1 “Xmi ɣa yawi ijj n weryaz ict n temɣart uca imřec akides uca war d as teɛjib umi dayes yufa ca n řefḍiḥet, uca xenni ad as yari tabrat n weǧaf, ad as tt iwc deg ufus nnes uca ad tt issufeɣ zi taddart nnes, ◘24:1 Mt. 5:31; 19:7; Mk. 10:4 2 uca xenni teffeɣ nettat zi taddart nnes, truḥ uca tedweř d tamɣart ɣar ijj n weryaz nneɣni, 3 uca aryaz aneggaru icarh i-tt, ad as yari tabrat n weǧaf uca ad as tt iwc deg ufus nnes uca ad tt issekk zi taddart nnes, niɣ aryaz aneggaru nni i-tt yiwyen d tamɣart nnes, immut, 4 xenni war iɛeddeř i weryaz nnes amezwaru, wenni d as iṭellqen, ad tt yegg ɛawed d tamɣart i yixef nnes, awarni umi tᵉttwassexmej nettat, minzi man aya d jjɛifect zzat i wudem n SIDI. War iɛeddeř ad tessiwiḍ ddenb x temmurt i d ac iwca SIDI, AREBBI nnec, d řwart.”

5 “Xmi ijj n weryaz tuɣa am imřec, xenni war itteffeɣ ca ak-d řɛeskar u war xas tᵉttwagg uřa d ict n tmesřact. Ad yiři ijj n useggʷas i taddart nnes waha u ad issfarḥ tamɣart nnes i yiwi i yixef nnes.” ◘24:5 Aɛwd. 20:7

6 “War iɛeddeř ad teksid iẓra n tsirt s tnayen d aḍman, niɣ aẓru nni zzaysen ittenhezzan waha, minzi aqa xenni ad yiři řeɛmar d aḍman.”

7 “Mařa ittwaf ijj n weryaz yucar ca n yijj zeg wawmaten nnes, zeg ayt n Israil, uca netta yarra i-t d ismeɣ uca izzenz i-t, xenni ad immet uceffar nni. Ittxeṣṣa ad tekksed řɣar zi řwesṭ nnec.” ◘24:7 Uf. 21:16

8 “Xmi din teǧa jjriḥect n řbarṣ, ḥḍa ad teḥḍid u ad tegged nican ɛlaḥsab marra min d ac ɣa ssřemden ikehhanen Ilawiyyen. Ad teḥḍam maḥend ad teggem marra am mammec ten umureɣ. ◘24:8 Lawi 13:2 9 Idar min igga SIDI, AREBBI nnec, ak-d Maryam deg webrid umi dd-teffɣem zi Miṣra.”◘24:9 Řxř. 12:10

10 “Mařa tarḍřed ca i jjar nnec, xenni war ttidef ɣar taddart nnes ḥima ad zzayes teksid ca d aḍman i yixef nnec. 11 Ad teqqimed barra uca aryaz i umi tarḍřed ad ac dd-yawi ddiyyet ɣar barra. 12 Mařa tuɣa d aryaz d amezřuḍ, xenni war ttᵉttnusi deg werhan nnes amecnaw i yeǧa d tassut nnes. 13 Ad as dd-tarred ddiyyet nni nican ɣar uɣeǧi n tfuct, ḥima ad iṭṭeṣ di tassut nnes uca ad ac ibarek. Man aya ad ac tiři d tasegda zzat i wudem n SIDI, AREBBI nnec.”◘24:13 Uf. 22:26

14 “War sḥissfem acewwař ameḥdaj amezřuḍ zeg aytmac niɣ zeg ibarraniyyen i izeddɣen di temmurt nnec u daxeř i tewwura nnec. ◘24:14 Lawi 19:13; Yaɛ. 5:4 15 Ad as tewced řmunet nnes kuř ass. War xas tɣeǧi tfuct x man aya, minzi netta d amezřuḍ uca immeẓri dayes, ḥima netta war ittřiɣi i SIDI di ssibbet nnec uca ad dayek yiři ddenb.”

16 “Ibabaten war ttwaneqqen di ssibbet n iḥenjiren nsen u iḥenjiren war ttwaneqqen di ssibbet n ibabaten nsen. Kuř ijj ad ittwaneɣ di ssibbet n ddenb nnes.”◘24:16 2 Ij. 14:6; 2 Im. 25:4; Irm. 31:30; Ḥiz. 18:20

17 “War sfarraɣ řeḥkam n ubarrani d uyujiř niɣ ad teksid arruḍ n tajjač d aḍman.◘24:17 Uf. 22:21, 22; Awřn. 22:22; Ica. 1:23; Irm. 5:28; 22:3; Ḥiz. 22:29; Zak. 7:10 18 Ad tɛeqřed belli tuɣa cek d ismeɣ di Miṣra uca aqa SIDI, AREBBI nnec, ifdi cek ssenni. X uya necc ttumureɣ cek ad tegged man aya. ◼24:18 ifdi - xzar Izhd. 78:35. 19 Xmi tmejjared ṣṣabet nnec deg iyyar nnec uca tᵉttud ca n tqebbiḍt deg iyyar, xenni war dd-tᵉddikkʷiřed maḥend ad tt teksid. Ad tiři d tasɣart i ubarrani, i uyujiř u i tajjač, ḥima ad cek ibarek SIDI, AREBBI nnec, di marra řxedmet n ifassen nnec.◘24:19 Lawi 19:9; 23:22 20 Xmi ɣa tẓewḍed tacejjart nnec n zzitun, war ttic taynit ɛad i min iqqimen awarni ac. D man aya i ɣa yiřin i ubarrani, i uyujiř u i tajjač. 21 Awarni řami třeqḍed aḍiř n umarjeɛ nnec n uḍiř, war arezzu ad třeqḍed min iqqimen awarni ac ɛawed. Aqa man aya ad yiři i ubarrani, i uyujiř u i tajjač. 22 Ad tɛeqřed belli tuɣa cek d ismeɣ di temmurt n Miṣra. X uya necc ttumureɣ cek ad tegged man aya.”