1 “Arzem tiwwura nnec, a Lubnan,

maḥend timessi ad tecc tineglin nnec.

2 Ru, a tacejjart n umerzi,

maɣar tangelt tewḍa,

maɣar ticejjura nni ijehden

ttwareddǧent!

Rut, a ticejjura n řbeǧuḍ n Bacan,

maɣar azɣar immcubbcen iwḍa.” ◼11:2 azɣar - niɣ ‘řɣabet’ niɣ ‘tazgant’. amerzi - niɣ ‘ameḍzi’.

3 “Sřem i řḥess n tɣuyyit n imeksawen,

maɣar aɛuǧi nsen ittwareddeǧ,

sřem i řḥess n uzehhar

n weyraden imeẓyanen,

maɣar řɛezz n L’Urdun ittwareddeǧ.”

4 “Ammu i iqqar SIDI, AREBBI inu: ‘Arwes uǧi nni umi ɣa ɣarṣen, 5 inni ten imellken neqqen ten břa ma ad ttwaɛaqben, inni ten imellken zzenzen ten, qqaren: Ad ittwabarek SIDI, aqa necc dewřeɣ ɣari agřa! Imeksawen nsen war d asen zziǧizen.’ ”

6 “Xenni Necc war d ayi zziǧizen ɛad imezdaɣ n temmurt, iqqar SIDI. Xzar, Necc ad wceɣ i iwdan kuř ijj deg ufus n jjar nnes u deg ufus n ujeǧid nnes, u nitni ad ɛefsen x temmurt u Necc war ten ttfekkeɣ ca zeg ufus nsen.”

7 “Necc arewseɣ uǧi tinni umi ɣa ɣarṣen, maɣar nitenti d uǧi ittwaḥsaren. Necc ksiɣ i Yixef inu tnayen n tᵉɣɣaryen. Ict ggiɣ as ‘Řxaḍar!’ u tenneɣni ggiɣ as ‘Taɣruḍt!’, u ammu i arwseɣ Necc uǧi.”

8 “Deg ijj n uyur tteḥḥiɣ třata zeg imeksawen. Řeɛmar inu war izemmar ad ten tarbu ɛad uca uřa d řeɛmar nsen icarh ayi ɛawed. 9 Necc nniɣ: Necc war kenniw arekkwseɣ! Min immuten, ejj i-t ad immet u min ihellken, ejj i-t ad ittwahellek, u jjem inni iqqimen ad ccen aysum ijj n wenneɣni. 10 Necc ksiɣ taɣɣarct inu ‘Rxaḍar’, uca arẓiɣ tt maḥend ad arẓeɣ ammu řɛahd inu nni ggiɣ ak-d marra řegnus. 11 Deg wass nni idweř řɛahd yarreẓ u ammu i ssnen wuǧi ittwaḥṣaren nni d ayi iḥeṭṭan, aqa aya tuɣa d ijj n wawař n SIDI.”

12 “Necc nniɣ asen: ‘Mařa aya mliḥ di tiṭṭawin nwem, wcem ayi řmunet inu, u mařa lla, jjem t!’ Xenni weznen řmunet inu: třatin n řweznat n nnuqart. ◘11:12 Uf. 21:32; Mt. 26:15; 27:9 13 Xenni inna ayi SIDI: ‘Nḍar řmunet nni ɣar bu-třaxt, ttaman nni ‘iṣebḥen’ inni d ayi ggin ttaman!’ U necc ksiɣ třatin n řweznat n nnuqart uca nḍareɣ tent ɣar bu-třaxt di Taddart n SIDI. 14 Řexdenni arẓiɣ Necc taɣɣarct inu nneɣni tenni ggiɣ as ‘Taɣruḍt’ maḥend ad arẓeɣ ammu tawmat jar Yahuda d Israil.”

15 “SIDI inna ayi: ‘Ksi twařa nneɣnit dduzan n ijj n umeksaw abuhaři, 16 maɣar Necc ad jjeɣ ad dd-ikkar ijj n umeksaw di temmurt: min iruḥen war yarezzu, min imṭarrcen war t yarezzu, min yarẓen war t issgenfi u min iqqimen ibedd, war t iḥeṭṭi netta. Maca netta ad yecc aysum n řebhayem iṣeḥḥen u ad asent ikkes ticeḍyin.’ ”

17 “Uct x umeksaw i war isekkwin,

wenni isemmḥen deg wuǧi!

Ssif ad dd-iɛdu x uɣiř nnes

u x tiṭṭ nnes tafusect.

Aɣiř nnes ad yaẓeɣ marra,

u tiṭṭ nnes tafusect ad teɛmec marra!” ◘11:17 Irm. 23:1; Ḥiz. 34:2; Yḥ. 10:12