1 “S tidett, s tidett, Necc ad awem iniɣ: Wenni war ittidfen zi tewwart ɣar řkuri n wuǧi, maca ad igeɛɛed manis nneɣni, aqa-t d aceffar d axewwan. 2 Maca wenni i ɣa yadfen zi tewwart, netta d ameksaw n tḥimart. 3 Aɛessas n tewwart ad as yarzem i wanita uca ad tseř tḥimart i tmijja nnes. Netta ad iřaɣa i wuǧi nnes s ismawen nsen uca ad ten issuffeɣ ɣar barra. 4 Awarni řami issuffeɣ marra taḥimart nnes, ad yuyur zzates, uca ad t-i-dd-ḍfaren wuǧi nnes, minzi ssnen tmijja nnes. 5 Maca abarrani war t tḍeffar tḥimart ɛemmarṣ, maca ad zzayes tarweř, minzi war tessin tmijja n ubarrani.”

6 Inna asen Yasuɛ amettiř-a, maca nitni war fhimen ca i tmesřayin min xef tuɣa akidsen issawař.

7 Yasuɛ inna asen ɛawed: “S tidett, s tidett, Necc ad awem iniɣ: Necc d Tawwart n tḥimart. 8 Marra inni dd-yusin qbeř inu aqa aten d iceffaren d ixewwanen. Maca taḥimart war d asen tesři ca. 9 NECC d Tawwart. Wenni zzayi i ɣa yadfen, ad iddar. Netta ad yadef, ad iffeɣ uca ad yaf mani ɣa yarwes. ◘10:9 Yḥ. 14:6. 10 Aceffar war dd-ittis mɣir ḥima ad yacar, ad ineɣ u ad isshellek. Necc maca usiɣ-dd ḥima ad ɣarsen tiři Tudart d ufeyyeḍ.

11 NECC d Ameksaw Aṣebḥan. Ameksaw Aṣebḥan issrusa tudart nnes i tḥimart nnes. ◘10:11 Ica. 40:11; Ḥiz. 34:11, 12, 15, 22, 23; Mixa 1:14; Ɛbr. 13:20; 1 Bṭ. 5:4. 12 Maca amcaray, wenni war iǧi ca d ameksaw, war iǧi ca d bab n wuǧi, x minni i ɣa iẓar uccen yusa-dd, ad yejj taḥimart uca ad yarweř. Xenni ad dd-yas wuccen, ad ixḍef taḥimart uca ad tt izzuzar. ◘10:12 Zak. 11:16. 13 Amcaray yarweř, minzi netta d amcaray, war t icqi taḥimart. 14 NECC d Ameksaw Aṣebḥan. Ssneɣ uǧi inu uca uǧi inu ssnen ayi, ◘10:14 2 Tim. 2:19. 15 am mammec i d ayi issen Baba, ammu i ssneɣ Necc Baba. Necc ad wceɣ tudart inu i tḥimart. ◘10:15 Mt. 11:27; Lk. 10:22; Yḥ. 6:46; 7:29. 16 Ɣari ɛad uǧi nneɣni, inni war iǧin ca zi řkuři-ya. Icuwwar ayi ad ten dd-ssmuneɣ ɛawed uca ad sřen i tmijja inu, uca ad dewřen marra d ict n tḥimart sadu ufus n ijj n Umeksaw. ◘10:16 Ḥiz. 37:22. 17 S man aya ittexs ayi Baba, minzi Necc wciɣ tudart inu ḥima ad tt-i-dd-ksiɣ ɛawed. ◘10:17 Ica. 53:12. 18 Uřa d ijj war zzayi tt iksi, maca Necc wciɣ tt s řxaḍar inu. Ɣari ṣṣulṭa ḥima ad tt wceɣ u ɣari ṣṣulṭa ḥima ad tt-i-dd-ksiɣ ɛawed. Tawṣeyyet-a ṭṭfeɣ tt zi Baba.” ◘10:18 Yḥ. 2:19.

19 Xenni imsar ɛawed ubeṭṭu jar Wudayen s ssibbet n wawařen-a. ◘10:19 Yḥ. 7:12; 9:16. 20 Aṭṭas zzaysen nnan: “Aqa dayes ijj n cciṭan, Netta d aṭemmes ameqqran. Mayemmi ɣares tᵉttesřam?” ◘10:20 Yḥ. 7:20; 8:48, 52. 21 Inneɣni nnan: “Awařen-a war ǧin ca n ijj n umaryaḥ. Ma izemmar ijj n cciṭan ad yarzem tiṭṭawin n idarɣařen?” ◘10:21 Uf. 4:11; Izhd. 94:9; 146:8.

22 Yiweḍ-dd Řɛid n Udeccen n Zzawect Tameqqrant di Urcalim. Tuɣa d řmecta. 23 Yasuɛ iggur di Zzawect Tameqqrant deg useqqif ak-d ukulwar d ipilaren n Suliman. ◘10:23 1 Ij. 6:3; Řex. 3:11; 5:12. 24 Nnḍen as-dd Wudayen, nnan as: “Ař meřmi d aneɣ i ɣa tejjed nuyeř ɛad? Mařa Cek d Lmasiḥ, ini aneɣ t s bṭayṭay.” 25 Yarra-dd Yasuɛ, inna asen: “Nniɣ awem t uca kenniw war tuminem. Řexdayem i ggiɣ s Yisem n Baba, cehhdent xafi. ◘10:25 Yḥ. 5:36. 26 Maca kenniw war tuminem, minzi kenniw war teǧim ca d uǧi inu, am mammec tuɣa d awem nniɣ. 27 Uǧi inu isřa ɣar tmijja inu u Necc ssneɣ asen uca nitni ad ayi-dd ḍfaren. ◘10:27 Yḥ. 8:47. 28 Ad asen wceɣ Tudart ittduman uca war ttwahellken ɛemmarṣ qaɛ uca uřa d ijj war ten ixeṭṭef zeg ufus inu. ◘10:28 Yḥ. 6:39; 17:12; 18:9. 29 Baba wenni d ayi ten iwcin, aqa-t d ameqqran x kuřci. Uřa d ijj war izemmar ad ten ixḍef zeg ufus n Baba. 30 Necc d Baba d Ijjen.” ◘10:30 Ica. 54:5; Yḥ. 5:19; 14:9; 17:5.

31 Xenni ksin Wudayen ɛawed iẓra ḥima ad t arejmen. ◘10:31 Yḥ. 8:59; 11:8. 32 Yasuɛ inna asen: “Aqa ssecneɣ awem aṭṭas n řexdayem tiṣebḥanin zi Baba. I man řxedmet zzaysent i texsem ad ayi tarejmem?” 33 Nnan as Wudayen: “War Cek narejjem x ict n řxedmet taṣebḥant, maca umi tekfared u tarrid Ixef nnec d AREBBI, waxxa Cek d bnadem i teǧid.” ◘10:33 Yḥ. 5:18. 34 Inna asen Yasuɛ: “Ma war turi di Ccariɛa nwem: ‘Necc nniɣ, aqa kenniw d irebbiten’? ◘10:34 Izhd. 82:6. 35 Mařa Netta isemma ten ‘irebbiten’, yinni umi dd-yusa wawař n AREBBI, uca war izemmar ad ttwarẓent Tira Iqeddsen, 36 mammec teqqarem kenniw x wenni ittwaqeddsen zi Baba u x wenni issekk i-t-i-dd ɣar ddunect: ‘Aqa Cek tekfared!’, minzi Necc nniɣ: ‘Aqa Necc d Mmis n AREBBI’? ◘10:36 Yḥ. 5:1; 6:27. 37 Mařa Necc war xeddmeɣ ca řexdayem n Baba, xenni war dayi ttimnem ca. ◘10:37 Yḥ. 15:24. 38 Maca mařa xedmeɣ tent, amnem xenni di řexdayem, waxxa kenniw ɛad war dayi tuminem, ḥima ad tessnem aqa Baba dayi u Necc aqa ayi di Baba.” ◘10:38 Yḥ. 14:11; 17:21.

39 Arezzun ad t ṭṭfen ɛawed, maca ixtutteř asen jar ifassen nsen. ◘10:39 Lk. 4:29; Yḥ. 8:59. 40 Iruḥ ɣar ujemmaḍ n iɣzar n L’Urdun, ɣar wemcan mani tuɣa issɣeṭṭaṣ Yuḥanna deg umezwaru, uca iqqim dinni. ◘10:40 Yḥ. 1:28; 3:23. 41 Usin-dd ɣares waṭṭas n iwdan, nnan: “Yuḥanna war iggi uřa d ict n řeɛřamet, maca marra min inna x Weryaz-a d tidett!” 42 Uca umnen dayes aṭṭas diha.