11
Ṣṣumɛet n Babil
1 Tuɣa marra tammurt s yiřes d ijjen u s řhard d ijjen.
2 Imsar řami fesyen iqiḍan nsen
uca ffɣen-dd zi ccarq, ufin ijj n řewḍa di temmurt n Cinɛar, uca
qqimen zeddɣen dinni.
◘ 3 Nitni nnan, kuř ijj i wenneɣni: “Araḥem-dd, ad negg iẓra zi třaxt, ad ten nesseḥma!” Ammu i d asen tedweř třaxt d aẓru u acarmuḍ
idweř ɣarsen d tarrist.
4 Xas uca nnan: “Zid, ad nebna ict n tendint d ict n ṣṣumɛet, taqiccat nnes
ad dd-taweḍ ɣar ujenna, u jjem aneɣ ad negg ijj n yisem i neccin, ḥima war nᵉttemsebḍi ca x wudem n marra tammurt.”
◘ 5 Xenni ihwa-dd SIDI, ḥima ad iẓar tandint d ṣṣumɛet nni bnan tarwa n bnadem.
6 Inna SIDI: “Xzar, aqa aten d řgens d ijjen u marra ina ɣarsen ijj n yiřes. Wa d beddu n min ɣa ggen. Řexxu war din min ten i ɣa issbedden x webrid nsen nni nwan ad ggen.
7 Araḥem-dd, ad nehwa uca ad nessxarweḍ iřes nsen, ḥima kuř ijjen war ifehhem
ɛad iřes n wenni t yudsen.”
8 Ammu i ten izzuzar SIDI ssenni x wudem n marra tammurt uca ssbedden řebni n tendint.
◘ 9 X uya i d as řaɣan
i tendint nni s yisem n ‘Babil’, minzi din issxarweḍ SIDI iřes n marra tammurt u ssenni i ten izzuzar SIDI x wudem n marra tammurt.
Ina d imezruyen n yinni dd-ittwaxeřqen zi Cam. ◼
Tarwa n Cam
10 Umi tuɣa ɣar Cam mya n iseggʷusa, ijja-dd
Arfakcad, tnayen n iseggʷusa awarni i sseḥřet.
◼ ◘ 11 Awarni řami dd-ijja Arfakcad, iddar Cam
ɛad xemsa-mya n iseggʷusa, uca ijja-dd iḥenjiren d tḥenjirin.
◼ 12 Iddar Arfakcad xemsa u-třatin n iseggʷusa,
xenni ijja-dd
Calaḥ.
◼ 13 Awarni řami dd-ijja Arfakcad Calaḥ, iddar
ɛad arebɛa-mya u-třata n iseggʷusa, uca ijja-dd iḥenjiren d tḥenjirin.
14 Iddar Calaḥ třatin n iseggʷusa,
xenni ijja-dd
Ɛabir.
◼ 15 Awarni řami dd-ijja Calaḥ Ɛabir, iddar
ɛad arebɛa-mya u-třata n iseggʷusa, uca ijja-dd iḥenjiren d tḥenjirin.
16 Iddar Ɛabir arebɛa u-třatin n iseggʷusa,
xenni ijja-dd
Falaj.
◼ 17 Awarni řami dd-ijja Falaj, iddar Ɛabir
ɛad arebɛa-mya u-třatin n iseggʷusa, uca ijja-dd iḥenjiren d tḥenjirin.
18 Iddar Falaj třatin n iseggʷusa,
xenni ijja-dd
Raɛuw.
◼ ◘ 19 Awarni řami dd-ijja Raɛuw, iddar Falaj
ɛad mitayen u-tesɛa n iseggʷusa, uca ijja-dd iḥenjiren d tḥenjirin.
20 Iddar Raɛuw tnayen u-třatin n iseggʷusa,
xenni ijja-dd
Saruj.
◼ 21 Awarni řami dd-ijja Saruj, iddar Raɛuw
ɛad mitayen u-sebɛa n iseggʷusa, uca ijja-dd iḥenjiren d tḥenjirin.
22 Iddar Saruj třatin n iseggʷusa,
xenni ijja-dd
Naḥur.
◼ 23 Awarni řami dd-ijja Naḥur, iddar Saruj
ɛad mitayen n iseggʷusa, uca ijja-dd iḥenjiren d tḥenjirin.
24 Iddar Naḥur tesɛa u-ɛicrin n iseggʷusa,
xenni ijja-dd
Taraḥ.
◼ 25 Awarni řami dd-ijja Naḥur Taraḥ, iddar
ɛad mya u-tesɛaṭac n iseggʷusa, uca ijja-dd iḥenjiren d tḥenjirin.
26 Iddar Taraḥ sebɛin n iseggʷusa, xenni ijja-dd Abram, Naḥur d Haran.
Ina d imezruyen n yinni dd-ittwaxeřqen zi Taraḥ. ◼
27 Taraḥ ijja-dd Abram, Naḥur d Haran, u Haran ijja-dd Luṭ.
◘ 28 Immut Haran zzat i babas Taraḥ di temmurt mani dd-ixřeq netta, di Ur n Ikaldaniyyen.
29 Uca ksin Abram d Naḥur i yixef nsen timɣarin. Isem n temɣart n Abram tuɣa-t d Saray u isem n temɣart n Naḥur d Milka, yeǧis n Haran, babas n Milka d Yiska.
◘ 30 Saray tuɣa-tt war dd-tᵉttiruw, tuɣa war ɣares bu uḥenjir.
◘ 31 Uca iksi Taraḥ Abram, mmis, d Luṭ mmis n Haran, mmis n mmis, d Saray, tasřit nnes, tamɣart n mmis Abram, uca nitni ffɣen jmiɛ zi Ur n Ikaldaniyyen, ḥima ad raḥen ɣar temmurt n Kenɛan. Iwḍen ɣar Ḥaran uca zeddɣen dinni.
◼ ◘ 32 Umi tegga Taraḥ mitayen u-xemsa n iseggʷusa, immut Taraḥ di Ḥaran.