7
Řeɛřamet n Ɛimmanu-Il
1 Deg wussan n Aḥaz, mmis n Yutam, mmis n Ɛuzziya, ajeǧid n Yahuda, igeɛɛed Raṣin, ajeǧid n Aram, ak-d Faqaḥ, mmis n Ramalyahu, ajeǧid n Israil, ɣar Urcalim maḥend ad immneɣ akides. Maca netta war izemmar ad xas iɣelleb. ◘7:1 2 Ij. 16:5; 2 Im. 28:5 2 Umi ḥajan i taddart n Dawud, nnan: “Aqa ihwa Aram x Ifrayim!”, yarjij wuř n ujeǧid d wuř n řgens nnes, am mammec ttarjijint tcejjura n wezɣar s usemmiḍ. ◼7:2 azɣar - niɣ ‘řɣabet’ niɣ ‘tazgant’.
3 Inna SIDI i Icaɛya: “Ffeɣ i umsagar ak-d Aḥaz, cek d mmic Ca’ar-Yacub, ɣar uneggar n uqadus n waman n uyeřman n sennej, wenni iǧan ɣar webrid yuɛran ɣar Weḥwic n Uṣebban. 4 Ini as: ‘Ḥḍa, ars, war tteggʷed ca u war ttejji uř nnec ad yarxu x tnayen n isefḍawen n ukeccuḍ idduxxunen, x uxeyyeq yarɣin n Raṣin d Aram, u n mmis n Ramalyahu, 5 umi ixarreṣ Aram di řɣar xak, jmiɛ ak-d Ifrayim u ak-d mmis n Ramalyahu, inna: 6 ‘Ejj aneɣ ad ngeɛɛed x temmurt n Yahuda uca ad as nessiggʷed uca ad tt nebḍa jar aneɣ u xenni ad negg dinni mmis n Ṭabyil d ajeǧid.’ 7 Ammu i iqqar Sidi inu, SIDI: ‘Aya war ittiři, aya war ittemmsar ca!’ 8 Maɣar azeǧif n Aram d Dimacq u azeǧif n Dimacq d Raṣin - waxxa ammenni iqqim ɛad mɣir xemsa u-settin n iseggʷusa xenni ad yarẓ Ifrayim ař war ittiři ɛad d řgens - 9 uca azeǧif n Ifrayim d Samarya u azeǧif n Samarya d mmis n Ramalyahu. Mařa war tuminem, war tᵉttɣimam ad tbeddem.”
10 Yarni SIDI ɛad deg wawař ak-d Aḥaz, inna: 11 “Ttar ict n řeɛřamet i yixef nnec zi SIDI, AREBBI nnec, ttar i-tt swadday di raǧaɣ niɣ ttar i-tt dinni sennej di řuɛřa.” 12 Maca Aḥaz inna: “Necc war tt ttᵉttareɣ ca u war ttqeǧabeɣ SIDI.” 13 Xenni inna netta: “Sřem, kenniw a taddart n Dawud, ma war kenniw iqedd ad tessiḥřem iwdan, aqa kenniw tessiḥřem ɛawed uřa AREBBI inu? 14 S uya ad awem iwc Sidi inu simant nnes řeɛřamet. Xzar, taɛzarect ad teysi ddeyset, ad taru Mmis, ad as tegg ‘Ɛimmanu-Il’, ixs ad yini ‘SIDI aqa-t akidneɣ’. ◘7:14 Mt. 1:23; Lk. 1:31 15 Netta ad icc trussi d tamment ař ɣa iften ad inḍar min war iḥřin u ad ixḍar min iṣebḥen. 16 Maɣar qbeř i ɣa issen uḥenjir ad inḍar min war iḥřin u ad ixḍar min iṣebḥen, ad texřa temmurt nni n tnayen n ijeǧiden i zi cek tᵉṭṭfed tiggʷudi. 17 Ad issiweḍ SIDI xak u x řgens nnec u x taddart n babac s ufus n ujeǧid n Accur ussan am mammec war dd-usin zeg wass nni di immsebḍa Ifrayim x Yahuda.”
18 “Deg wass nni ad imsar, aqa SIDI ad iṣeffar iẓan i iǧan ɣar ineggura n iɣezran n Miṣra uřa d tzizwa i iǧan di temmurt n Accur. 19 Ad dd-asen uca ad arsen marra di teɣzurin u di tezziyin n řejruf u x marra řḥarrac u x marra iyeřmamen n řwarud.”
20 “Deg wass nni ad awem iřs Sidi inu s ijj n řmuss i d icra x ujemmaḍ n iɣzar n Lfuraṭ, s ufus n ujeǧid n Accur, acuwwaf n uzeǧif d ucuwwaf x iḍaren uřa d tmart.”
21 “Deg wass nni aryaz ad yarebba ict n tɛejmit n ifunasen d tnayen n wuǧi. 22 S tyawant n uɣi i ɣa wcent, ad yecc trussi. Trussi d tamment ad yecc marra wi ɣa iqqimen di temmurt.”
23 “Deg wass nni ad yiři kuř amcam i xef bedden ařef n tzayarin i isekkwan ařef n řewzan n nnuqart, i isennanen d tzeggʷart. ◘7:23 Lawi 26:22; Hgd. 8:11, 12 24 Ad uyuren ɣar din s fřitca d řqews, maɣar marra tammurt ad tiři teccur s isennanen d tzeggʷart. 25 Uřa x marra tisawnin nni carrzen s uřizim, war din dd-ttasen ɛad zi ssibbet n tiggʷudi zeg isennanen d tzeggʷart. Tammurt nni ad tiři ḥima ad arren ɣar dinni ifunasen u ḥima ad xas ɛefsen wuǧi.”
◘7:1 7:1 2 Ij. 16:5; 2 Im. 28:5
◼7:2 7:2 azɣar - niɣ ‘řɣabet’ niɣ ‘tazgant’.
◘7:23 7:23 Lawi 26:22; Hgd. 8:11, 12