Adlis Iqeddsen Awařen Iweznen 20

1 Binu d ijj n umestehziy,

ccrab d bu-ssḍeɛ,

kuř ijjen wenni zzayes i ɣa iweddaren,

ɛemmarṣ war iddikkwiř d amiɣis.

2 Ahuddi n ujeǧid am zzhir n wayrad:

wenni t isseɛaren,

ixeṭṭa ak-d řeɛmar nnes.◘

3 Asmaḥ deg umcubbec

aqa d ccan i weryaz,

maca kuř abuhaři ad idduqqez. ◘

4 Zi řweqt n řexrif war icarrez umeɛguz,

xenni ad ittar di řweqt n tmeyra,

maca war ittif walu.

5 Ixarriṣen deg wuř n bnadem

aman yuǧɣen,

maca ijj n weryaz s řefhamet

issen ad ten yayem. ◘

6 Aṭṭas n iwdan ttřaɣan x ca n ijjen

‘ameddukkeř nsen d amtiqqi’,

maca aryaz d amtiqqi,

man wen t i ɣa yafen?

7 Amsegged iggur di řeṣfayet nnes,

sseɛd n iḥenjiren nnes

i ittejja awarni as.

8 Ijj n ujeǧid nni ittɣiman

x řkursi n ccreɛ,

ittṣeffa marra řɣar s tiṭṭawin nnes. ◘

9 Wi izemmaren ad yini:

“Necc ssizedgeɣ uř inu,

necc izdigeɣ zi ddnub inu!”? ◘

10 Ijj n řewzen d ijj n řewzen nneɣni,

ijj n ifa d ijj n ifa nneɣni,

aqa aten s tnayen idsen d nnɛi i SIDI. ◘

11 Aḥudri isscana di tmegga nnes,

ma řxedmet nnes teṣfa

niɣ aqa nican i teǧa.

12 Amezzuɣ ittesřan d tiṭṭ ittwařan,

SIDI igga i-ten s tnayen idsen. ◘

13 War ttexs iḍeṣ

maḥend war teddikkwiřed d amezřuḍ,

arzem tiṭṭawin nnec,

syiwen ixef nnec s weɣrum. ◘

14 ‘War iḥři, war iḥři!’, iqqar umsewweq,

maca mařa yuyur,

ammu i ittcenneɛ ixef nnes.

15 Ureɣ iǧa, uřa d aṭṭas n řmarjan,

maca iyencicen ccuren s tussna

d ict n řqecɛet iɣřan aṭṭas. ◘

16 Mařa ijjen iddakkwař

d aḍman i yijj n ubarrani,

xenni ksi arruḍ nnes u ksi t d ddiyyet

i yinni war ittwassnen. ◘

17 D amiẓid i bnadem aɣrum

nni iṭṭef s ixarriqen,

awarni as ad iccur uqemmum nnes

s iqayasen. ◘

18 Ixemmimen ttekmiřen s ucawar,

x uyenni ndeh amenɣi s udebbar. ◼

19 Wenni igguren da d diha s texbarjit,

ittɛarra min innuffaren,

war tsebbeb ak-d wenni issḥinniben

s iyencicen nnes iṣebhen. ◘

20 Wenni i ɣa ineɛřen x babas d yemmas,

řefnar nnes ad ittwassexsi

di taǧest tabarcant. ◘

21 Mařa tasɣart tᵉttwakseb deɣya

s tazřa deg umezwaru,

war dd-tiweḍ d lbaraka ɣar uneggar. ◘

22 War qqar: “Necc ad xeřfeɣ řɣar!”

maca tceř x SIDI u Netta ad cek issenjem. ◘

23 Ijj n řewzen d ijj n řewzen nneɣni,

aqa aten d nnɛi i SIDI,

řmizanat iɣeccen war ǧin ca mliḥ. ◘

24 Iṣuraf n ijj n weryaz aqa aten n SIDI,

xenni mammec ɣa yegg bnadem

ad issen abrid nnes? ◘

25 Aqa-t d řfex i bnadem

i ɣa iřaɣan s uqeǧeq ‘amqeddes’,

u ɛad awarni lwuɛud nnes i igga

ad ixarreṣ.

26 Ijj n ujeǧid amiɣis ittṣeffa iɛeffanen,

ittejja tajarrart

n teřwiḥt itteḥřuǧuḍen i usarwet

ad xasen iɛqeb.

27 Twarrit n nnefs n buḥbeř n bnadem

d řefnar n SIDI nni yarezzun

di daxeř n ixxamen n uɛeddis.

28 Tamexsiwt icewwaren d řaman

ḥeṭṭan ajeǧid,

u řɛarc nnes issejhed i-t

s tmexsiwt icewwaren.

29 Talwizt n iḥudriyyen d jjehd nsen,

u lɛaḍama n iwessura d acuwwaf icaben. ◘

30 Iyezzimen ittazzřen s idammen

ssizdigen bnadem zi řɣar,

u tiyyita ṣeffant uřa d takrict.◘

◘20:2 20:2 Awřn. 16:14; 19:12

◘20:3 20:3 Awřn. 17:14

◘20:5 20:5 Awřn. 18:4

◘20:8 20:8 Awřn. 20:26

◘20:9 20:9 1 Ij. 8:46; Ayub 14:4; Izhd. 51:7; Amb. 7:20; 1 Yḥ. 1:8

◘20:10 20:10 Aɛwd. 25:13; Awřn. 11:1; 20:23

◘20:12 20:12 Uf. 4:11; Izhd. 94:9

◘20:13 20:13 Awřn. 19:15

◘20:15 20:15 Awřn. 3:14, 15

◘20:16 20:16 Awřn. 11:15; 27:13

◘20:17 20:17 Awřn. 9:17

◼20:18 20:18 Ixemmimen - niɣ ‘inwayen’ niɣ ‘inekkwan’ niɣ ‘ixarriṣen’.

◘20:19 20:19 Awřn. 11:13

◘20:20 20:20 Uf. 21:17; Lawi 20:9; Aɛwd. 27:16; Mt. 15:4

◘20:21 20:21 Awřn. 13:11; 28:20

◘20:22 20:22 Aɛwd. 32:35; Awřn. 17:13; 24:29; Rum. 12:17; 1 Ts. 5:15; 1 Bṭ. 3:9

◘20:23 20:23 Awřn. 20:10

◘20:24 20:24 Ayub 31:4; Izhd. 37:23; 139:2, 3; Irm. 10:23

◘20:29 20:29 Awřn. 16:31

◘20:30 20:30 Awřn. 10:13