1 Issiweř SIDI ak-d Musa, inna:

2 “Siweř ak-d ayt n Israil uca ini asen: ‘Řeɛyudat ittwaggen n SIDI, inni x ɣa tbarrḥem, ad iřin d imuniten iqeddsen, aqa atent d řeɛyudat inu ittwaggen. 3 Setta n wussan ad txedmem, maca deg wass wiss sebɛa ad yiři d ssebt, arraḥet imun, ijj n umuni iqeddsen. Ittxeṣṣa war dayes txeddmem. Aqa d ssebt i SIDI di marra tizeddiɣin nwem. ◘23:3 Uf. 20:9; 23:12; Aɛwd. 5:13; Lk. 13:14

4 Aqa d ina d řeɛyudat ittwaggen n SIDI, imuniten iqeddsen, inni i ɣa tbarrḥem deg wussan nsen ittwaggen.

5 Deg uyur amezwaru, deg wass wiss arbeɛṭac n uyur, jar beddu n wezyen n wass ař dd-tewḍa tmeddit, ad tiři d Tɣarṣt n Useɛdu n SIDI. ◘23:5 Uf. 12:18; 23:15; Řxř. 28:16; Aɛwd. 16:1 6 Deg wass wiss xemmesṭac n uyur nnit, ad yiři d Řɛid n Weɣrum břa Antun i SIDI. Sebɛa n wussan ad teccem aɣrum břa antun. 7 Ass amezwar ad teggem ijj n umuni iqeddsen. War tteggem uřa d ict n řxedmet i ittxeṣṣan ad tᵉttwagg. 8 Sebɛa n wussan kemmřen ad tawyem ict n tewhibt n tmessi i SIDI uca deg wass wiss sebɛa ad din yiři ijj n umuni iqeddsen. War tteggem uřa d ict n řxedmet i ittxeṣṣan ad tᵉttwagg.’ ”

9 Issiweř SIDI ak-d Musa, inna:

10 “Siweř ak-d ayt n Israil, ini asen: ‘Mařa tiwḍem ɣar temmurt nni d awem ɣa wceɣ uca ad temjarem ṣṣabet nnes, xenni ad tawyem ict n tqebbiḍt zi tmezwarut n ṣṣabet nwem ɣar ukehhan. 11 Uca netta ad issenhezz taqebbiḍt nni zi ssa ɣar da zzat i wudem n SIDI, maḥend ad tᵉttwaqebřem s arḍa. Di tuffut awarni ssebt ad tt issenhezz ukehhan. 12 Deg wass min di i ɣa tenhezzem taqebbiḍt, ad tesswejdem ɛawed ijj n izmar icnan qaɛ n ijj n useggʷas am yict n tɣarṣt n wecmaḍ i SIDI. 13 Ad tiři tewhibt n řɣiǧet zi tnayen n teɛcuray n ijj n ifa n waren azdad ixeǧḍen s zzect, aqa-tt d ict n tewhibt n tmessi s ict n řefwaḥet ittfuḥen i SIDI, u tawhibt nnes n useyyeb ad tiři d binu, ijj n arbeɛ zeg ijj n uhinu. 14 War ttᵉttem aɣrum uřa d tidrin yurfen niɣ tizizawin ař ass min di dd-tiwyem tawhibt nwem ɣar AREBBI. Aqa-tt d ict n tewṣeyyet i řebda i marra jjiřat nwem mani ma tzeddɣem.

15 Awarni as ad tḥesbem s řmeqřub i yixef nwem zi ṣṣbeḥ awarni i ssebt, zeg wass min di dd-tiwyem taqebbiḍt n tewhibt n wenhezzi: ittxeṣṣa ad iřin sebɛa n wussan n ssebt kemmřen. ◘23:15 Aɛwd. 16:9, 10 16 Ad tḥessbem xemsin n wussan ař tuffut n ssebt wiss sebɛa. Xenni ad tawyem ict n tewhibt n řɣiǧet n jdid i SIDI. 17 Ad dd-tawyem tnayen n tecnifin n weɣrum i wenhezzi zeg imucan mani tzeddɣem. Ad iřint zi tnayen n teɛcuray n yijj n ifa n waren azdad, ggwint s wentun. Aqa atent d timenza i SIDI. 18 Kenniw ad dd-tessqarrbem ak-d weɣrum ɛawed sebɛa n izmaren cnan qaɛ n ijj n useggʷas d ijj n ufunas - ameẓyan n tfunast - d tnayen n icarriyyen. Ad iřin i tɣarṣt n wecmaḍ i SIDI ak-d tewhibt nsen n řɣiǧet d tewhibin nsen n useyyeb, aqa d ict n tewhibt n tmessi s ict n řefwaḥet ittfuḥen i SIDI. 19 Ad tesswejdem ɛawed ijj n umyan zeg iɣayḍen d taɣarṣt n ddenb u tnayen n izmaren n ijj n useggʷas d tɣarṣt n řehna. 20 Ad ten issenhezz ukehhan ak-d weɣrum n tamenzut zi ssa ɣar da am yict n tewhibt n wenhezzi zzat i wudem n SIDI, uřa d tnayen n izmaren. Ad iřin qeddsen i SIDI, i ukehhan. 21 Deg wass nnit ad tbarrḥem i yijj n umuni iqeddsen. War tteggem uřa d ict n řxedmet i ittxeṣṣan ad tᵉttwagg. Aqa-tt d ict n tewṣeyyet i řebda mani ma i ɣa tzedɣem i marra jjiřat nwem.

22 Xmi ɣa temjarem řɣiǧet n temmurt nwem, war mejjar ař aneggar n ṭṭarf n yeyyar nnec, u min iqqimen n řɣiǧet nnec war t tkessed ca. Ittxeṣṣa ad tejjem cwayt i umezřuḍ u i ubarrani. Necc d SIDI, AREBBI nwem!’ ” ◘23:22 Lawi 19:9; Aɛwd. 24:19

23 Issiweř SIDI ak-d Musa, inna:

24 “Siweř ak-d ayt n Israil, ini asen: ‘Deg uyur wiss sebɛa, deg wass amezwaru n uyur, ad yiři d ssebt i kenniw, ijj n wass n řidaret ak-d usuḍi s wesruddeḥ deg uyicc n icarri, ijj n umuni iqeddsen. ◘23:24 Řxř. 29:1 25 War tteggem uřa d ict n řxedmet i ittxeṣṣan ad tᵉttwagg. Ad dd-tesqarrbem ict n tewhibt n tmessi i SIDI.’ ”

26 Issiweř SIDI ak-d Musa, inna:

27 “Deg wass wiss ɛecra n uyur wiss sebɛa ad yiři d Ass n Weṣřaḥ. Ad teggem ijj n umuni iqeddsen i kenniw. Ad tesswaḍɛem ixef nwem uca ad tqeddmem ict n tewhibt n tmessi i SIDI. ◘23:27 Lawi 16:29,31; Řxř. 29:7 28 War tteggem uřa d ict n řxedmet deg wass nni nnit, minzi aqa-t d Ass n Weṣřaḥ, maḥend ad ittwagg weṣřaḥ i kenniw zzat i wudem n SIDI, AREBBI nwem. 29 Minzi marra bnadem nni war isswaḍɛen ixef nnes deg wass nni nnit, ad ittwaqess zi řgens nnes. 30 Kuř bnadem nni i ɣa iggin ca n řxedmet deg wass nni nnit, Necc ad teḥḥiɣ bnadem nni zi řwesṭ n řgens nnes. ◼23:30 bnadem - s Tɛibranit ‘řeɛmar’. 31 War tteggem uřa d ict n řxedmet. Aqa-tt d ict n tewṣeyyet i řebda i marra jjiřat nwem mani ma i ɣa tzedɣem. 32 Ad yiři d ijj n ssebt n arraḥet tmun i kenniw. Ad iřin řeɛmur nwem ḥṣaren. Deg wass wiss tesɛa n uyur, di ǧiřet, zeg uɛecci ɣar uɛecci nneɣni ad teḥḍam arraḥet nwem n ssebt.”

33 Issiweř SIDI ak-d Musa, inna:

34 “Siweř ak-d ayt n Israil uca ini: ‘Deg wass wiss xemmesṭac n uyur wiss sebɛa ad yiři d Řɛid n Iɛuccuten i SIDI, sebɛa n wussan. ◘23:34 Uf. 23:16; Řxř. 29:12; Aɛwd. 16:15 35 Deg wass amezwaru ad yiři yijj n umuni iqeddsen. War tteggem uřa d ict n řxedmet i ittxeṣṣan ad tᵉttwagg. 36 Sebɛa n wussan ad tqeddmem tiwhibin n tmessi ɣar SIDI. Deg wass wiss tmenya ad din yiři yijj n umuni iqeddsen uca ad tawyem ict n tewhibt n tmessi i SIDI. Aqa d ijj n umuni ifarzen d amqeddes, war tteggem uřa d ict n řxedmet i ittxeṣṣan ad tᵉttwagg. ◘23:36 Yḥ. 7:37

37 Tina d řeɛyudat ittwaggen n SIDI, tinni zi ɣa tbarrḥem d imuniten iqeddsen, maḥend ad tqeddmem ict n tewhibt n tmessi ɣar SIDI, ict n tɣarṣt n wecmaḍ d ict n tewhibt n řɣiǧet, ict n tewhibt i tɣarṣt d tewhibin n useyyeb, kuř ass min ittwaggen i wass nni, 38 barra i tɣarṣa nwem n wussan n ssebt n SIDI d tewhibin nwem n lwuɛud nwem d tewhibin nwem s řxaḍar, inni tᵉttnumem ad tent tewcem i SIDI. 39 Maca deg wass wiss xemmesṭac n uyur wiss sebɛa, xmi ɣa tessmunem řɣiǧet n temmurt, xenni ad tɛeyydem Řɛid n SIDI, sebɛa n wussan. Deg wass amezwaru ad yiři yijj n wass n ssebt uřa deg wass wiss tmenya ad din yiři yijj n wass n ssebt. 40 Deg wass amezwaru ad teksim řɣiǧet n tcejjura icewwaren: tiseḍwin n tini d tiseḍwin n tcejjura s tefray aṭṭas d tseḍwin n tcejjart n tnemřač n tɣezratin. Sebɛa n wussan ad tfarḥem zzat i wudem n SIDI, AREBBI nwem. ◼23:40 tacejjart n tnemřač - s Tɛibranit ‘tacejjart n yeɣzar’. 41 Ad tɛeyydem Řɛid n Iɛuccuten sebɛa n wussan deg useggʷas i SIDI. Aqa-tt d ict n tewṣeyyet i řebda i marra jjiřat nwem. Ad t tɛeyydem deg uyur wiss sebɛa. 42 Ad tzedɣem sebɛa n wussan deg iɛuccuten. Marra inni dd-ittwaxeřqen di Israil ad zedɣen deg iɛuccuten, 43 ḥima ad ssnen marra jjiřat nwem, belli Necc ggiɣ ad zedɣen ayt n Israil deg iɛuccuten, umi ten ssuffɣeɣ zi temmurt n Miṣra. Necc d SIDI, AREBBI nwem!’ ”

44 Ammu i issiweř Musa ak-d ayt n Israil x řeɛyudat ittwaggen n SIDI.