1 Deg Ikuniya udfen nitni jmiɛ ɣar temzida n Wudayen uca ssiwřen ařami umnen aṭṭas n řɣaci, am Wudayen am Iyunaniyyen. 2 Maca Udayen inni war yuminen, ssekkaren iryazen n tendint i yeǧan zi řegnus, maḥend ad ssɛiǧten tawmat. 3 Waxxa amenni kkin dinni aṭṭas n řweqt, ttbarrḥen s bṭayṭay s SIDI. U Netta tuɣa ittic cchadet i Wawař n arḍa nnes s řeɛřamat d řeɛjayeb i igga s ifassen nsen. ◘14:3 Mk. 16:20; Řex. 19:11; Ɛbr. 2:4. 4 Marra řɣaci n imezdaɣ n tendint immsebḍa. Ca zzaysen ruḥen ak-d Wudayen u ca nneɣni ak-d rrusul. 5 Tuɣa din ict n tmeɛmuč xasen zeg yinni zi řegnus u zeg Wudayen ak-d imeqqranen nsen, ḥima ad xasen karfsen u ḥima ad ten arejmen. 6 Řami ssnen man aya, ffɣen-dd uca arewřen ɣar tneddam n Likaɛunya, aqa aten d Listra d Dirbi, u ɣar dcurat i d as dd-innḍen, ◘14:6 Mt. 10:23; Řex. 8:1. 7 uca ttbarrḥen dinni s Řexbar Aṣebḥan.

8 Tuɣa izeddeɣ ijj n weryaz di Listra wenni d aneɛḍab deg iḍaren nnes, aqa-t d aqejdaḥ zeg uɛeddis n yemmas, war yuyur ɛemmarṣ. ◘14:8 Řex. 3:2. 9 Tuɣa ittesřa i Bulus am issawař netta. Řami t iẓra Bulus, yuca aqa dayes l’iman ḥima ad ittwassgenfa. 10 Inna as s ict n tmijja tejhed: “Ad ac iniɣ deg Yisem n Siditneɣ Yasuɛ Lmasiḥ, kkar, tbedded nican x iḍaren nnec!” Ingez, ikkar, uca iggur.

11 Řami iẓra řɣaci min igga Bulus, ssgeɛɛden tmijja nsen, nnan s řhard n temmurt nni: “Aqa irebbiten dewřen arewsen deg iwdan, hwan-dd ɣarneɣ!” ◘14:11 Řex. 28:6. 12 Nitni semman Bar-Naba s yisem ‘Sidi n irebbiten’, u Bulus s yisem ‘Hirmis’, minzi netta izwar ɣar wawař. 13 Akehhan n ‘Sidi n irebbiten’ tuɣa barra i tendint, yiwi iyenduzen d tseddiyin n nnuwwac ɣar tiwwura n řemraḥ mani qqimen, tuɣa ixs ad ten iqeddem d tɣarṣt i nitni.

14 Řami sřin Bar-Naba d Bulus x man aya, carrgen arruḍ nsen, negzen, ffɣen ɣar barra jar řɣaci, sɣuyyun, nnan: 15 “A iryazen, min i tᵉtteggem? Uřa d neccin d lbacar d ijjen am kenniw, nettbarreḥ kenniw ḥima ad tbeɛɛdem x tmesřayin-a ibeṭṭřen, ḥima ad tubem ɣar AREBBI iddaren i dd-ixeřqen ajenna d temmurt d řebḥar d marra min daysen. ◘14:15 Amz. 1:1; Izhd. 33:6; 124:8; 146:6; Řex. 10:26; Asa. 14:7; 19:10; 22:9. 16 Di řweqt n řejyuř iɛdun ijja Netta marra řegnus ad uyuren deg ibriden nsen, ◘14:16 Izhd. 81:13. 17 waxxa war ijji Ixef nnes břa cchadet am d asen iwca tcuni zeg ujenna, issehwa-dd anẓar u iwca aṭṭas n řɣiǧet di řweqt nsen ittwaggen uca issjiwen uřawen nneɣ s macca d řefraḥet.” ◘14:17 Rum. 1:19. 18 Waxxa ssawařen amenni, tuɣa ɛad iqseḥ xasen ad ssbedden řɣaci, maḥend uřa d ijj war ittqeddim tiɣarṣin i nitni.

19 Maca usin-dd Wudayen zi Ikuniya d Antiyuxiya, ssḥarrcen xasen řɣaci uca arejmen Bulus, jarren t barra i tendint, minzi ittɣiř asen aqa immut. ◘14:19 2 Kur. 11:25. 20 Maca am d as dd-nnḍen imeḥḍaren, ikkar uca yudef ɣar tendint. Xenni tiwecca nnes iffeɣ ak-d Bar-Naba, iwḍen nitni ɣar tendint n Dirbi.

21 Umi barrḥen s Řexbar Aṣebḥan i imezdaɣ n tendint nni, ggin aṭṭas n imeḥḍaren. Xenni ɛeqben ɣar Listra d Ikuniya d Antiyuxiya, 22 ggin uř di řeɛmur n imeḥḍaren, ɛeřmen asen ad cebbaren di l’iman, nnan asen belli ittxeṣṣa ad nadef ɣar Tgeldit n AREBBI s waṭṭas n řemḥayem. ◘14:22 Mt. 10:38; 16:24; Lk. 24:26; Řex. 11:23; 13:43; 2 Tim. 3:12. 23 Areccḥen imɣaren di kuř tamesmunt am ttẓuman u ttẓaǧan akidsen, uca xenni sellmen ten i Siditneɣ i di umnen nitni. 24 Xas uca ẓwan Pisidiya, usin-dd ɣar Pamfiliya. 25 Awarni řami ssiwřen s Wawař n SIDI di Pirxa, hwan-dd ɣar Attalya. 26 Ssenni ruḥen di řebḥar ɣar Antiyuxiya minzi ssenni tuɣa ttwassqebbḍen i arḍa n SIDI di ṭṭweɛ n řxedmet tenni aqa kemmřen. ◘14:26 Řex. 13:1. 27 Řami din iwḍen, řaɣan x tmesmunt, xebbaren s marra řexdayem timeqqranin i yegga AREBBI s ifassen nsen u mammec yarzem tawwart n l’iman i řegnus. 28 Uca qqimen din ict řweqt d azirar ak-d imeḥḍaren. *