1 “War ttejjim ad innehweř uř nwem. Kenniw tumnem di AREBBI, amnem ɛawed dayi. 2 Di taddart n Baba dayes aṭṭas n tzeddiɣin. Meɛlik war iǧi amenni, iři nniɣ awem t, minzi Necc ad raḥeɣ, ḥima ad awem sswejdeɣ amcan. 3 Awarni řami ruḥeɣ uca sswejdeɣ awem amcan, xenni ad ɛeqbeɣ, ad kenniw dd-awyeɣ ɣari, ḥima, mani ǧiɣ Necc, ad din tiřim uřa d kenniw. ◘14:3 Yḥ. 12:26; 17:24. 4 Aqa tessnem mani ɣa raḥeɣ uca tessnem abrid.”

5 Inna as Tuma: “A Siditneɣ, war nessin mani ɣa traḥed i mammec nzemmar ad nessen abrid?” 6 Yasuɛ inna as: “NECC d Abrid d Tidett d Tudart, war dd-ittis uřa d ijj ɣar Baba mɣir zzayi. ◘14:6 Yḥ. 1:4, 17; 10:9; 11:25; Ɛbr. 9:8. 7 Mařa tuɣa tessnem ayi, ad tiři aqa tessnem uřa d Baba. Zi řexxu aqa tessnem t, teẓrim t.”

8 Filippus inna as: “A Siditneɣ, scen aneɣ Babac, uca ikfa.” 9 Yasuɛ inna as: “Anect uya n řweqt qaɛ Necc akidwem, ma war d ayi tessined ɛad, a Filippus? Wenni d ayi iẓrin, iẓra Baba. Mammec teqqared: ‘Scen aneɣ Babac’? ◘14:9 Yḥ. 10:30. 10 Ma war tumined ca aqa Necc aqa ayi di Baba d Baba aqa-t dayi? Awařen i qqareɣ, war ten qqareɣ ca zi ɣari, maca Baba wenni dayi izeddɣen, Netta ittegg řexdayem-a. ◘14:10 Yḥ. 5:17; 7:16; 8:28; 10:38; 12:49; 16:13; 17:21. 11 Amnem ayi, aqa Necc aqa ayi di Baba u Baba aqa-t dayi, u mařa lla, amnem ayi x ssibbet n řexdayem simant nsent. 12 S tidett, s tidett, Necc ad awem iniɣ: Wenni dayi yumnen, aqa řexdayem i tteggeɣ, ad zzaysent igg uřa d netta, uca ad igg tinni iǧan d timeqqranin x man aya, minzi Necc ad raḥeɣ ɣar Baba. ◘14:12 Mt. 21:21; Lk. 17:6; Řex. 5:12; 19:11. 13 Uca marra min ɣa tᵉttarem s Yisem inu, ad t ggeɣ i kenniw, ḥima ad ittwassɛuǧ Baba di Mmis. ◘14:13 Irm. 29:12; Mt. 7:7; 21:22; Mk. 11:24; Lk. 11:9; Yḥ. 15:7; 16:24; Yaɛ. 1:5; 1 Yḥ. 3:22. 14 Mařa d ayi ɣa tᵉttarem s Yisem inu, ad t ggeɣ.

15 Mařa texsem ayi, ṭṭfem di tweṣṣa inu, ◘14:15 Yḥ. 14:21, 23; 15:10; 1 Yḥ. 5:3. 16 uca Necc ad ẓẓaǧeɣ i Baba u Netta ad awem iwc ijj n Umseṣřaḥ nneɣni, ḥima ad kiwem iqqim i řebda: 17 Arruḥ n tidett tenni war tzemmar ddunect ad t teqbeř, minzi war t tᵉttwiři, war t tessin. Maca kenniw tessnem t, minzi Netta ittɣima akidwem u Netta aqa-t daywem.”

18 “War kenniw ttejjiɣ ca d iyujiřen, maɣar awarni drus n řweqt Necc ad ɣarwem dd-aseɣ ɛawed. ◘14:18 Mt. 28:20. 19 Ddunect war d ayi tẓarr, maca kenniw ad ayi twařam. Minzi Necc ddareɣ, ad teddarem uřa d kenniw. 20 Deg wass nni ad tessnem, aqa Necc aqa ayi di Baba, kenniw dayi u Necc daywem.

21 Wenni ɣar iǧa tiweṣṣa inu uca ad daysent iṭṭef, d wenni d ayi ittexsen, u wenni d ayi ittexsen, uřa d Baba ad t ixs u Necc ad t xseɣ ɛawed uca ad as ssecneɣ Ixef inu.” 22 Inna as Yahuda, war iǧi d Isxariyuṭi: “A Sidi, mammec d aneɣ i ɣa tessecned Ixef nnec, war iǧi ca i ddunect?” 23 Yasuɛ yarra-dd, inna as: “Mařa ca n yijjen ixs ayi, xenni ad iṭṭef deg wawař inu uca Baba ad t ixs, uca ɣares i dd ɣa nas u ɣares i ɣa negg tazeddiɣt nneɣ. 24 Wenni war d ayi ittexsen, war ittᵉṭṭif ca deg wawař inu, uca awař-a i tesřim, war iǧi ca zi ɣari, maca zi Baba, wenni d ayi dd-issekken. ◘14:24 Yḥ. 7:16; 8:28; 12:49; 14:10; 16:13.

25 Ssiwřeɣ akidwem man aya umi Necc ɛad akidwem. 26 Maca Umseṣřaḥ, Arruḥ Iqeddsen, Wenni i dd ɣa issekk Baba s Yisem inu, ad awem isseřmed kuřci, ad awem issfekkar marra min d awem nniɣ. ◘14:26 Lk. 24:49; Yḥ. 15:26; 16:7, 13; Řex. 2:4.

27 Řehna ad awem t jjeɣ, Necc ad awem wceɣ řehna inu. Necc ad awem t wceɣ, war iǧi ca am mammec t tᵉttic ddunect. War tejjim ad innehweř uř nwem, war tteggʷedem ca. ◘14:27 Fil. 4:7. 28 Aqa tesřim Necc nniɣ awem: ‘Necc ad uyureɣ uca ad ɣarwem dd-aseɣ ɛawed’. Mařa texsem ayi, ad tfarḥem, minzi aqa ad raḥeɣ ɣar Baba, minzi Baba imɣar xafi! ◘14:28 Yḥ. 14:3. 29 Uca řexxu, xzar, Necc nniɣ awem tt qbeř ma ad yiři, ḥima kenniw, x minni i ɣa yiři uya, ad tamnem. ◘14:29 Yḥ. 13:19; 16:4. 30 Awarni man aya war kiwem ssiwiřeɣ ɛad aṭṭas ktar, maɣar ad dd-yas umeqqran n ddunect-a, war ɣares ittiři walu dayi, ◘14:30 Yḥ. 12:31; 16:11; Afa. 2:2. 31 maca ittxeṣṣa ad tessen ddunect aqa Necc ttexseɣ Baba uca tteggeɣ min d ayi iweṣṣa Baba. Kkarem, ad nuyur ssanita.” ◘14:31 Yḥ. 10:18; Ɛbr. 10:5.