1 Deg wass wiss arebɛa u-ɛicrin n uyur-a munen ayt n Israil s uẓummi u řeḥḥfen deg warruḍ n txuncay n wecḍan u s tɛejjajt x uzeǧif. ◼9:1 deg warruḍ n wecḍan - s Tɛibranit ‘s txancet’. taɛejjact - s Tɛibranit ‘acař’. 2 Bḍan zzariɛet n Israil ixef nsen zi marra ibarraniyyen, uca am qqimen kkaren, neɛmen zi ddnub nsen d řmuɛṣiyyet n řejdud nsen. 3 Xas uca dewřen bedden deg wemcan nsen ɛawed uca ɣrin asen ict n terbaɛt n wass zeg wedlis ittwannḍen n Ccariɛa n SIDI, AREBBI nsen, uca ict n terbaɛt nneɣni neɛmen nitni s ddnub nsen uca sejden i SIDI, AREBBI nsen. 4 X ddruj n Ilawiyyen ibedd Yecuɛa d Bani, Qadmiyil, Cabanya, Bunni, Carabya, Bani d Kanani, řaɣan s tmijja ijehden ɣar SIDI, AREBBI nsen. 5 Uca Ilawiyyen, Yecuɛa, Qadmiyil, Bani, Ḥacabniya, Carabya, Hudiya, Cabanya d Fataḥya, nnan: “Kkarem, tbarkem SIDI, AREBBI nwem, zi řebda ař řebda! Iři ad ittwabarek Isem n uɛuǧi nnec, wenni yuɛřan x marra lbaraka d usemɣar!”

6 “Cek d SIDI, mɣir Cek. Cek teggid ajenna uřa d ajenna n ijenwan d marra tizemmar nsen, tammurt d marra min xas iǧan, řebḥur d marra min dayes iǧan u Cek tewcid asen tudart uca řɛeskarat n ujenna ttbendaqent i Cek. ◘9:6 Amz. 1; Izhd. 146:6; Řex. 14:15; 17:24; Asa. 14:7

7 Cek d SIDI, AREBBI, wenni ifarzen Abram. Cek tessuffɣed t-i-dd zi Ur n Ikaldaniyyen uca teggid as Ibrahim. ◘9:7 Amz. 11:31, 32; 12:1

8 Cek tufid uř nnes dayes řaman zzat i wudem nnec u teggid akides Řɛahd belli Cek ad tewced i zzariɛet nnes tammurt n ayt n Kenɛan, n Iḥittiyyen, n Imuriyyen, n Ifariziyyen, n Iyabusiyyen u n Ijirjasiyyen, uca teggid ɛlaḥsab awařen nnec, minzi Cek d amsegged i teǧid. ◘9:8 Amz. 12:7; 13:15; 15:6, 18; 17:8; 26:4

9 Cek teẓriḍ tamara n řejdud nneɣ di Miṣra u tesřid iɣuyyan nsen zi ɣar Řebḥar n Telga. ◘9:9 Uf. 3:7; 14:10

10 Cek teggid řeɛřamat d lmuɛjizat ɣar firɛun u ɣar marra imsexxaren nnes u jar řgens n temmurt, minzi Cek tessned, aqa nitni ggin ḍidd nsen s tuffet uca Cek teggid i yixef nnec ijj n Isem, am teǧa ass-a. ◘9:10 Uf. 7; 8; 9; 10; 11; 12; 14

11 Cek tebḍid řebḥar zzat i wudem nsen ařami nitni ɛdun x temmurt yuẓɣen di řwesṭ n řebḥar, uca inni xasen ittaẓẓřen tenḍared ten di řaǧaɣ am yijj n weẓru deg waman ijehden. ◘9:11 Uf. 14:22-31

12 Zeg ijj n uqellij n useynu tgewwded ten s wass u s yijj n uqellij n tmessi s ǧiřet, ḥima ad asen tewced tafawt x webrid i x i ɣa uyuren. ◘9:12 Uf. 13:21; 14:19; 40:38; Izhd. 105:39

13 Cek tehwid-dd x wedrar n Sina u tessiwřed akidsen zeg ujenna uca tewcid asen lfarayiḍ iseggden d izerfan i di iǧa řaman d tweṣṣa d řumurat iṣebḥen. ◘9:13 Uf. 19:20; 20:1-21

14 Tessecned asen ssebt nnec iqeddsen uca teggid xasen řumurat d tweṣṣa d Ccariɛa s tsexxart n Musa, amsexxar nnec.

15 Cek tewcid asen aɣrum zeg ujenna i řaẓ nsen uca tessuffɣed asen-dd aman zi teṣḍart i ufadi nsen uca tennid asen ad adfen ɣar temmurt, tenni i tessgeɛɛded afus nnec ḥima ad tejjaǧed ad ten tt-i-dd-tewced, ḥima ad tt ṭṭfen d řwart.” ◘9:15 Uf. 16:14; 17:6; Řxř. 20:9

16 “Aqa nitni ak-d řejdud nneɣ ggin s tuffet d tɣennant u war sřin ca ɣar řumurat nnec.

17 Nitni ugin ad ɣares sřen, war fekkaren di lmuɛjizat nnec i ɣarsen teggid u nitni ɣennan u deg uɣewweɣ nsen ggin ijj d uzeǧif x yixef nsen ḥima ad ɛeqben ɣar tesmuɣi nsen. Maca Cek d ijj n Arebbi iɣeffaren, dayek řxaḍar d arreḥmet, ɣarek ttasiɛ n řxaḍar d tamexsiwt icewwaren s waṭṭas, u Cek war daysen tesmiḥed ca. ◘9:17 Uf. 34:7; Řxř. 14:4, 18; Izhd. 86:5

18 Ɛad, umi ggin nitni ijj n uɛejmi ifesyen i yixef nsen, nnan: ‘Wa d arebbi nnec i cek i dd-issuffɣen zi Miṣra’, uca ceqqfen aṭṭas, ◼9:18 aɛejmi - niɣ ‘amwa’, ‘ayenduz’ niɣ ‘yuggu’.  ◘9:18 Uf. 32 19 aqa Cek di arreḥmet nnec tameqqrant war ten tejjid ca di řexřa. Aqellij n useynu i iǧan ḥima ad ten igewwed s wass, war xasen iggʷij ca, uřa d aqellij n tmessi i iǧan ḥima ad asen iwc tafawt deg webrid i x i ɣa uyuren, war xasen iggʷij ca s ǧiřet. ◘9:19 Uf. 13:22; 40:38

20 Cek tewcid Arruḥ nnec aṣebḥan, ḥima ad ten isseřmed, u Cek war d asen tekkised ca ‘manna’ nnek zeg uqemmum nsen uca tewcid asen aman i ufadi nsen. ◘9:20 Řxř. 11:17; Yac. 5:12

21 Arebɛin n iseggʷusa cek tᵉtthellid daysen di řexřa. War ɣarsen ittxiṣṣa uřa d ca n řḥajjet, arruḍ nsen war yarci ca uca iḍaren nsen war uffen. ◘9:21 Aɛwd. 2:7; 8:4; 29:5

22 Cek tewcid asen marra tigeldiwin d řegnus uca tebḍid asen ten d tasɣart s ijj n weymir. Nitni ṭṭfen tammurt n Siḥun d řwart, aqa-tt d tammurt n ujeǧid n Ḥacbun, d temmurt n Ɛuj, ajeǧid n Bacan. ◘9:22 Řxř. 21:21, 33

23 Cek tarrid iḥenjiren nsen aṭṭas am yitran deg ujenna u tessidfed ten ɣar temmurt i x tuɣa tennid i řejdud nsen, ad ɣares dd-adfen ḥima ad tt ṭṭfen d řwart. ◘9:23 Amz. 22:17

24 Yudef ɣares warraw uca ṭṭfen tt d řwart u zzat i wudem nsen aqa teggid imezdaɣ n temmurt sadu afus nsen, uřa d ijeǧiden nsen d řegnus n temmurt, ḥima ad zzaysen ggen min i d asen ittɣiř mliḥ.

25 Nitni ḥewwsen tineddam ifaryen d ict n temmurt isseɣmayen u nitni ṭṭfen ɛawed tudrin d řwart ccurent s marra řxar, anuten ittwaɣzen, imarjaɛen n uḍiř d řeɛraṣit n zzitun d tcejjura n fruta s ufeyyeḍ, uca nitni ccin, jjiwnen, dewřen ṣeḥḥen uca arrin-dd meẓri s tcuni nnec tameqqrant.

26 Maca nitni dewřen war ṭṭiɛen uca ɣewwɣen xak uca nḍaren Ccariɛa nnec u nɣin inabiyyen nnec inni tuɣa icehhden jar asen maḥend ad ten dd-arren ɣarek. Aqa ceqqfen dayek s yijj n uceqqef imɣar. ◘9:26 1 Ij. 18:4; 19:10; 2 Im. 24:20, 21

27 S uya tarrid ten deg ufus n iɣrimen nsen inni i ten iḥṣaren, maca mařa řaɣan-dd xak di řweqt n řeḥṣaret nsen, xenni tesřid ɣarsen zeg ujenna uca di arreḥmet nnec tameqqrant tewcid asen imsenjamen nni i ten ifekken zeg ufus n iɣrimen nsen. ◘9:27 Řqḍ. 2:14-23

28 Mařa ufin řhudnet, ggin ɛawed řɣar zzat i wudem nnec uca teggid ten deg ufus n řɛedyan nsen uca nitni seǧḍen xasen. Umi tuben, řaɣan-dd xak, aqa tesřid asen zeg ujenna u ammu i tfekked i-ten s arreḥmet nnec aṭṭas n twařawin.

29 Cek tcehded ḍidd nsen ḥima ad dd-ɛeqben ɣar Ccariɛa nnec, maca nitni ggin s tuffet u war sřin ca ɣar tweṣṣa nnec. Aqa xḍan zi jjihet n lfarayiḍ nnec, umi bnadem wenni i zzaysen i ɣa yegg ad zzaysent iddar, uca nitni arrin-dd ɣarsen aɛrur, tuɣa ssqesḥen iri nsen, war ɣarek dd-sřin. ◘9:29 Lawi 18:5; Ḥiz. 20:11; Rum. 10:5; Gal. 3:12

30 Aṭṭas n iseggʷusa tḥemmřed akidsen, tcehded ḍidd i nsen s Arruḥ nnec, s tsexxart n inabiyyen, maca nitni war sřin. S uyenni tewcid ten deg ufus n řegnus n temmura. ◘9:30 2 Ij. 17:13; 2 Im. 36:15

31 Maca di arreḥmet nnec tameqqrant war ten taredǧed ca u war daysen tesmiḥed ca, maɣar cek d ijj n Arebbi d aḥnin d arḥim.

32 “Xenni řexxu, AREBBI nneɣ, aqa Cek, Arebbi d ameqqran, izemmaren, issaggʷaden, wenni ittᵉṭṭfen di Řɛahd u di tmexsiwt icewwaren, war ḥesseb ca drus marra řeɣben i xaneɣ dd-ikkin, x ijeǧiden nneɣ, x řḥukkam nneɣ u x ikehhanen nneɣ u x inabiyyen nneɣ u x řejdud nneɣ u x marra řgens nneɣ zeg wussan n ijeǧiden n Accur ař ass-a.

33 Tuɣa Cek d amsegged di marra min xaneɣ ikkin, maɣar Cek teggid aneɣ s řaman, maca neccin negga s řeqjaḥet. ◘9:33 Aɛwd. 32:4; Dan. 9:14

34 Ijeǧiden nneɣ, řḥukkam nneɣ, ikehhanen nneɣ d řejdud nneɣ war ḍeffaren Ccariɛa nnec uca war sřin ɣar řumurat nnec uřa ɣar cchadat nnec nni tcehded ḍidd i nsen.

35 S tgeldit nsen u s řxar nsen aṭṭas i d asen tewcid u s temmurt tameqqrant isseɣmayen i d asen tewcid, war Cek sexxaren ca uca war tuben zi tmegga nsen tiɛeffanin.

36 Xzar ass-a aqa neccin d imsemɣan u tammurt i tewcid i řejdud nneɣ maḥend ad zzayes necc řɣiǧet d řxar, xzar aqa neccin d imsemɣan i dayes neǧa.

37 Řɣiǧet tameqqrant nnes ad traḥ ɣar ijeǧiden, inni i xaneɣ teggid di ssibbet n ddnub nneɣ, uca nitni ttṣeǧaḍen x arrayem nneɣ u x řmař nneɣ am mammec d asen ittɣiř mliḥ, u neccin aqa aneɣ di řeḥṣaret d tameqqrant.”