1 Wenni tuɣa din zeg umezwaru, d Netta i d awem nettbarreḥ: Wenni nesřa d Wenni neẓra s tiṭṭawin nneɣ, d Wenni netwařa u nḥada t s ifassen nneɣ d Wenni iǧan d Awař Iddaren. ◘1:1 Lk. 24:39; Yḥ. 20:27; Yḥ. 1:1, 14; Řex. 13:26; 2 Bṭ. 1:16. 2 Aqa Tudart teḍhar-dd, neccin neẓra i-tt, uca ncehhed u nettbarreḥ awem Tudart ittduman, tenni tuɣa ak-d Babatneɣ uca tᵉttwassargeb-dd i neccin. 3 Min neẓra d min nesřa, ad awem t-i-dd-nesscen, ḥima ɛawed kenniw ad tiřim deg umuni akidneɣ, uca amuni nneɣ ak-d Babatneɣ u ak-d Mmis Yasuɛ Lmasiḥ. 4 Aqa nettari man aya i kenniw, ḥima řefraḥet nneɣ ad tiři tekmeř.

5 D wa d Řexbar Aṣebḥan i zzayes nesřa uca ad awem nbarreḥ: AREBBI d Tafawt, Netta war dayes bu jjurret n taǧest. ◘1:5 Yḥ. 1:9; 8:12; 9:5; 12:35, 36. 6 Mařa neqqar, aqa ɣarneɣ amuni akides, uca neggur di taǧest, aqa nessxarriq, war nḍeffar ca tidett. 7 Maca mařa nuyur di Tfawt, am Netta di Tfawt, ɣarneɣ amuni ak-d wayawya, uca ad taf Idammen n Yasuɛ, Mmis, ad aneɣ ssizdegen zi marra ddnub nneɣ. ◘1:7 Ɛbr. 9:14; 1 Bṭ. 1:19; Asa. 1:5.

8 Mařa neqqar, war dayneɣ bu ddnub, aqa nessxarriq x yixef nneɣ uca tidett war dayneɣ teǧi. ◘1:8 1 Ij. 8:46; 2 Im. 6:36; Ayub 9:2; Izhd. 143:2; Awřn. 20:9; Amb. 7:20. 9 Maca mařa nenɛem s ddnub nneɣ, aqa Netta d amtiqqi d amseggad ḥima ad aneɣ iɣfar ddnub nneɣ uca ad aneɣ issizdeg zi marra min war iseggden. ◘1:9 Izhd. 32:5; Awřn. 28:13. 10 Mařa neqqar: ‘Neccin war dayneɣ bu ddnub!’, nettarra i-t d bu-ixarriqen uca awař nnes war dayneɣ iǧi.