1 Issiweř SIDI ɣar Musa, inna:

2 “Siweř ak-d marra tamesmunt n ayt n Israil uca ini asen: ‘Ittxeṣṣa ad tiřim d imqeddasen, minzi Necc d SIDI, AREBBI nwem, aqa ayi d amqeddas! ◘19:2 Lawi 11:44; 20:7, 26; 1 Bṭ. 1:16 3 Kuř ijj ad iweqqar yemmas d babas uca ussan inu n ssebt ad ten teḥḍam, Necc d SIDI, AREBBI nwem!◘19:3 Uf. 20:12; 31:13; Lawi 26:2 4 War ddikkʷiřem ɣar l’aṣnam u war tteggem i yixef nwem řexyařat ifesyen d irebbiten. Necc d SIDI, AREBBI nwem! ◘19:4 Uf. 34:17 5 Xmi ɣa tqeddmen taɣarṣt n řehna i SIDI, xenni ad tt tqeddmem s ijj n webrid i zi ɣa tᵉttwaqebřem s arḍa. 6 Ittxeṣṣa ad tᵉttwacc deg wass n tɣarṣt nwem uřa di tiwecca awarni as. Min iqqimen ař wass wiss třata ad ittwassecmeḍ s tmessi. ◘19:6 Lawi 7:16 7 Mařa tᵉttwacc ɛad deg wass wiss třata, ad tiři d jjɛifect, war tᵉttwaqebbeř s arḍa. 8 Wi zzayes ɣa iccen ad yarbu řmuɛṣiyyet nnes, minzi issexsara min iǧan d amqeddas n SIDI uca xenni ad ittwaqess bnadem nni zi řgens nnes.

9 Mařa temjarem ṣṣabet n temmurt nwem, war mejjar cek iyyar nnec ař aɣezdis aneggar niɣ ad tjemɛed min iqqimen awarni tameyra nnec. ◘19:9 Lawi 23:22; Aɛwd. 24:19 10 War řeqqeḍ uḍiř n umarjeɛ nnec kuřci, war ḥruw marra min din iqqimen di temmurt deg umarjeɛ nnec n uḍiř. Ad tejjed aya i umezřuḍ u i ubarrani, Necc d SIDI, AREBBI nwem!

11 War ttacar u war ssxarriq, uřa d ijj ad icmet jjar nnes. ◘19:11 Uf. 20:15 12 War ttjaǧam ẓur s Yisem inu. War ssexsara Isem n AREBBI nnec. Necc d SIDI.◘19:12 Uf. 20:7; Aɛwd. 5:11

13 War ssḥissif jjar nnec niɣ ad t tacared. War ttᵉṭṭef řmunet n icewwařen zi ǧiřet ař tiwecca. ◼19:13 war ttᵉṭṭef - nican zi Tɛibranit ‘war ttnusi’.  ◘19:13 Aɛwd. 24:14; Yaɛ. 5:4 14 War ttekkʷar adehcur u war ttegg ca min di ɣa inqareḍ udarɣař, maca ittxeṣṣa ad teggʷeded AREBBI, Necc d SIDI!

15 Ɣar weḥkam war ttɣeccim. War sɛizzi amezřuḍ u war sɛeddu ɣar bu-txuba. Ittxeṣṣa ad tḥekmed x jjar nnec s usegged. ◘19:15 Aɛwd. 1:17; 16:19; Awřn. 24:23 16 War ggur jar řgens nnec s unemmem, war ttbeddi x idammen n jjar nnec, Necc d SIDI! ◘19:16 Uf. 23:1

17 War carreh umac deg wuř nnec. Ad tɛeřmed aɛřam i jjar nnec u war tkessid ddenb xak zi ssibbet nnes. ◘19:17 Mt. 18:15; Lk. 17:3; 1 Yḥ. 2:9, 11; 3:15 18 War ttentiqim niɣ ad txemmřed antaqem x tarwa n řgens nnec. Ad texsed jjar nnec amecnaw ixef nnec, Necc d SIDI.◘19:18 Mt. 5:39,43,44; 22:39; Lk. 6:27; Rum. 12:19; 13:9; 1 Kur. 6:7; Gal. 5:14; 1 Ts. 5:15; 1 Bṭ. 3:9; Yaɛ. 2:8

19 Ad teḥḍam tiweṣṣa inu. War ttřeqqam ca řebhimet nnec ak-d ijj n marka nneɣni. War zarreɛ tnayen n markat n zzariɛet deg iyyar nnec u war yarreḍ arruḍ ittwaggen s tnayen n markat n ukettan. ◘19:19 Aɛwd. 22:9, 11

20 Mařa aryaz iṭṭeṣ ak-d ict n temɣart, ict n tayya ixḍeb i-tt yijj n weryaz nneɣni, maca war ittwaxeǧeṣ ɛad ttaman nnes n ufekki niɣ temmewc as třelli, xenni ad yiři řeḥsab, maca war ttwaneqqen ca, minzi nettat tuɣa ɛad war tᵉttwaḥar ca. 21 Netta ad yawi taɣarṣt n umarwas nnes i SIDI ɣar wadaf n Uqiḍun n Umsagar, ijj n icarri am tɣarṣt n umarwas. 22 Akehhan ad xas igg aṣřaḥ s icarri n tɣarṣt n umarwas zzat i wudem n SIDI i ddenb nnes i igga uca ddenb nnes i igga ad as ittwaɣfar. ◼19:22 ifdi - xzar Izhd. 78:35.

23 Xmi ɣa tawḍem di temmurt uca teẓẓum ɛřam kuř ticejjura, maḥend ad zzaysent teccem, xenni war txettnem ‘řeɛdařyet nnes’, tenni d řɣiǧet nnes. Třata n iseggʷusa war tent txettnem, war zzaysent ttettem ca. 24 Deg useggʷas wiss arebɛa ad tiři marra řɣiǧet nnes tqeddes, i usemɣar i SIDI. 25 Deg useggʷas wiss xemsa ad teccem řɣiǧet nnes uca ṣṣabet nnes ad tt tewcem i yixef nwem. Necc d SIDI, AREBBI nwem!

26 War ttettem ca ak-d idammen. War iɛeddeř ad tgezznem niɣ ad tceɣřem ixef nwem s tbezgiwt. 27 War ttḥeffim acuwwaf n uzeǧif nwem deg wenneḍ nnes u war ttḍeyyiɛem ca tma n tmart nwem. ◘19:27 Lawi 21:5; Irm. 9:25; 25:23; 49:32 28 War iɛeddeř ad tcarḍem arrimet nwem zi ssibbet n yijj n umettin niɣ ad tarecmem tiggaz di arrimet nwem. Necc d SIDI! ◘19:28 Aɛwd. 14:1

29  War sdeǧi yeǧic, ad tt tarred d tamɣart n farq-ccɣeř, ḥima war tweṭṭi temmurt di farq-ccɣeř uca xenni ad teccur temmurt s řefḍiḥet. 30 Ad teḥḍam ussan inu n ssebt uca ad tweqqarem Zzawect inu Iqeddsen. Necc d SIDI! 31 War ttdikkwiřem ɣar yinni issawařan ak-d imettan u ɣar igezzanen, war ɣarsen arezzfem, ḥima ad zzaysen tᵉttwaxemjem. Necc d SIDI, AREBBI nwem! ◘19:31 Lawi 20:6

32 Ad tekkared i wenni ɣar iǧa ucuwwaf icab uca ad tweqqared udem n iwessura uca ad teggʷeded AREBBI nnec. Necc d SIDI!

33 Xmi kidek ɣa izdeɣ ijj n ubarrani di temmurt nwem, war t ttḍeǧmem. ◘19:33 Uf. 22:21 34 Abarrani, wenni ɣarwem izeddɣen, ad awem yiři am yijjen zi tarwa n temmurt nwem. Ad t texsed am yixef nnec, minzi tuɣa kenniw d ibarraniyyen di temmurt n Miṣra. Necc d SIDI, AREBBI nwem!

35 Xmi ɣa tiřim ɣar weḥkam war ttɣeccem ca s řeɛbar n tuzzeggart niɣ n ddqeř niɣ s řeɛbar n min dayes. 36 Ad ɣarwem yiři d ijj n řmizan nican d iẓra n řmizan nican uřa d ijj n ifa nican d ijj n uhinu nican, Necc d SIDI, AREBBI nwem, wenni kenniw dd-issuffɣen zi temmurt n Miṣra. ◘19:36 Awřn. 11:1; 16:11; 20:10 37 Ad teḥḍam marra tiweṣṣa d řumur inu uca ad ten teggem. Necc d SIDI!’ ”