1 Awař n SIDI i dd-yusin ɣar Mixa, Amuracti, deg wussan n Yutam d Aḥaz d Ḥizqiya, ijeǧiden n Yahuda, awař i iẓra x Samarya d Urcalim. ◘1:1 Irm. 26:18

2 “Sřem-dd, marra kenniw, a řegnus,

iřim tfetnem, a cem, tammurt

d uɛemmar nnes!

Sidi inu, SIDI,

ad yiři d acehhad xawem,

Sidi inu zi Zzawect nnes iqeddsen. ◘1:2 Aɛwd. 32:1; Ica. 1:2

3 Maɣar xzarem, SIDI iffeɣ-dd

zeg wemcan nnes n tzeddiɣt,

u Netta ad dd-ihwa

u ad iṣurf x řegɛudi n temmurt. ◘1:3 Aɛwd. 32:13; 33:29; Izhd. 115:3; Ica. 26:21, Ɛam. 4:13

4 Idurar ad fesyen sadu nnes,

u tiɣzurin ad ttwabḍant,

am ccmeɛ zzat i wudem n tmessi,

am waman nni dd-ittwafarrɣen

zi teysart. ◘1:4 Řqḍ. 5:4; Izhd. 18:8, 10; Izhd. 68:3, 9; Izhd. 97:5; Ɛam. 9:5

5 Aya marra ittemsar

zi ssibbet n uxeṭṭu n Yaɛqub,

u zi ssibbet n ddnub

n taddart n Israil.

Min iǧan d xeṭṭu n Yaɛqub?

Ma war iǧi d Samarya?

U min ǧan d řegɛudi n Yahuda?

Ma war teǧi d Urcalim?

6 Necc ad arreɣ Samarya

d řxarbet deg iyyar,

d amarjeɛ mani ɣa ẓẓun tazayart,

u Necc ad nḍareɣ iẓra nnes di teɣzurt,

u ad ɛarriɣ x dsusa nnes.

7 Marra řexyařat nnes ineqcen

ad ttwaředǧent

u marra řmunet nnes n farq-ccɣeř

ad tt sscemḍen s tmessi,

u marra řexyařat nnes ineqcen

ad tent areddǧeɣ Necc,

maɣar nettat tyarew i-tent

zi řmunet n farq-ccɣeř,

u nitenti ad dd-dewřent ɛawed

d řmunet n farq-ccɣeř.”

8 “X uya ad ceḍneɣ u ad wteɣ agejdur,

ad uyureɣ s řeḥfa d aɛaryan,

ad ssmiɛweɣ am wuccanen n řexřa,

u ad sɣuyeɣ am yessis n nnɛamet. ◘1:8 Ayub 30:29

9 Maɣar iyezzimen nnes neqqen,

maɣar aya yusa-dd ař Yahuda,

iwesseɛ řḥukm ař tiwwura n řgens inu,

ař Urcalim.

10 War ttbarrḥem ca man aya di Jat,

war tᵉttrum, war xas nessiwiř.

Di Bayt-Li’afra zuzzareɣ acař

x yixef inu. ◘1:10 2 Ṣm. 1:20; Irm. 6:26

11 Ɛdu, cem tenni izeddɣen di Cafir,

d aɛaryan u s řeḥya.

Tenni izeddɣen di Ṣanan war teffiɣ ca.

Taɣuyyit n wecḍan n Bayt-Ha-Iṭṣil

tekkes zzaywem abeddi nnes akidwem. ◘1:11 Ica. 47:3

12 Maɣar tenni izeddɣen di Marut,

tᵉtteqnunnuy ɣar marra tiɣemmura

di ṭṭweɛ n řxar,

minzi aqa ihwa-dd řɣar n SIDI,

ař tawwart n Urcalim. ◼1:12 Marut - isem wanita ixs ad yini ‘tarzugi’.  ◘1:12 Ɛam. 3:6

13 Ḥezzmem iysan n tazřa zzat i ukarru,

a cem, tenni izeddɣen di Laxic!

Nettat d beṭṭu n ddenb

n yeǧis n Ṣihyun,

maɣar dayek ttwafen ixeṭṭan n Israil.

14 S uya ewc arriɣaluten n umsebḍi

i Muracat-Jat!

Tudrin n Akzib ad dewřent d řɣecc

i ijeǧiden n Israil.

15 Ɛawed Necc ad am dd-awyeɣ awrit,

a cem tenni izeddɣen di Marica!

Aɛuǧi n Israil ad dd-yas

ař ɣar Ɛadullam.

16 Egg ixef nnem d taqeccart

u ḥeff i ixef nnem

di ssibbet n iḥenjiren nnem iɛizzen.

Arr taqeccart nnem d tameqqrant

amecnaw agider,

minzi ttwawyen zzayem

ɣar tmeḥbast.”