d tarwa n řgens nnec, ini asen: ‘Xmi ɣa yawyeɣ ssif x temmurt uca řgens n temmurt ad iksi ijj n weryaz zi ṭṭrufa nnes uca ad t ggen d aɛessas i yixef nsen 3 uca wanita itwařa yusa-dd ssif x temmurt, xenni ittsuḍ deg uyicc n icarri uca iɛeǧem i řgens, 4 uca aqa din ijjen isřa i usuḍi deg uyicc n icarri, maca war ijji ixef nnes ad zzayes ittwaɛřem uca yusa-dd ssif, ikkes i-t, xenni idammen nnes ad iřin x uzeǧif nnes. 5 Netta isřa i řḥess n usuḍi deg uyicc n icarri, maca war ijji ixef nnes ad ittwaɛřem, idammen nnes aqa aten xas, maca řeɛmar n wenni ijjin ixef nnes ad ittwaɛřem, ad injem.

6 Maca mařa aɛessas itwařa ssif yusa-dd uca war isuḍ deg uyicc n icarri, ařami war ittwaɛřem řgens uca ssif yusa-dd, ikkes ijj n řeɛmar jar asen, xenni aqa netta immeksi zi ssibbet n řmuɛṣiyyet n yixef nnes, maca Necc ad ttareɣ idammen nnes zeg ufus n uɛessas.’ ”

7 “Cek, a mmis n bnadem, Necc ggiɣ cek d aɛessas x taddart n Israil. Ad tesřed ijj n wawař zeg uqemmum inu uca ad asen tɛeřmed zzayi. ◘33:7 Ḥiz. 3:1enz. 8 Umi Necc nniɣ i uɛeffan: ‘A aɛeffan, cek ad temmted řmewt!’, u cek war tessiwiřed maḥend ad tɛeřmed i uɛeffan x webrid nnes iweddaren, xenni ad immet uɛeffan nni s řmuɛṣiyyet nnes, maca Necc ad ttareɣ idammen nnes zeg ufus nnec. 9 Maca mařa cek tɛeřmed i uɛeffan x webrid nnes, maḥend ad as iḥeyyed uca netta war iḥeyyed x webrid nnes, xenni netta ad immet s řmuɛṣiyyet nnes, maca cek tessnejmed řeɛmar nnec.”

10 “Cek, a mmis n bnadem, ini i taddart n Israil: ‘Ammu i tessawařem, teqqarem: ‘Iɛeddiyyen nneɣ d ddnub nneɣ aqa aten xaneɣ uca nhellek daysen, xenni mammec ɣa neqqim neddar?’ ◘33:10 Ḥiz. 24:23 11 Ini asen: ‘S tidett am ddareɣ Necc, iqqar Sidi inu, SIDI, ɛemmarṣ war areṭṭiɣ x řmewt n uɛeffan, maca ad arḍeɣ aɛeffan xmi ɣa itub zeg webrid nnes uca ad iddar. Tubem, tubem zeg webriden nwem iɛeffnen, maɣar mayemmi ɣa temmted, a taddart n Israil?’ ” ◘33:11 Ḥiz. 18:23, 32

12 “Cek, a mmis n bnadem, ini i tarwa n řgens nnec: ‘Tasegda n umsegged war t issnejjim deg wass nni di ɣa ixḍa uca tuɛeffna n uɛeffan war zzayes i ɣa inqareḍ deg wass nni di ɣa itub zi tuɛeffna nnes. Amsegged war izemmar ad iqqim iddar s tsegda nnes deg wass nni di ɣa ixḍa.◘33:12 Ḥiz. 18:24 13 Umi nniɣ Necc i umsegged, aqa netta ad iddar s tidett, maca netta ittiqq di tsegda nnes uca igga řmuɛṣiyyet, xenni war tᵉttiři ɛad řidaret di tsegda nnes, maca di řɣecc nnes nni igga, aqa ad dayes immet. 14 Mařa Necc nniɣ i uɛeffan: Řmewt i ɣa temmted!, uca netta itub x ddenb nnes uca ad igg řḥeqq d tsegda, 15 - aqa aɛeffan ad isseɛqeb ddiyyet nnes, ad ixeǧeṣ min ittwacaren, ad yuyur di tweṣṣa n tudart břa ma ad igg řɣecc - xenni ad iddar s tidett, war ittmetti ca. 16 Marra ddnub nni igga, war dd as ttwaḥessben ca. Igga řḥeqq d tsegda, ad iddar s tidett.’ ”

17 “Tarwa n řgens nnec qqaren: ‘Abrid n Sidi inu war iǧi ca nican!’, umi abrid n simant nsen war iǧi ca nican. ◘33:17 Ḥiz. 18:25, 29; 33:20 18 Mařa amsegged iḥeyyed x tsegda nnes uca ittegg řɣecc, xenni ad dayes immet, 19 uca xmi ɣa itub uɛeffan x tuɛeffna nnes uca ad igg řḥeqq d tsegda, xenni ad zzayes iddar. 20 Ɛad teqqarem: ‘Abrid n Sidi war iǧi ca nican!’ Necc ad xawem ḥekmeɣ, a taddart n Israil, kuř ijj am yibriden nnes.”

21 Deg useggʷas wiss tenɛac n lmenfa nneɣ, deg uyur wiss ɛecra, deg wass wiss xemsa n uyur imsar belli yusa-dd ɣari ijj n umarwař zi Urcalim, inna: “Tandint tᵉttwaɣelleb!”◘33:21 2 Ij. 25; Ḥiz. 24:26 22 Ɣar ǧiřet tuɣa afus n SIDI xafi, qbeř dd ɣa yas umarwař u Netta yarzem ayi aqemmum umi dd-yusa umarwař ɣari di ṣṣbeḥ. Tuɣa aqemmum inu ittwarzem uca war ttiřiɣ ɛad d aynaw.

23 Yusa-dd ɣari wawař n SIDI, inna: 24 “A mmis n bnadem, imezdaɣ n řxirbat-a di temmurt n Israil ssawařen, qqaren: ‘Ibrahim tuɣa-t d ijj uca iwart tammurt-a. Neccin řexxu deg waṭṭas, temmewc aneɣ temmurt d tasɣart!’ 25 S uya, ini asen: Ammu i iqqar Sidi inu, SIDI: Kenniw tᵉttetem aysum ak-d idammen uca tessgeɛɛadem tiṭṭawin nwem ɣar imeyḍa n l’aṣnam nwem uca tessizzařem idammen. Ma iɛeddeř ad tᵉṭṭfem kenniw tammurt d řwart? ◘33:25 Amz. 9:4; Lawi 3:17 26 Tettbeddam x ssif nwem, tᵉtteggem jjɛifect u kuř aryaz issxemmaj tamɣart n jjar nnes. Ma iɛeddeř ad tᵉṭṭfem kenniw tammurt d řwart?’ 27 Ammu i d asen ɣa tinid: ‘Ammu i iqqar Sidi inu, SIDI: S tidett am ddareɣ Necc, aqa inni iǧan x řxirbat ad wḍan s ssif, u wenni iǧan x wudem n yeyyar ad t wceɣ i řewḥuc n řexřa maḥend ad t ṣarḍen uca inni iǧan di lqelɛat u deg ifran ad mmten s ṭṭaɛun! 28 Maɣar Necc ad arreɣ tammurt d areddeǧ d ijj n umedya n warjef uca nnfaxet n ṣṣulṭa nnes ad tᵉttwassbedd. Idurar n Israil ad ttwareddǧen ařami war din wi xasen i ɣa iẓwan. 29 Xenni ad ssnen belli Necc d SIDI, xmi ɣa arreɣ tammurt d areddeǧ d ijj n umedya n warjef zi ssibbet n jjɛayef nsen nni ggin.’ ”

30 “Cek, a mmis n bnadem, ayt n řgens nnec ssawařen xak ɣar řeḥyuḍ u ɣar wadaf n tudrin. Ijj issawař ak-d wenneɣni, kuř ijj ak-d umas, uca iqqar: ‘Asem-dd xenni uca sřem man awař i dd iffeɣ zeg uqemmum n SIDI!’ 31 Nitni ad ɣarek dd-asen am mammec i dd-yusa ijj n ubarru n řgens, ad qqimen zzatek am řgens inu uca ad sřen i wawařen nnec, maca war zzaysen tteggen, maɣar s uqemmum nsen ssniɛmiřen tayri, maca uř nsen iggur awarni i řefḍeř n yixef nsen. ◘33:31 Ḥiz. 14:1-3; 20:1-3 32 Uca xzar, aqa cek ɣarsen am wenni ittɣennajen izřan s tmijja teṣbeḥ, amecnaw wenni izemmaren ad igga lmusiqa mliḥ. Nitni ad sřen ɣar wawařen nnec, maca war zzaysen tteggen. 33 Maca řami ad dd-yas aya - xzar, ad dd-yas! - xenni ad ssnen belli tuɣa ijj n unabi di řwesṭ nsen.”