1 Minzi nessen, belli, xmi ɣa tefna taddart nneɣ n temmurt i yeǧan d arrimet, ad ɣarneɣ yiři ijj n řebni n AREBBI i řebda deg ijenwan, ict n taddart war tᵉttwagg ca s ifassen. ◘5:1 2 Kur. 4:7. 2 X man aya i nzehhar u dayneɣ meẓri, ḥima ad narḍ taddart nneɣ tenni iǧan zeg ujenna, ◘5:2 Rum. 8:23. 3 meɛlik qaɛ i ɣa niři nyarḍ, war d aneɣ ttifen d iɛeryanen. ◘5:3 Asa. 3:18; 16:15. 4 Maca min ma ɣa nekk ɛad di taddart-a, ad neqqim nzehhar s ddqeř nnes, minzi war nexs ad tt nejj, maca nexs ad tt nyarḍ, ḥima min ifennan ad ittwaṣard zi Tudart. ◘5:4 Rum. 8:11; 1 Kur. 15:53. 5 Wenni d aneɣ dd-isswejden i man aya d Netta d AREBBI wenni d aneɣ iwcin Arruḥ nnes d řɛarbun. ◘5:5 Rum. 8:16; 2 Kur. 1:22; Afa. 1:13; 4:30.

6 S uyenni nessen u ɣarneɣ ttiqqet, aqa xenni min ɣa nekk nzeddeɣ di arrimet, ad niři neggʷej x Siditneɣ, 7 minzi s l’iman i neggur, war iǧi s min ittbanen.◘5:7 1 Kur. 13:12; 2 Kur. 3:18. 8 S uyenni nettiqqa uca dayneɣ meẓri, maḥend ad nesmeḥ di arrimet ḥima ad niři ak-d Siditneɣ. 9 Nettceṭṭar ḥima ad as arḍan, ma neǧa neggʷej x taddart niɣ di taddart. 10 Minzi marra idneɣ ad neḍhar zzat i řkursi n ccreɛ n Lmasiḥ, ḥima kuř ijjen ad iṭṭef di arrimet nnes ɛlaḥsab min igga s arrimet, tcuni niɣ tuɛeffna. ◘5:10 Izhd. 62:13; Irm. 17:10; 32:19; Mt. 16:27; 25:32; Rum. 2:6; 14:10, 12; 1 Kur. 3:8; Gal. 6:5; Asa. 2:23; 22:12.

11 S uyenni, am nessen aqa ittxeṣṣa ad neggʷed zi Siditneɣ, aqa narezzu ad nesseqneɛ iwdan, maca ɣar AREBBI aqa neccin nettwassen ɣares, uca ssitimeɣ aqa nettwassen ɣarwem ɛawed di tnefsect nwem. ◘5:11 2 Kur. 11:6 12 War nettweṣṣi ca ixef nneɣ twařa nneɣnit, maca ad awem newc lfurṣa i usemɣar dayneɣ zzat i yinni issemɣaran di min ittbanen, war iǧi di min iǧan deg wuř. ◘5:12 2 Kur. 3:1; 10:8. 13 Minzi mařa tuɣa nᵉttexřef, aqa man aya i AREBBI, mařa tuɣa aneɣ s řeɛqeř, aqa man aya i kenniw. 14 Maɣar tayri n Lmasiḥ tɛarren aneɣ maḥend ad nxarreṣ ammu: mařa Ijjen immut deg wemcan n marra, aqa marra mmuten akides. 15 Aqa Netta immut deg wemcan n marra, ḥima inni iddaren, war ddaren ca ɛad i ixef nsen, maca i Wenni immuten d Wenni dd-ittwassnekkaren i nitni. ◘5:15 Rum. 14:7; Gal. 2:20; 1 Ts. 5:10; 1 Bṭ. 4:2.

16 S uya war nessin ca uřa d ijj ɛlaḥsab arrimet. Mařa tuɣa nessen Lmasiḥ di arrimet, řexdenni war ittiři ɛad nessen t ammu řexxu. ◘5:16 Mt. 12:50; Yḥ. 15:14; Gal. 5:6; 6:15; Kul. 3:11. 17 S uyenni mařa ḥed di Lmasiḥ i iǧa, aqa netta ittwaxřeq-dd jdid. Xenni min iǧan d aqdim iɛdu ◘5:17 Ica. 43:18; Asa. 21:5. 18 u marra idweř d jdid s AREBBI, wenni d aneɣ isseṣřeḥ ak-d Yixef nnes s Lmasiḥ uca iwca aneɣ tasexxart n weṣřaḥ. ◘5:18 Kul. 1:20; 1 Yḥ. 2:2; 4:10. 19 Minzi AREBBI tuɣa isseṣřeḥ ddunect ak-d řemɣaret nnes di Lmasiḥ di mani war d asen iḥsib ca ixeṭṭan nsen uca issars dayneɣ awař n weṣřaḥ. ◘5:19 Rum. 3:24, 25; Kul. 1:20.

20 S uya i neǧa d imsekkan n Lmasiḥ, axmi xawem dd-iřaɣa AREBBI zzayneɣ. S uya nettřaɣa neccin deg wemcan n Lmasiḥ: “Ruḥem ad tᵉttwaṣeřḥem ak-d AREBBI!” ◘5:20 2 Kur. 3:6. 21 Maɣar Wenni war issinen ca ddenb, igga i-t d ddenb i kenniw, ḥima ad nedweř d tasegda n AREBBI dayes. ◘5:21 Ica. 53:9, 12; Rum. 8:3; Gal. 3:13; 1 Bṭ. 2:22; 1 Yḥ. 3:5.