1 Inna ayi SIDI: “Ksi tařwiḥt tameqqrant, tarid xas s řeqřem n bnadem ařami zemmaren ad t ɣaren: ‘Zzardet s tazřa, takeccaḍt deɣya!’ ” 2 Řechud imtiqqan iwyeɣ-ten d acehhad i yixef inu: akehhan Uriya d Zakariyya, mmis n Yabraxya. 3 Tuɣa udfeɣ x tnabit u teksi s ddeyset, turuw-dd ijj n uḥenjir. Uca inna ayi SIDI: “Egg as: ‘Mahar-Calal, Xac-Baz!’, ixs ad yini: ‘Zzardet s tazřa, takeccaḍt deɣya!’ 4 Maɣar qbeř ma ad iřmed uḥenjir ad yini: ‘Baba!’, niɣ: ‘Yemma!’, ad kksen agřa n Dimacq d zzardet n Samarya zzat i wudem n ujeǧid n Accur.”

5 Yarni SIDI deg wawař akidi, inna: 6 “Minzi řgens-a isseḥqar aman yarsan ittazzřen n Ciluha, s uya ifarḥ Raṣin d mmis n Ramalyahu. 7 S uya, xzar, Sidi inu ad yarr aman yewɛaren d imeqqranen n iɣzar n Lfuraṭ ad xasen ḥemřen, ixs ad yini ajeǧid n Accur d marra aɛuǧi nnes. Ad igeɛɛed zi marra taryiwin nnes u ad dd-issfiy tiwa n marra timuwwa nnes. 8 Ad yadef ɣar Yahuda, ad tt issɣarq uca ad yarni ad ɣares dd-yazzeř ař dd-as i ɣa yaweḍ ař yiři. Xmi ɣa isswiẓẓeḍ afriwen nnes ad dřen tiru n temmurt nnec! A Ɛimmanu-Il, Arebbi aqa-t akideneɣ.”

9 “Hajam, a kenniw řegnus, maca ɛad ad tᵉttwařebzem! Ejj marra jjwayeh iggʷejen n ddunect ad wcen imezzuɣen nsen: waxxa tḥezzmem ixef nwem, ad tᵉttwařebzem, waxxa tḥezzmem ixef nwem, ad tᵉttwařebzem! 10 Mcawarem, maca amcawar nwem ad ifceř! Inim ijj n wawař, war ittiři, maɣar Arebbi aqa-t akidneɣ, ‘Ɛimmanu-Il’.”

11 Maɣar ammu i d ayi inna SIDI, umi xafi ijhed ufus nnes u iɛřem ayi ḥima war ggureɣ x webrid n řgens-a, inna: 12 “War qqarem ‘Tameɛmuč!’ i marra umi iqqar řgens-a ‘Tameɛmuč!’ War tteggʷedem u war ttnexřiɛem! 13 SIDI n řɛeskarat ad t tessqeddsem, ad zzayes teggʷedem u ad zzayes tennxeřɛem. 14 Netta ad yiři d Zzawect Iqeddsen, d aẓru n unedraf uřa d taṣḍart n uneqraḍ i tnayen n tudrin n Israil, d řfex d tracca i imezdaɣ n Urcalim. ◘8:14 Ica. 28:16; Lk. 2:34; Rum. 9:33; 1 Bṭ. 2:7 15 Aṭṭas jar asen ad nnqarḍen, ad wḍan, ad ttwarẓen, ad dewřen ɣar řfex uca ad nnaɣen.” ◘8:15 Mt. 21:44; Lk. 20:18

16 “Cfen Cchadet, cemmeɛ Ccariɛa jar imeḥḍaren inu!”

17 “Necc ad rajiɣ SIDI, wenni iřeḥḥfen i uɣembub nnes zzat i taddart n Yaɛqub, xas i ɣa tecřeɣ. 18 Xzar, necc d iḥenjiren nni d ayi iwca SIDI, aqa aneɣ neǧa i řeɛřamat d lmuɛjizat di Israil zi ssibbet n SIDI n řɛeskarat nni izeddɣen x wedrar n Ṣihyun.”◘8:18 Ɛbr. 2:13

19 “Mařa nnan awem: ‘Seqsam inni issawařan ak-d imettan d igezzanen, inni ittweswisen u ittwecwicen!’, xenni ini: ‘Ma war dd-yusi i yijj n řgens ad isseqsa Arebbi nnes? Ma iɛeddeř ad sseqsan imettan di ṭṭweɛ n yinni iddaren?’ ”◘8:19 Aɛwd. 18:11

20 “Dewřem ɣar Ccariɛa u ɣar Cchadet! Mařa war uyuren ɛlaḥsab awař-a, war ɣarsen tᵉttiři tfawt n řefjar.”

21 “Ad inneḍ řgens da d diha di temmurt, icḍen u iǧuz, uca mařa iǧuz uca ixeyyeq, ad inɛeř řgens ajeǧid nnes d AREBBI nnes. Ma ad xzaren ɣar ujenna, 22 niɣ ɣar temmurt, aqa da mɣir řeḥṣaret d ṭṭřam, ṭṭřam issaggʷad. Ittwassuffeɣ řgens ɣar tubbarcent.” ◘8:22 Ica. 5:30

23 “Maca war ittɣimi ṭṭřam issaggʷad mani teǧa řeḥṣaret řexxu. Zic yiwi-dd Netta aseḥqar ɣar temmurt n Zabulun u ɣar temmurt n Naftali, ammu i ɣa yawi di řweqt i dd ɣa yasen ccan x webrid n řebḥar, x ujemmaḍ n L’Urdun, ɣar Ljalil n řegnus.” ◘8:23 Mt. 4:15