1 Xenni igeɛɛed Musa zi řewḍat n Mu’ab ɣar wedrar n Nabu, ɣar tqiccet n Fisja nni iwejjhen Ariḥa uca isscen as SIDI marra tammurt, zi Jilɛad ař Dan, ◘34:1 Aɛwd. 3:27 2 marra Naftali d temmurt n Ifrayim d Manassa d marra tammurt n Yahuda ař řebḥar d min din awarni as, 3 d Temmurt n Ljanub d udewwar n řewḍa n Ariḥa, Tandint n Tcejjura n Tini ař Ṣuɣar. 4 Uca inna as SIDI: “Ta d tammurt nni x jjuǧeɣ i Ibrahim, d Isḥaq d Yaɛqub, nniɣ: ‘I zzariɛet nnec, ad tt wceɣ!” Jjiɣ cek ad tt tẓared s tiṭṭawin nnec, maca war tẓekkʷid ca diha.” ◘34:4 Amz. 12:7; 13:15; 15:18; 26:4; 28:13

5 Ammu i dinni immut Musa, amsexxar n SIDI, di temmurt n Mu’ab, am mammec awař i dd-iffɣen zeg uqemmum n SIDI. 6 Uca Netta inḍeř i-t di teɣzurt di temmurt n Mu’ab qibač i Bayt-Faɣur uca uřa d ijj issen amcan n wenḍeř nnes ař ass-a. 7 Tuɣa Musa ɣares mya u-ɛicrin n iseggʷusa umi immut. Tiṭṭ nnes war teɣri ca, war d as iruḥ řemɛezz. 8 Sɣuyyen ayt n Israil x Musa di řewḍat n Mu’ab třatin n wussan uca ammu i ttwakemmřen ussan n iɣuyyan d wecḍan n Musa.

9 Yacuwa, mmis n Nun, tuɣa iccur s buḥbeř n tiɣit, minzi Musa tuɣa issars xas ifassen nnes u ayt n Israil sřin ɣares uca ggin am mammec t yumur SIDI i Musa. ◘34:9 Řxř. 27:18 10 Ɛemmarṣ ɛad war dd-ikkar anabi di Israil am Musa, wenni tuɣa issnen SIDI udem ɣar wudem, 11 s marra řeɛřamat nni zi t issekk SIDI, ḥima ad tent igg di temmurt n Miṣra, zzat i firɛun d marra imsexxaren nnes d marra tammurt nnes, 12 u s marra afus nni ijehden u s marra timegga imɣaren issaggʷaden, tinni igga Musa zzat i tiṭṭawin n marra Israil.