1 Deg wass amezwar n ssimana ɣar ṣṣbeḥ, řami tuɣa ɛad d taǧest, ruḥent ɣar wenḍeř, ksint řeɛṭur i tuɣa ssewjdent, u tuɣa din ɛad timɣarin nneɣni akidsent. ◘24:1 [Mt. 28:1-10; Mk. 16:1-8; Yḥ. 20:1-10] — Mt. 28:1; Mk. 16:1; Yḥ. 20:1. 2 Aqa ufint, taṣḍart i tuɣa x wenḍeř, tᵉttwasseqnuni zzayes. 3 Udfent, maca war ufint ca arrimet n Yasuɛ.

4 Am tbehtent di man aya, xzar, aqa din tnayen n yeryazen deg warruḍ ittissiqen, bedden sennej nsent. 5 Nitenti ggʷedent aṭṭas uca qbařent azeǧif nsent ɣar temmurt. Nitni maca nnan asent: “Mayemmi tarezzunt x Wenni iddaren jar imettinen? 6 Aqa war da iǧi, minzi aqa ikkar! Ɛeqřent x min d akent inna umi t tuɣa ɛad di Ljalil, ◘24:6 Mt. 16:21; 17:22; 20:18; Mk. 8:31; 9:31; 10:33; Lk. 9:22; 18:31. 7 inna: ‘Aqa tura belli Mmis n bnadem ad immewc deg ifassen n imednab, ad ittwaṣelleb uca deg wass wiss třata ad dd-ikkar.’ ”

8 Xenni ɛeqřent x wawařen nnes. ◘24:8 Yḥ. 2:22. 9 Ɛeqbent-i-dd zeg wenḍeř uca xebbarent marra man aya i ḥiṭac u i inneɣni. ◘24:9 Mt. 28:8; Mk. 16:10. 10 Ina tuɣa d Maryam n Majdala d Yuḥanna d Maryam, yemmas n Yaɛqub, d min tuɣa iqqimen n temɣarin i iǧan akidsent, ḥajant nitenti man aya i rrusul. 11 Nitni ḥesben awařen-a d aṭemmes uca war tent ttiqqen.

12 Maca Cimɛun ikkar-dd, yuzzeř deɣya ɣar wenḍeř, ixezzar daxeř, iẓra taxeyyaḍt n řeqṭen azdad tᵉttwamars ɣar uɣezdis. Xenni iruḥ, ittebhet deg yixef nnes s min imsaren. ◘24:12 Yḥ. 20:3, 6.

13 U xzar, deg wass nni tuɣa tnayen zzaysen deg webrid ɣar ijj n dcar qqaren as Ɛimwas, iggʷej settin ‘istadiyyen’ x Urcalim, ɛřaḥař ḥiṭac kilumitr. ◘24:13 [Mk. 16:12-13] — Mk. 16:12. 14 Tuɣa ssawařen ak-d wayawya x marra min tuɣa imsaren.

15 Am ssawařen nitni, ttemsawaḍen, iqarreb-dd ɣarsen Yasuɛ, yuyur akidsen. ◘24:15 Mt. 18:20; Lk. 24:36. 16 Ttwacebbarent tiṭṭawin nsen ařami war t ɛqiřen. 17 Inna asen: “Man awařen-a i xef tessawařem ak-d wayawya deg webrid, am teggurem u ttbanent řxeẓrat nwem ceḍnent?” 18 Ijjen zzaysen umi qqaren Kliyupas, inna as: “Ma Cek d ayenni n ubarrani di Urcalim i war issinen min din imsaren deg wussan-a?” 19 Inna asen: “Min imsaren?” Nnan as: “Min imsaren i Yasuɛ zi Nnaṣira, tuɣa-t d anabi, tuɣa ɣares jjehd di min ittegg u di min issawař qibač i AREBBI d marra řgens. ◘24:19 Lk. 7:16; Yḥ. 4:19; 6:14. 20 Sellmen t imeqqranen n ikehhanen d imɣaren n řgens i řḥukm s řmewt uca ṣellben t. 21 Neccin tuɣa nessitim, aqa d Netta i ɣa isellken Israil, maca xzar, ass-a ɛdun ɛad třata n wussan zeg wami imsar man aya marra. ◘24:21 Řex. 1:6. 22 Maca ca n temɣarin zzayneɣ ssḥeyyarent aneɣ ɛawed, maɣar nitenti ruḥent zic ɣar wenḍeř. ◘24:22 Mt. 28:8; Mk. 16:10; Yḥ. 20:18. 23 Řami war din ufint arrimet nnes, usint-i-dd, nnant: “Aqa neẓra din lmalakat, u lmalakat nnant xas: ‘Aqa iddar!’ ” 24 Ca zeg inni akidneɣ iǧan, ruḥen ɣar wenḍeř, ufin timesřayin am mammec xas nnant ɛawed temɣarin, maca Netta war t ẓrin ca.”

25 Inna asen: “Mecḥař d ifɣař d ineḍqař n wuř i teǧam maḥend ad tamnem di marra min ssiwřen inabiyyen! 26 Ma war ittxeṣṣi ad iweddeb Lmasiḥ ḥima ad yadef ɣar uɛuǧi nnes?” ◘24:26 Ica. 50:6; 53:5; Fil. 2:7; Ɛbr. 12:2; 1 Bṭ. 1:11. 27 Xenni ibda zi Musa u zi marra inabiyyen, ittfessar asen x Yixef nnes zi marra Tira Iqeddsen. ◘24:27 Amz. 3:15; 22:18; 26:4; 49:10; Aɛwd. 18:15; Izhd. 132:11; Ica. 7:14; 9:5; 40:10; Irm. 23:5; 33:14; Ḥiz. 34:23; 37:25; Dan. 9:24; Mixa 7:20.

28 Umi dd-qarrben ɣar dcar i ɣar tuɣa gguren, igga Netta axmi tuɣa ixs ad yarni deg webrid ɣar ijj n wemcan iggʷejen. 29 Maca nitni ggin xas bezzez, nnan: “Qqim akidneɣ, minzi tameddit ad tewḍa, aqa imeyyeř uziř.” Uca yudef, iqqim akidsen. ◘24:29 Amz. 19:3; Řex. 16:15; Ɛbr. 13:2. 30 Imsar ařami tuɣa akidsen iqqim ɣar umensi iksi aɣrum, ibarek i-t, yarẓa i-t, xenni iwca asen t. 31 Deɣya nnurzment tiṭṭawin nsen, ɛeqřen t. Xas uca ittwammeksi zzaysen.

32 Nnan ijjen i wenneɣni: “Ma war tuɣi ideqqeř wuř nneɣ ařami tuɣa akidneɣ issawař deg webrid, issefham aneɣ Tira Iqeddsen?” 33 Di tsaɛɛet nni kkaren nitni, ɛeqben ɣar Urcalim, uca ufin ḥiṭac n rrusul munen, nitni d yinni akidsen. 34 Uca nitni nnan: “D tidett, aqa ikkar-dd Siditneɣ, iban-dd i Cimɛun.” 35 Uřa d nitni xebbaren ɛawed s min imsaren deg webrid u mammec t ɛeqřen ařami yarẓa aɣrum.

36 Am tuɣa ssawařen nitni x man aya, ibedd Yasuɛ simant nnes di řwesṭ nsen, inna asen: “Sřam xawem, aqa d NECC, war tteggʷedem ca!” ◘24:36 [Mt. 28:16-20; Mk. 16:14-18; Yḥ. 20:19-23; Uf. 1:6-8] — Mk. 16:14; Yḥ. 20:19; 1 Kur. 15:5. 37 Maca nitni nnxeřɛen uca ggʷeden aṭṭas, ittɣiř asen belli ttwařan ijj n řexyař. 38 Inna asen Yasuɛ: “Mayemmi tᵉttnexřiɛem, mayemmi tᵉtteggem ixarriṣen deg wuřawen nwem? 39 Xzarem ifassen d iḍaren inu, aqa d Necc Necc. Ḥadam ayi, u snem belli ijj n řexyař war ɣares bu weysum uřa d iɣsan am mammec d ayi tᵉttwařam.” 40 Umi inna aya, isscen asen ifassen nnes d iḍaren nnes. 41 War uminen ɛad zi ssibbet n řefraḥet, qqimen ttbehten. Inna asen: “Ma ɣarwem da ca n macca?” ◘24:41 Yḥ. 21:10. 42 Wcin as ict n tecwiḥt n wesřem icennfen d ca n tezřeft n tamment. 43 Iksi tt uca icca i-tt qibač nsen.

44 Inna asen: “Ina d awařen i zi kidwem ssiwřeɣ umi d ayi tuɣa ɛad akidwem, aqa ittxeṣṣa ad ittwakemmeř marra min xafi yuran di Ccariɛa n Musa, deg Inabiyyen u deg Izehhiden.” ◘24:44 Mt. 16:21; 17:22; 20:18; Mk. 8:31; 9:31; 10:33; Lk. 9:22; 18:31; 24:6. 45 Xenni yarzem asen řeɛqeř nsen, ḥima ad fehmen i Tira Iqeddsen. 46 Inna asen: “Ammu i tura u ammu i tuɣa ittxeṣṣa ad imarret Lmasiḥ u ad dd-ikkar zi taddart n imettinen deg wass wiss třata, ◘24:46 Izhd. 22:7; Řex. 17:3. 47 ḥima ad ittwabarreḥ s ttubet i weɣfar n ddnub i marra řegnus s Yisem nnes, d amezwaru di Urcalim. ◘24:47 Řex. 13:38; 1 Yḥ. 2:12. 48 Kenniw d řechud x man aya. ◘24:48 Lk. 9:15; 21:13 49 Aqa Necc ad awem dd-ssekkeɣ lwaɛd n Baba. Qqimem maca di tendint n Urcalim ař ɣa tᵉttwassyarḍem s jjehd zi řuɛřa!” ◘24:49 Yḥ. 14:26; 15:26; 16:7; Řex. 1:4.

50 Xenni indeh i-ten ɣar tendint n Bayt-Ɛanya, issgeɛɛed ifassen nnes uca ibark i-ten. ◘24:50 [Mk. 16:19-20; Řex.1:9-11] — Řex. 1:12. 51 Awarni řami ten tuɣa ittbarak, imsar, aqa immsebḍa xasen uca iggeɛɛed ɣar ujenna. ◘24:51 Mk. 16:19 Řex. 1:9. 52 Sejden as uca ɛeqben ɣar Urcalim s řefraḥet temɣar. 53 Tuɣa-ten řebda di Zzawect Tameqqrant, ssemɣaran u ttbaraken AREBBI. Amin.

Aneggar n L’Injil Iqeddsen am mammec t ibarreḥ Luka.