1 Ttzawgeɣ akidi teṣbarem cwayt, am yijj n ubuhaři i ssawařeɣ, iwa ḥemřem ayi. 2 Minzi ceṭṭareɣ xawem s ict n cḍaret n AREBBI, minzi xeḍbeɣ kenniw i yijj n Weryaz, maḥend ad kenniw ssqarrbeɣ am yict n teɛzarect tizdig i Lmasiḥ. ◘11:2 Lawi 21:13.

3 Maca ttᵉggʷedeɣ, am mammec iɣwa ufiɣar Ḥawwa s teḥraymect nnes, amenni ɛawed i ɣa ttwaɣwan ixarriṣen nwem zi řeṣfayet n wecḍar i Lmasiḥ. ◘11:3 Amz. 3:4; Yḥ. 8:44. 4 Minzi mařa yusa-dd ḥed ittbarreḥ awem s yijj n Yasuɛ nneɣni x wenni x ttbarrḥeɣ necc, niɣ mařa tqebřem ijj n arruḥ nneɣni wenni war teqbiřem ca, niɣ ijj n řexbar aṣebḥan nneɣni wenni war tᵉṭṭifem ca, ad t teksim deɣya. ◘11:4 Gal. 1:8.

5 Waxxa amenni necc ḥessbeɣ ixef inu war ǧiɣ qell i rrusul nni ‘imɣaren aṭṭas’. 6 Waxxa war zemmareɣ i wawař, maca i tussna zemmareɣ, minzi tuɣa aneɣ jar awem s bṭayṭay zi marra iɣezdisen. ◘11:6 2 Kur. 5:11 7 Niɣ xḍiɣ umi tuɣa sswaḍɛeɣ ixef inu, ḥima kenniw ad ttwassuɛřam, am d awem barrḥeɣ s Řexbar Aṣebḥan s břa? ◘11:7 1 Kur. 9:12.

8 Aqa ‘kecḍeɣ’ tmesmunin nneɣni am xasent ṭṭfeɣ taxřiṣet, ḥima ad sexxareɣ i kenniw. ◘11:8 Řex. 20:33; 2 Kur. 12:13; 1 Ts. 2:9; 2 Ts. 3:8. 9 Uca umi tuɣa ḥḍareɣ akidwem uca tuɣa dayi řexṣeṣ, war bessřeɣ uřa x ḥed zzaywem, maca min d ayi ixeṣṣen, ɛemmaren t wawmaten inni dd yusin zi Makiduniya. Necc ḥḍiɣ ixef inu di marra, maḥend war xawem ttbessřeɣ, uca ammu i ɣa qqimeɣ ḥḍiɣ ixef inu. ◘11:9 Fil. 4:15. 10 Tidett n Lmasiḥ aqa-t dayi, aqa asemɣar-a war d ayi imenneɛ di jjwayeḥ n Axaya. 11 Mayemmi? Ma minzi war kenniw ttexseɣ? AREBBI issen.

12 Maca min tteggeɣ, ad qqimeɣ tteggeɣ t xenni, ḥima ad kkseɣ tizi n yinni yarezzun lfurṣa, maḥend nitni, di min di ssemɣaran, ad banen am neccin. 13 Minzi nitni d rrusul issxarriqen d ixeddamen icemmaten inni itteggen ixef nsen axmi d rrusul n Lmasiḥ. 14 Man aya war kenniw ittejji ad tettbehtem, minzi uřa d cciṭan ittegg ixef nnes axmi netta d lmalak n tfawt. 15 Waxxa ammu war teǧi d ca n řḥajjet, mařa ttarran ɛawed imsexxaren nnes ixef nsen d imsexxaren n tsegda, inni taneggarut nsen ad tiři ɛlaḥsab řexdayem nsen.

16 Qqareɣ i umur nneɣni, uřa d ijjen ad as ittɣiř aqa ayi d abuhaři, maca mařa war iǧi amenni, ḥesbem ayi d abuhaři maḥend xenni ɛawed necc ad ssemɣareɣ cwayt. 17 Min ssawařeɣ, war t qqareɣ zi Siditneɣ, maca ggiɣ t s tubbuheřya maḥend ad ufiɣ zeɛma lfurṣa i usemɣar. 18 Umi din aṭṭas n inni issemɣaran ɛlaḥsab aysum, uřa d necc ggur ad ssemɣareɣ. ◘11:18 2 Kur. 10:13; 12:5, 6. 19 Minzi kenniw tarḍam ad tesřem i ibuhařiyyen waxxa kenniw d imiɣisen i teǧam. 20 Aqa tᵉmmarsem ixef nwem i ḥed i ittarran kenniw d isemɣan, wenni kenniw itteffzen, wenni ittekksen awem min ɣarwem, u wenni xawem issuɛřan ixef nnes d wenni kenniw issmeddarḍaren. 21 Ssawařeɣ axmi ttseḍḥiɣ, axmi neḍɛef zi ssibbet n tiɣit war iǧin: marra min xef zeɛɛmen nitni ad ssemɣaren, necc ɛawed zeɛɛmeɣ ad ssemɣareɣ. ◘11:21 Fil. 3:4.

22 Ma nitni d Iɛibraniyyen? Uřa d necc. Ma nitni d Israiliyyen? Uřa d necc. Ma nitni d zzariɛet n Ibrahim? Uřa d necc. ◘11:22 Řex. 22:3. 23 Ma nitni d imsexxaren n Lmasiḥ, necc ɛad mahu, waxxa necc ssawařeɣ am wenni ittxeřfen: necc ksiɣ tamara mahu, cciɣ tiyyita ktar zzaysen, tuɣa ayi di řeḥbes aṭṭas n imuren ktar zzaysen uca ẓriɣ řmewt aṭṭas n twařawin. ◘11:23 Řex. 9:16; 21:11; 1 Kur. 15:10; 2 Kur. 6:4. 24 Wtin ayi Wudayen xemsa n twařawin s urekkuḍ s arebɛin n tiyyita qell ict, ◘11:24 Aɛwd. 25:3. 25 třata n imuren wtin ayi s weɛmud, ict n twařa ḥejjaren ayi, třata n twařatin yarreẓ zzayi uɣarrabu, ǧiřet d uziř d aqettus tuɣa ayi di řbuɣaz n řebḥar břa tɣarrabut. ◘11:25 Řex. 14:19; 16:22; 27:9, 41. 26 Umi d ayi tuɣa deg webrid aṭṭas n twařawin tuɣa ayi di lxaṭar n iɣezran, di lxaṭar n iceffaren, di lxaṭar n yinni n řgens inu, di lxaṭar n yinni zi řegnus nneɣni, di lxaṭar di tendint, di lxaṭar di řexřa, di lxaṭar x řebḥar, di lxaṭar s wawmaten issxarriqen, 27 di lxaṭar di řxedmet, di tamara, umi dayi tuɣa di ǧyaři břa iḍeṣ aṭṭas n twařawin, di řaẓ d ufadi, deg uẓummi aṭṭas, umi dayi tuɣa di tesmeḍ d tuɛaryent, 28 uca ɛad war ssiwřeɣ ca x waṭṭas n tmesřayin nneɣni, niɣ x řhemm inu n kuř ass x tmesmunin uřa x wemnus nni xafi i marra timesmunin. ◘11:28 Řex. 20:18. 29 Mařa iḍɛef ḥed, ma war ttiřiɣ uřa d necc ḍeɛfeɣ? Mařa ixeyyeq ḥed zi ca n unedref, ma necc war cemmḍeɣ? ◘11:29 1 Kur. 8:13.

30 Mařa ittxeṣṣa ad ittwassemɣar, ad ssemɣareɣ di tuḍɛeft inu. 31 AREBBI, Babas n Siditneɣ Yasuɛ Lmasiḥ - wenni ittwabarken i řebda qaɛ - issen aqa necc war ssxarriqeɣ ca. ◘11:31 Rum. 1:9; 9:1; 2 Kur. 1:23; Gal. 1:20; Fil. 1:8; 1 Ts. 2:5. 32 Řqebṭan n řɛeskar n ujeǧid Aritas di Dimacq tuɣa iḥeṭṭa tandint n Idimacqiyyen, yarezzu ad ayi iṭṭef, ◘11:32 Řex. 9:24. 33 maca ssekken ayi-dd zeg ijj n řkazi, ssehwan ayi-dd zi řḥiḍ deg ijj n uqbub, arewřeɣ zeg ifassen nnes.