1 Řexdenni ittwandeh Yasuɛ ɣar řexřa zi Arruḥ Iqeddsen, ḥima ad ittwajarreb zeg ibřis. ◼4:1 ibřis - isem-a wanita ixs ad yini ‘wenni iɛeyyben’. Ibřis netta d cciṭan ameqqran.  ◘4:1 [Mk. 1:12-13; Lk. 4:1-13] — Mk. 1:12; Lk. 4:1. 2 Awarni řami tuɣa iẓumm arebɛin n wussan d arebɛin n ǧyaři, yusa as-dd jjuɛ ɣar uneggar. 3 Yusa-dd ɣares umjarrab, inna as: “Mařa Cek d Mmis n AREBBI, ini i iẓra-ya ad dewřen d aɣrum!” 4 Yarra-dd xas inna: “Aqa tura:

‘Bnadem war iddar s weɣrum waha,

maca zi kuř awař

i dd-ittekken zeg uqemmum n AREBBI.’ ” ◘4:4 Aɛwd. 8:3

5 Řexdenni yiwyi t ibřis ɣar tendint iqeddsen uca issbedd i-t ɣar ṭṭarf n tzeqqa n Zzawect Tameqqrant, 6 inna as: “Mařa Cek d Mmis n AREBBI, iwa, nḍar Ixef nnec ɣar wadday, minzi aqa tura:

‘Ad yumur lmalakat nnes xak,

ad Cek ksint x ifassen nsent,

ḥima aḍar nnec war ineggeḥ ca aẓru.’ ” ◘4:6 Izhd. 91:11, 12.

7 Yasuɛ inna as: “Tura ɛawed:

‘War ttjarrab SIDI, AREBBI nnec!’ ” ◘4:7 Aɛwd. 6:16.

8 Yiwyi t ɛawed ibřis ɣar wedrar yuɛřan aṭṭas, isscen as marra tigeldiwin n ddunect d uɛuǧi nsent, 9 inna as: “Ad ac wceɣ marra man aya, mařa tewḍid ayi ɣar iḍaren, ad ayi tsejded!” 10 Inna as Yasuɛ: “Ruḥ, a cciṭan, minzi tura:

‘SIDI, AREBBI nnec, umi ɣa tsejded

u i Netta weḥḥdes umi ɣa tsexxared.’ ” ◼4:10 cciṭan - aqa-t d cciṭan ameqqran wenni iǧan x marra ccwaṭen.  ◘4:10 Aɛwd. 6:13; 10:20.

11 Řexdenni ijja i-t ibřis, u xzar, lmalakat usint-i-dd, tuɣa sexxarent as.

12 Řami isřa Yasuɛ belli Yuḥanna tuɣa ittwasellem, iruḥ ɣar Ljalil. ◘4:12 [Mk. 1:14-20; Lk. 4:14-15; Lk. 5:1-11; 6:17-19; 16,31; Yḥ. 4:43] — Mk. 1:14; Lk. 4:14; 16:31; Yḥ. 4:43. 13 Ijja Nnaṣira uca yusa-dd ɣar Kafarnaḥum, tenni ɣar ṭṭarf n řebḥar, di temmurt n Zibulun d Naftali uca izdeɣ din 14 ḥima ad ittwakemmeř min ittwannan zeg unabi Icaɛya umi inna:

15 “Tammurt n Zibulun d temmurt n Naftali

deg Webrid n Řebḥar,

ɣar ujemmaḍ n L’Urdun, Ljalil n řegnus. ◘4:15 Ica. 8:23; 9:1.

16 Řgens i iqqimen di taǧest

iẓra Tafawt tameqqrant,

u x yinni izedɣen

di temmurt d tiři n řmewt,

aqa tenqar-dd xasen Tfawt.” ◘4:16 Ica. 9:1

17 Zi ssin ibda Yasuɛ ittbarreḥ, inna: “Tubem minzi Tageldit n ijenwan aqa tudes-dd.” ◘4:17 Mk. 1:15.

18 Řami tuɣa Netta iggur x tma n řebḥar n Ljalil, iẓra tnayen n wawmaten, Cimɛun umi qqaren Buṭrus, isem wanita ixs ad yini ‘D Aẓru’, d Andrawus umas, tuɣa neṭṭaren traccawin di řebḥar minzi nitni d ineymaren n iseřman. ◘4:18 [Mk. 1:16-20; Lk. 5:1-11] — Mk. 1:16. 19 Inna asen Yasuɛ: “Ḍfarem ayi-dd, ad kenniw arreɣ d ineymaren n iwdan.” 20 Ssarsen deɣya tiracciwin nsen, ḍfaren t.

21 Řami yeɛdu ssenni, iẓra tnayen n wawmaten nneɣni, Yaɛqub mmis n Zabdi d umas Yuḥanna, tuɣa aten ak-d babatsen Zabdi deg uɣarrabu, ɛeddřen tiracciwin nsen uca Netta iřaɣa xasen. 22 Deɣya semḥen deg uɣarrabu u di babatsen, ḍfaren t.

23 Tuɣa Yasuɛ ittenneḍ di temmurt n Ljalil marra, isseřmad di temzidawin nsen, ittbarreḥ s Řexbar Aṣebḥan n Tgeldit uca issgenfa kuř řehřac d kuř řeɛyubat i iǧan di řgens. ◘4:23 [Lk. 6:17-19] 24 Iffeɣ řexbar xas di Suriya marra, uca iwyen-dd ɣares marra imehřac inni ɣar iǧa ɛřam kuř řehřac řa d yinni daysen řeḥriq řa d inni daysen ccwaṭen řa d yinni ittbarkikkiḍen uřa d ineɛḍaben, uca issgenfa i-ten. 25 Ḍfaren t-i-dd aṭṭas n řɣaci zi Ljalil, zi Dikapulis, zi Urcalim, zi Yahudiyya u zeg ujemmaḍ n L’Urdun.