1 Yusa-dd ɣari wawař n SIDI, inna: 2 “Min kenniw yuɣin ařami i ɣa tiwyem awař-a ɣar wudem n temmurt n Israil uca teqqarem: ‘Ibabaten ccin aḍiř asemmaɣ uca tiɣmas n warraw dewřent ḥarecwent’? ◘18:2 Irm. 31:29 3 S tidett am ddareɣ Necc, ammu i iqqar Sidi inu, SIDI: ‘Uct xawem mařa ɛemmarṣ ɛad ad tawyem awař-a di Israil! 4 Xzar, marra řeɛmur inu, am řeɛmar n babas uřa d řeɛmar n mmis inu. Řeɛmar nni ixḍan, ad immet.’ ”

5 “Mařa ca n yijjen d amsegged i yeǧa, ittegg řḥeqq d min iseggden: 6 war ittett ddbayeḥ x idurar, war issgiɛɛid tiṭṭawin nnes ɣar imeyḍa n l’aṣnam n taddart n Israil, war issexmij tamɣart n jjar nnes u war dd-ittqarrib ɣar temɣart nni iɛezzřen umi xas idammen, ◘18:6 Lawi 15:19, 20 ; Ica. 57:7; 65:7 7 war iḥeṣṣar uřa d ijj, ittarra-dd ddiyyet i bu-amarwas, war ittkeccaḍ, wenni iǧuẓen ittic as weɣrum nnes u wenni d aɛaryan issdduri i-t s warruḍ, ◘18:7 Uf. 22:21, 26; Lawi 19:13; 25:14; Aɛwd. 15:7; 24:12; Ica. 58:7; Mt. 25:3 8 netta war yareṭṭeř s arriba niɣ ad iksi arbeḥ, afus nnes itteggʷej x min war iseggden, netta iḥekkem nican jar weryaz d ijj n weryaz nneɣni, ◘18:8 Uf. 22:25; Lawi 25:35, 36 9 iggur di tweṣṣa inu uca iḥeṭṭa lfarayiḍ inu umi ɣa yegg s řaman, xenni aqa netta d amsegged, ad iddar s tidett!’, ammu i iqqar Sidi inu, SIDI. 10 Mařa yejj-dd mmis d aceffar, wenni issizzařen idammen d wenni itteggen icten zi tmesřayin-a, 11 waxxa netta s yixef nnes am babas war ittegg timesřayin-a, maca mmis wanita ittett tiwhibin x idurar, issexmej tamɣart n jjar nnes, 12 iḥeṣṣar řmeskin d umezřuḍ, ittkeccaḍ, war dd-yarri ddiyyet, issgeɛɛad tiṭṭawin nnes ɣar imeyḍa n l’aṣnam, ittegg ict n jjɛifect, 13 yareṭṭeř s arriba, ittᵉṭṭef arbeḥ, ma xenni ad iqqim mmis wanita iddar? War ittɣimi iddar umi igga marra jjɛayef nni. Ad ittwaneɣ nican, idammen nnes ad xas iřin.”

14 “Xzar, mařa ad dd-yejj mmis nni ittwařa marra ddnub nni ittegg babas uca ixezzar waha am netta s yixef nnes war ittegg timesřayin nni, 15 ixs ad yini war ittett x idurar, war issgiɛɛid tiṭṭawin nnes ɣar imeyḍa n l’aṣnam n taddart n Israil, war issexmij tamɣart n jjar nnes, 16 war iḥeṣṣar uřa d ijj, war imenneɛ ddiyyet, war ittkeccaḍ, ittic aɣrum nnes i wenni iǧuẓen, issdurruy i uɛaryan s warruḍ, 17 ittaggʷej s ufus nnes x umezřuḍ, war ikessi arriba d warbeḥ, ittegg s tsegda uca iḥeṭṭa tiweṣṣa inu, aqa mmis wanita war ittmetti zi ssibbet n řmuɛṣiyyet n babas, ad iddar s tidett. 18 Babas ad immet di řmuɛṣiyyet nnes, x umi igga bezzez x iwdan s řexcunet, ikecceḍ agřa uca igga min war iḥřin di řwesṭ n řgens nnes.”

19 “Maca kenniw teqqarem: ‘Mayemmi mmis war ikessi řmuɛṣiyyet n babas? Minzi mmis tuɣa ittegg řḥeqq d tsegda uca iḥḍa marra tiweṣṣa inu uca igga i-tent, netta ad iqqim iddar s tidett. ◘18:19 Aɛwd. 24:16; 2 Ij. 14:6; 2 Im. 25:4 20 Řeɛmar nni ixḍan, ad immet. Mmis war ikessi ca řmuɛṣiyyet n babas uca babas war ikessi ca řmuɛṣiyyet n mmis. Tasegda n umsegged ad tiři x yixef nnes u tuɛeffna n uɛeffan ad tiři x yixef nnes. 21 Maca mařa aɛeffan idweř-dd zi ddnub nni igga, ad iḥḍa marra tiweṣṣa inu uca ad yegg řḥeqq d tsegda, xenni ad iqqim iddar s tidett, war ittmetti ca. 22 Marra iɛeddiyen nnes nni igga, war d as ttwaḥessben ca. S tsegda nnes nni igga, ad iddar. 23 Ma ad arḍiɣ s tidett řmewt n iɛeffanen?’, iqqar Sidi inu, SIDI. ‘Ma netta war ittɣimi iddar xmi dd ɣa idweř? ◘18:23 Ḥiz. 33:11 24 Maca mařa amsegged iḥeyyed x tsegda nnes uca ad igg ddeǧ ɛlaḥsab marra jjɛayef nni ittegg uɛeffan, ad igg amenni uřa d netta, ma xenni ad iqqim iddar? War tᵉttwaɛqiř ɛad marra tasegda nni igga. S řeɣdaret nnes i zi iɣdar u s ddnub nnes i zi iddenb, s yina ad immet.’ ”

25 “Teqqarem ɛawed: ‘Abrid n Sidi war iǧi ca nican!’. Sřem, a taddart n Israil, ma abrid inu war iǧi nican? Ma war ǧin s tidett aqa ibriden nwem war seggmen? ◘18:25 Ḥiz. 33:17, 20 26 Mařa iḥeyyed umsegged x tsegda nnes uca ittegg ddeǧ u s man aya ad immet, xenni ad immet di ddeǧ nnes nni igga. 27 Maca mařa idweř-dd uɛeffan zi tmegga nnes tiɛeffanin nni igga uca ad igg řḥeqq d tsegda, xenni ad yarr řeɛmar nnes ad iqqim iddar. 28 Idweř ittwařa uca idweř-dd zi marra iɛeddiyen nnes nni igga. Ad iddar s tidett, war ittmetti ca. 29 Inni zi taddart n Israil yarennan qqaren: ‘Abrid n Sidi war iseggem!’ Ma ibriden inu war seggmen, a taddart n Israil? D tidett ma war ǧin ibriden nwem war seggmen?” 30 “S uya Necc ad xawem carrɛeɣ, a taddart n Israil, kuř ijj anect ibriden nnes, iqqar Sidi inu, SIDI. Ɛeqbem, dewřem-dd zi marra iɛeddiyen nwem, xenni war tᵉttiři řmuɛṣiyyet nwem d taɛenkrift i dd-yiwyen řmuɛṣiyyet i kenniw. ◘18:30 Mt. 3:2 31 Nḍarem řmuɛṣiyyet nwem i zi tɛeddam. Ggem uř nwem d amaynu u buḥbeř nwem d amaynu. Maɣar i ɣa temmtem, a taddart n Israil? ◘18:31 Irm. 32:39; Ḥiz. 11:19; 36:26 32 Minzi Necc war arḍiɣ di řmewt n wenni ittxeṣṣa ad immut, ammu i iqqar Sidi inu, SIDI, dewřem-dd uca ddarem.” ◘18:32 Ḥiz. 33:11