1 Bulus, amsexxar n Yasuɛ Lmasiḥ, rrasul ittwařaɣan d ittwasekken, ittwaḥuzen i L’Injil n AREBBI ◘1:1 Řex. 9:15; 13:2; Gal. 1:15. 2 - L’Injil nni izzar iwaɛd zzayes zeg umewaru s inabiyyen nnes di Tira Iqeddsen - ◘1:2 Amz. 3:15; 22:18; 26:4; 49:10; Aɛwd. 18:15; 2 Ṣm. 7:12; Izhd. 132:11; Ica. 4:2; 7:14; 9:5; 40:10; Irm. 23:5; 33:14; Ḥiz. 34:23; 37:24; Dan. 9:24; Mixa 7:20. 3 x Mmis, wenni dd-ittwaxeřqen zi jjihet n weysum zi zzariɛet n taddart n Dawud, ◘1:3 Mt. 1:1; Lk. 1:32; Řex. 2:30; 13:23; 2 Tim. 2:8. 4 maca zi jjihet n jjehd d Arruḥ Iqeddsen i dd-issnekkaren Yasuɛ Lmasiḥ, Siditneɣ, zi taddart n imettinen, aqa ittwassargeb d Mmis n AREBBI. ◘1:4 Ica. 9:5; 44:6; 54:5; Yḥ. 2:19; Rum. 9:5; 1 Yḥ. 5:20. 5 Maɣar zzayes i neṭṭef arḍa u zzayes i nettwařaɣa d rrusul jar marra řegnus ḥima ad ṭṭaɛen řegnus i l’iman deg Yisem nnes, 6 maɣar uřa d kenniw tᵉttwařaɣam zi řegnus s Yasuɛ Lmasiḥ. 7 Ɣar marra inni iǧan di Ruma, a imɛizzen n AREBBI, inni ittwařaɣan d inni d imqeddasen: arḍa d řehna ad kidwem iřin zi AREBBI Babatneɣ u zi Siditneɣ Yasuɛ Lmasiḥ. ◘1:7 1 Kur. 1:2; Afa. 1:1.

8 Amezwar ttcekkareɣ AREBBI inu s Yasuɛ Lmasiḥ zi jjihet nwem marra, minzi l’iman nwem aqa sřin xas di ddunect marra. 9 Maɣar AREBBI, wenni ɛebbdeɣ di Arruḥ di L’Injil n Mmis, iched xafi aqa necc ttidareɣ kenniw řebda di tẓaǧitin inu. ◘1:9 Rum. 9:1; 2 Kur. 1:23; 11:31; Gal. 1:20; Fil. 1:8; 1 Ts. 2:5; 2 Tim. 1:3. 10 Ttẓaǧiɣ ad ayi tᵉttwarzem zi řexxu d tsawent ict n tewwart s array n AREBBI, maḥend ad ɣarwem dd-aseɣ. ◘1:10 Rum. 15:23,32. 11 Minzi weḥḥceɣ ad kenniw ẓareɣ u ad awem wceɣ ca n tmewca n Arruḥ, ḥima ad dayes tᵉttwassmetnem. ◘1:11 Rum. 15:29; 1 Ts. 3:10. 12 Ad nettwassfewwej jmiɛ s l’iman nwem d wenni inu. 13 Maca xseɣ, a aytma, ad tessnem belli aṭṭas n imuren ggiɣ ad ɣarwem dd-aseɣ, maca ař ass-a ttwamenɛeɣ, ḥima ad ɣari tiři řɣiǧet daywem ɛawed, am mammec di řegnus nneɣni, ◘1:13 1 Ts. 2:18. 14 maɣar Necc d bu-umarwas maḥend ad barrḥeɣ s L’Injil i Iyunaniyyen u i ibarbariyyen, i ayt n tiɣit u i ibuhařiyyen, i marra iwdan. ◘1:14 1 Kur. 9:16. 15 Ammu i ttwajebdeɣ maḥend ad barrḥeɣ s Řexbar Aṣebḥan uřa i kenniw i yeǧan di Ruma. 16 Minzi war ttseḍḥiɣ ca s L’Injil, minzi netta d jjehd n AREBBI i Tudart i marra wi yumnen, i yinni yumnen zeg Wudayen ɣar umezwar, uca xenni ɛawed i yinni zeg Iramiyyen. ◘1:16 Izhd. 40:10; 1 Kur. 1:18; 15:2; 2 Tim. 1:8. 17 Minzi tasegda n AREBBI aqa tban dayes di L’Injil zi l’iman ɣar l’iman, am mammec tura:

‘Amseggad s l’iman ad iddar.’ ◘1:17 Ḥab. 2:4; Yḥ. 3:36; Rum. 3:21; Gal. 3:11; Fil. 3:9; Ɛbr. 10:38.

18 Minzi aɣḍab n AREBBI ittban-dd zeg ujenna x marra řmuɛṣiyyet d tuɛeffna n iwdan inni issdurruyen tidett s řmuɛṣiyyet, 19 minzi tussna n AREBBI ittban daysen, minzi AREBBI aqa isscen asen t-i-dd. ◘1:19 Řex. 14:17. 20 Minzi min innuffaren n AREBBI, aqa ittwaẓar s řeɛqeř s yinni zzayes dd-ittwaxeřqen zeg wami tᵉttwagg ddunect, am jjehd nnes n řebda, am tifras nnes n AREBBI, ařami nitni war ɣarsen bu smaḥet. ◘1:20 Izhd. 19:2. 21 Minzi, umi ssnen AREBBI, war t ssɛuǧen niɣ war t cekkaren am AREBBI, maca dewřen beṭṭřen deg ixariṣṣen nsen uca uř nsen ibarcen, ařami idweř břa ɛeqř. ◘1:21 Aɛwd. 28:28 22 Umi ḥessben ixef nsen d imiɣisen, dewřen d ifɣař, 23 beddřen aɛuǧi n AREBBI i war ifennin s ca deg warwas n ṣṣifet n bnadem ifennan, deg warwas n ijḍaḍ, n imuddaren s arebɛa n iḍaren u n imuddaren nni ittbuɛen x temmurt. ◼1:23 imuddaren - ixs ad yini ‘iwdan’ d ‘lḥayawanat’ d marra min iddaren nni izemmar ad yuyur.  ◘1:23 2 Ij. 17:29.

24 S uyenni isellem i-ten AREBBI ɣar nnecwat ixemjen n wuřawen nsen ḥima ad ssfeḍḥen arrimat nsen jar asen. 25 Aqa nitni beddřen tidett n AREBBI s uxarriq, ɛebden u sexxaren i min dd-ittwaxeřqen sennej i Wenni dd-ixeřqen kuřci, Wenni umi ɣar iǧa marra asemɣar d marra lbarakat i řebda qaɛ. Amin.

26 S uyenni isellem i-ten AREBBI ɣar ccehwat infeḍḥen, minzi uřa d timɣarin nsen beddřent abrid n ṭṭbiɛet, ttnumant i min war iǧin d ṭṭbiɛet. ◘1:26 Lawi 18:22, 23. 27 Amenni iryazen ɛawed jjin tamunt ɛlaḥsab ṭṭbiɛet ak-d temɣarin, deɛqen s nnecwat ak-d wayawya: iryazen i itteggen řefḍiḥet ak-d yeryazen uca qebbřen deg ixef nsen řmunet i isdaheǧen i uweddar nsen. 28 Minzi war xsen ad kksen awař maḥend ad ssnen AREBBI, isellem i-ten AREBBI ɣar řeɛqeř war isekkwin ḥima ad ggen min war iɛeddřen. 29 Nitni ɛemmaren s ɛřam kuř řmuɛṣiyyet, s farq-ccɣeř d tarzugi d tuɛeffna d ṭṭmeɛ, s řeḥsed d wenɣay d umenɣi d teḥraymect d inwayen iɛeffnen. 30 Nitni ssawařen s řɣar, ttceqqafen, carrhen AREBBI, nitni d imeɣṣaben d imɛeffaren d ayt n bu-uqemmum d imesuffɣen n tuɛeffna, war ɣarsen bu řɛqeř, nitni war ṭṭiɛen i lwalidin nsen, 31 war daysen uř imten, war daysen tayri d weṣřaḥ uřa d arreḥmet. 32 Waxxa nitni ssnen řḥukm n AREBBI - aqa inni itteggen aya sdaheǧen řmewt - nitni war tteggen marra man aya waha, maca areṭṭan ɛawed x yinni itteggen timesřayin-a. ◘1:32 Ḥuc. 7:3.