1 D ta d lbaraka nni zi ibarek, Musa, aryaz n SIDI, ayt n Israil qbeř řmewt nnes. 2 Inna:

“SIDI yusa-dd zeg wedrar n Sina, igeɛɛed-dd ittwesseg arendad nsen zi Saɛir, tuɣa ittissiq umi dd-iban zeg wedrar n Faran uca iffeɣ-dd zi jar ɛecra-ařaf n imqeddasen. Zeg ufus nnes afusi issberbic s wassamen arendad nsen. ◘33:2 Ḥab. 2:3, 4 3 Wah, Netta ittexs řegnus! Marra imqeddasen iǧan deg ufus nnec, aqa aten ɣar iḍaren nnec, wah, ad ikkar kuř ijjen zzaysen zeg wawařen nnec. 4 Musa yumur aneɣ x Ccariɛa, aqa-tt d řwart n tmesmunt n Yaɛqub. 5 Tuɣa Netta d Ajeǧid di Yacurun umi nyarwen izeǧifen n řgens, jmiɛ ak-d tqebbař n Israil.”

6 “Iři ad iddar Rubin, war itmetti, uca iři war ttiřin iryazen nnes udrusen!”

7 D man aya i inna x Yahuda: “A SIDI, seř ɣar tmijja n Yahuda uca yarr i-t ɣar řgens nnes. S ifassen nnes immneɣ di ṭṭweɛ nnes uca iři Cek ad as iwc afus ḍidd n iɣrimen nnes!” ◼33:7 di ṭṭweɛ nnes - ixs ad yini ‘di ṭṭweɛ n Israil’.

8 U x Lawi inna: “Tummim nnec d Urim nnec ad iřin i weryaz nni d ameddukkeř nnec d amtiqqi, wenni tqeǧbed di Massa, ak-d wi tqacḥed ɣar waman n Mariba, ◘33:8 Uf. 17:7 9 wenni innan x babas d yemmas: ‘War ten ttwiřiɣ!’, d wenni war issɛizz x yaytmas niɣ war ixs ad issen iḥenjiren nnes, minzi nitni ṭṭfen di min tennid Cek uca ḥḍan Řɛahd nnec. 10 Nitni ad ssřemden lfarayiḍ nnec i Yaɛqub u Ccariɛa nnec i Israil. Ad ssuyusen řebxur zzat i wenzaren nnec uřa d taɣarṣt n wecmaḍ ikemmřen x uɛalṭar nnec. 11 Barek tizemmar nnes di min igga, a SIDI, uca ṭṭef arḍa s řxedmet n ifassen nnes, ɣḍeř timeṣṣaḍin n yinni akides ittemɛařan d n yinni t icarrhen ḥima ɛemmarṣ war ttbeddin ɛad!”

12 U x Binyamin inna: “Amɛizz n SIDI, netta ad ɣares izdeɣ di řaman, ass marra ad t ideř uca ad izdeɣ jar tiɣarḍin nnes!” ◼33:12 ad izdeɣ jar tiɣarḍin nnes ... - min ixs ad yini ‘Binyamin ad izdeɣ s ttiqqet x Arebbi uca Arebbi ad iderr Binyamin u Binyamin ad izdeɣ jar tɣarḍwin n SIDI’.

13 U x Yusuf inna: “Ad ibarek SIDI tammurt nnes s min iǧan iɣřan qaɛ zeg ujenna, s nnda, u s waman ihewřen, inni din iǧan swadday, ◘33:13 Amz. 49:25 14 u s řɣiǧet iɣřan n tfuct u s min iǧan iɣřan i ittic uyur, 15 u s řqimet n idurar tiqdimin u s min iɣřan n tewririn n řebda, 16 u s min iɣřan aṭṭas n temmurt d uɛemmar nnes, u s tcuni n wenni tuɣa izeddɣen di cbarq ak-d isennanen. Iři ad dd-yas x uzeǧif n Yusuf u x tuccent n ucuwwaf n wenni yarebbun ttaj n weɛzař jar aytmas. ◘33:16 Amz. 49:26; Uf. 3:3-6. 17 Amenzu n ufunas nnes d ucewwar nnes u accawen nnes am waccawen iziraren n iɣayḍ n řexřa, ad zzaysen iwwet řegnus marra jmiɛ ař tineggura n ddunect. Ina d ɛecra n řuřuf n Ifrayim u ina d řuřuf n Manassa!” ◘33:17 Lawi 22:27; Řxř. 18:17;

18 U x Zabulun inna: “Farḥ, a Zabulun, s wuffuɣ nnec, u cek, a Issakar!, farḥ s iqiḍan nnec. 19 Ad řaɣan i řegnus ɣar wedrar. Din i ɣa ɣarṣen tiɣarṣa n tsegda, minzi ad ẓemmen afeyyeḍ n řebḥur d txubay innufaren deg ijdi.”

20 U x Jad inna: “Ad ittwabarek Wenni iggin ttasiɛ i Jad! Netta izeddeɣ din am teyradt uca icarreg aɣiř, wah, uřa d aceqquf n uzeǧif. 21 Iksi tammurt icnan i yixef nnes, minzi aqa din tᵉttwaḥḍa tesɣart n umgewwad s weḍman. Yusa-dd ak-d izeǧifen n řgens, ikemmeř tasegda n SIDI d řeḥkamat nnes, jmiɛ ak-d Israil.”

22 U x Dan inna: “Dan d ijj n mmis n wayrad nni i ineggzen ɣar zzat zi Bacan.”

23 U x Naftali inna: “A Naftali, iři tejjiwned s tcuni u teccured s lbaraka n SIDI. Ksi lɣarb d ljanub d řwart.”

24 U x Acir inna: “Aqa ittwabarek Acir ak-d iḥenjiren nnes. Iři ad yaf arḍa zeg aytmas uca ad issur aḍar nnes di zzect. 25 Zzekrunat nnec aqa aten zeg wuzzař d nnḥas, ad yiři jjehd nnec am wussan nnec!”

26 “War din iǧi am Arebbi, a Yacurun, wenni innayen x ujenna ḥima ad ac iwc afus, wenni innayen x iseynuten s lɛaḍama nnes. ◘33:26 Aɛwd. 32:13, Ica. 58:14 27 AREBBI n řebda d tazeddiɣt i udurri, u swadday ttɛawanen iɣaǧen nnes n řebda. Netta ad yaẓẓeř x řeɛdu zzat i wudem nnec, ad yini: ‘Aredeǧ!’ 28 Israil ad izdeɣ weḥḥḍes di řaman. Ad yiři wanu n Yaɛqub deg ict n temmurt iccuren n irden d binu n jdid, wah, ijenwan nnes ad udmen s nnda. ◘33:28 Irm. 23:6; 33:16; Izhd. 68:27 29 Sseɛd nnec, a Israil! Wi iǧan am cek? Ijj n řgens ittwassnejmen zi SIDI. Aqa Netta d aseřqi i uɛawen uřa d ijj n ssif n lɛaḍama nnec. Řɛedyan nnec ad ssniɛmiřen ad sswaḍɛen i cek uca cek ad tɛefsed x idemrawen nsen!”