1 Inna SIDI i Abram: “Ffeɣ zi temmurt nnec, zi temmurt mani dd-txeřqed u zi taddart n babac, ruḥ ɣar temmurt i d ac ɣa ssecneɣ. ◘12:1 Řex. 7:3; Ɛbr. 11:8. 2 Ad zzayek dd-ssuffɣeɣ ijj n řgens imɣar, ad cek barkeɣ u ad ssemɣareɣ isem nnec uca iři d cek ɛawed d lbaraka. 3 Ad barkeɣ wenni cek i ɣa ibarken d wenni cek i ɣa ineɛřen, ad t neɛřeɣ. Dayek i ɣa ttwabarkent marra řaǧat n temmurt.” ◘12:3 Amz. 18:18; 22:18; 26:4; Řex. 3:25; Gal. 3:8.   *

4 Uca iruḥ Abram am mammec d as inna SIDI, uca iruḥ Lut akides. Tuɣa Abram ɣares xemsa u-sebɛin n iseggʷusa umi dd-iffeɣ zi Ḥaran. 5 Uca indeh Abram Saray tamɣart nnes, d Luṭ mmis n umas, d marra agřa i yarebḥen, d iwdan d řmař nni dd-kesben di Ḥaran. Ffɣen zi Ḥaran ḥima ad raḥen ɣar temmurt n Kenɛan uca iwḍen ɣar temmurt n Kenɛan. ◘12:5 Řex. 7:4. 6 Iẓwa Abram zi temmurt nni ɣar wemcan n Cakim ař tacejjart n yigg n Mura. Di řweqt nni tuɣa ayt n Kenɛan zeddɣen di temmurt. ◼12:6 Cakim - isem wanita ixs ad yini ‘taɣruḍt’ niɣ ‘aɛrur’. tacejjart n yigg - niɣ ‘ibejji’. Isem nnes s tlatinit ‘Pistacia Terebintus’, xzar Amawal Amecṭuḥ n Omar Kerdja (424, 437).  ◘12:6 Amz. 10:18, 19; 13:7. 7 Iban-dd SIDI i Abram, inna as: “I zzariɛet nnec umi i ɣa wceɣ tammurt-a.” Uca ibna din ijj n uɛalṭar min xef issars taɣarṣt i SIDI, wenni d as dd-ibanen. ◼12:7 aɛalṭar- niɣ ‘řmedbeḥ’.  ◘12:7 Amz. 13:15; 15:18; 17:8; 24:7; 26:4; Aɛwd. 34:4.

8 Xenni iɛdu ssenni ɣar idurar i iǧan x ccarq n Bayt-Il uca iwta dinni iqiḍan nnes, ijja Bayt-Il x jjihet n řɣarb u Ɛay x ccarq. Din ibna ijj n uɛalṭar i SIDI uca iřaɣa Isem n SIDI. ◼12:8 Bayt-Il - isem wanita ixs ad yini ‘taddart n Arebbi’. Ɛay - isem wanita ixs ad yini ‘řxarbet’.

9 Awarni man aya ifsi Abram iqiḍan nnes, immuṭṭi zeg wemcan ɣar wemcan, ɣar Temmurt n Ljanub.

10 Idweř řaẓ di temmurt uca ikemmeř Abram x webrid nnes, ihwa ɣar Miṣra, ḥima ad izdeɣ din am ubarrani, minzi tuɣa řaẓ imɣar di temmurt. 11 Řami dd-tiweḍ řweqt nni umi i ɣa yudef ɣar Miṣra, inna i Saray, tamɣart nnes: “Xzar, aqa ssneɣ belli cem d tamɣart dayes aẓri. 12 Xmi cem i ɣa ẓaren Imiṣriyyen, zemmaren ad inin: ‘Ta d tamɣart nnes!’, ad ayi nɣen uca ad cem jjen di tudart. 13 Ini, aqa cem d učma, ḥima ad ayi yiři řxir di ṭṭweɛ nnem uca ad iqqim řeɛmar inu iddar i cem.” ◘12:13 Amz. 20:12; 26:7.

14 Imsar umi yudef Abram ɣar Miṣra, ẓrin Imiṣriyyen belli tamɣart teṣbeḥ aṭṭas. 15 Uřa d řḥukkam n firɛun, ajeǧid, ẓrin tt uca ssemɣaren tt ɣar Firɛun uca iwyen tt ɣar taddart n firɛun. 16 Uca imṣuref Firɛun mlih ak-d Abram di ṭṭweɛ nnes. Ammu i iksi uǧi d ifunasen d tfunasin d yeɣyař d isemɣan d tiyya d teɣyař d iřeɣman. ◼12:16 iřeɣman - iřeɣman di Israil u di temmura nneɣni di Ccarq Ameřwasu d iřeɣman s yijj n tgeɛrurt waha. 17 Maca SIDI iwta firɛun d aytbab n taddart nnes s jjrayeḥ mɣarent di řesbab n Saray, tamɣart n Abram. ◘12:17 Izhd. 105:14. 18 Xenni firɛun iřaɣa-dd i Abram, inna as: “Manawaya i dayi teggid? Maɣar war d ayi tennid belli nettat d tamɣart nnec? 19 Mayemmi tennid: ‘Nettat d učma!’, ařami tt ggiɣ necc d tamɣart i yixef inu? Řexxu xzar, aqa ac tamɣart nnec, ksi tt, tbeɛɛded!” 20 Yumur firɛun iryazen nnes xas uca ssqebbḍen t ak-d temɣart nnes u ak-d marra min tuɣa ɣares.