1 Maca necc Bulus simant inu ttzawageɣ kenniw s temhint d uwaḍeɛ n Lmasiḥ, necc d wenni iǧan d asexxay xmi ḥḍareɣ, maca xmi ɣa ɣabeɣ aqa ayi s teryast, 2 aqa ttzawageɣ kenniw, xmi ɣarwem dd ɣa yaseɣ, nhřa ma ad ttwaḥṣareɣ maḥend ad mmɛarriɣ - s teryast nni ḥessbeɣ aqa-tt ɣari - ak-d iwdan nni iḥessben aqa neccin neddar di ddnub nneɣ n arrimet. 3 Minzi waxxa neggur deg weysum, war nettmenɣi ca ɛlaḥsab aysum, 4 s minzi řesnaḥ n umenɣi nneɣ war ǧin zeg weysum, maca ccuren s jjehd n AREBBI, u zzayes i ntarra lburjat iɣewwɣen sadu afus nneɣ. ◘10:4 Irm. 1:10; Afa. 6:13-18. 5 Nᵉttreẓẓa ixarriṣen d marra řuɛřa igeɛɛden x tussna n AREBBI, uca ad nḥebbes marra array i ṭṭaɛet n Lmasiḥ. 6 Uca nekkar maḥend ad nwebbex inni war ittᵉṭṭiɛen, xmi ɣa tiři ṭṭaɛet nwem tekmeř.

7 Ma txezzarem ɣar tmesřayin s wudem? Mařa ittiqq ḥed deg ixef nnes belli netta n Lmasiḥ, ittxeṣṣa ad ixarreṣ ɛawed, belli am netta n Lmasiḥ, amenni ɛawed neccin n Lmasiḥ i neǧa. 8 Meɛlik necc mařa ssemɣareɣ s cwayt n ufeyyeḍ ktar di ṣṣulṭa nneɣ tenni d ayi iwca Siditneɣ, ad yiři nehřa ma ad seḍḥiɣ, maɣar Netta iwca aneɣ tt i řebni nwem, war iǧi i wareddeǧ nwem, 9 maca ssbeɛɛdeɣ aya, ḥima war ittɣiř i ca n ijj aqa xseɣ ad kenniw ssiggʷedeɣ s tebrat inu. 10 Minzi aqa din inni iqqaren: “Tibratin nnes qesḥent jehdent, maca zi jjihet n arrimet iheyyef, uca awařen nnes ttwasseḥqaren.” 11 Wenni issawařen ammu ejj i-t ad iɛqeř, aqa, am mammec neǧa neccin deg wawař s tebratin mařa war neḥḍar, ammu i neǧa s tmegga nneɣ xmi ɣa neḥḍar.

12 Minzi war nezɛim ca ad neḥseb niɣ ad nessemqudda ixef nneɣ ak-d ca n yinni issemɣaran ixef nsen, maɣar umi ɛbaren nitni ixef nsen s yixef nsen, aqa nitni war fhimen walu.◘10:12 2 Kur. 3:1; 5:12. 13 Maca neccin war nessemɣari ca barra i řeɛbar n tesɣart nneɣ, maca ɛlaḥsab řeɛbar n tesɣart i d aneɣ iwca AREBBI, ḥima ad ɣarwem dd-naweḍ. ◘10:13 Afa. 4:7. 14 Minzi war iǧi am mammec war ɣarwem dd-niweḍ, minzi nesswiẓẓeḍ ixef nneɣ ɣarwem uca niweḍ-dd ɣarwem s Řexbar Aṣebḥan n Lmasiḥ. 15 Aqa war nessemɣar ca am nekka sennej i řeɛbar n tesɣart nneɣ, mani xedmen nneɣni, maca nessitim, umi imeqqar l’iman nwem, ad nettwawesseɛ aṭṭas zzaywem ɛlaḥsab řeɛbar n tesɣart nneɣ, 16 ḥima ad nbarreḥ s Řexbar Aṣebḥan uřa deg imucan aɣirin xawem, ḥima war nessemɣari ca x řeɛbar n tesɣart n inneɣni, x řeɛbar ař mani iwḍen nitni.

17 Maca wi ixsen ad issemɣar, ejj i-t ad issemɣar di SIDI. ◘10:17 Ica. 65:16; Irm. 9:22-23; 1 Kur. 1:31. 18 S minzi war iǧi wenni iweṣṣan x yixef nnes, maca wenni xas iweṣṣa SIDI, aqa d wenni ittwafen d amqeǧeb. ◘10:18 Awřn. 27:2.