1 A imɛizzen inu, war ttiqqem ca di marra arruḥat, maca qeǧbem arruḥat, ma zi AREBBI i iǧan, minzi aṭṭas n inabiyyen issxarriqen aqa ffɣen-dd ɣar ddunect. ◘4:1 Irm. 29:8; Mt. 7:15, 16; 24:4, 5, 24; 1 Kur. 14:29; Afa. 5:6; Kul. 2:18; 2 Bṭ. 2:1; 2 Yḥ. 7. 2 S man aya ad tessnem Arruḥ n AREBBI: marra arruḥ wenni icehhden belli Yasuɛ Lmasiḥ yusa-dd di ddat aqa netta zi AREBBI. 3 Marra arruḥ wenni war icehhden belli Yasuɛ yusa-dd di ddat, war iǧi ca zi AREBBI, maca zi arruḥ n lmasiḥ afalsu wenni i xef tesřam ad dd-yas, aqa netta da řexxu di ddunect. ◼4:3 lmasiḥ afalsu - xzar 1 Yḥ. 2:18, 22; 4:3. Aqa din aṭṭas n iwdan inni iqqaren: ‘Lmasiḥ war iǧi d AREBBI! Netta d anabi!’ Man aya ixs ad yini belli nitni war ssteɛtarifen u war neɛɛmen ca, aqa AREBBI yusa-dd di arrimet n Yasuɛ Lmasiḥ am mammec i d aneɣ isseřmed Wedlis Iqeddsen. S uyenni tteggen nitni am mammec ittegg lmasiḥ afalsu, war cehhden ca aqa Yasuɛ Lmasiḥ yusa-dd di arrimet. S uyenni ḍeffaren t deg ixarriqen nnes, nitni d iḥenjiren n ddejjař.  ◘4:3 2 Ts. 2:7; 1 Yḥ. 2:18, 22. 4 Maca kenniw d tarwa n AREBBI i teǧam, aqa tɣellbem xasen, minzi d Wenni iǧan daywem d ameqqran x wenni iǧan di ddunect. ◘4:4 2 Ij. 6:16; 2 Im. 32:7; Yḥ. 16:33 5 Nitni zi ddunect, s uyenni ssawařen zi ddunect uca ddunect tᵉttesřa asen-dd. 6 Aqa aneɣ zi AREBBI. Wenni issnen AREBBI, ittesřa aneɣ. Wenni war iǧin zi AREBBI war d aneɣ ittesři ca. S man aya i ɣa nessen Arruḥ n Tidett d arruḥ n uweddar. ◘4:6 Yḥ. 8:47; 10:27.

7 A imɛizzen inu, ejj aneɣ ad nexs ayawya, minzi tayri zi AREBBI, u marra wenni ittexsen, d netta ittwaxřeq-dd zi AREBBI uca issen AREBBI. 8 Minzi AREBBI d tayri, u wenni war ittexsen, war issin ca AREBBI. 9 S man aya teḍhar aneɣ-dd tayri n AREBBI, belli AREBBI aqa issekk-dd ayenni n Mmis i ɣares ɣar ddunect, ḥima ad zzayes neddar. ◘4:9 Yḥ. 3:16; Rum. 5:8. 10 Di man aya i teǧa tayri, war iǧi belli neccin nᵉttexs AREBBI, maca belli Netta ittexs aneɣ uca issekk-dd Mmis d aṣřaḥ x ddnub nneɣ. ◘4:10 Rum. 3:24, 25; 2 Kur. 5:19; Kul. 1:19; 1 Yḥ. 2:2.

11 A imɛizzen inu, mařa tuɣa AREBBI ittexs aneɣ ammu, ittxeṣṣa aneɣ ɛawed ad nexs ijj wenneɣni. 12 Uřa d ijjen ma iẓra AREBBI. Maca mařa nᵉttexs ayawya, AREBBI ad dayneɣ iqqim, uca tayri nnes aqa tedweř tekmeř dayneɣ. ◘4:12 Uf. 33:20; Aɛwd. 4:12; Yḥ. 1:18; 1 Tim. 1:17; 6:16; 1 Yḥ. 3:24.

13 Zi man aya nessen belli nettɣima dayes u Netta dayneɣ, minzi Netta iwca aneɣ zi Arruḥ nnes. 14 Aqa neẓra u ncehhed belli Babas issekk-dd Mmis d Amsenjem n ddunect. 15 Marra wenni icehhden belli Yasuɛ d Mmis n AREBBI, AREBBI ad dayes izdeɣ u netta ad izdeɣ di AREBBI. 16 Aqa neccin numen u nessen tayri tenni iǧan ɣar AREBBI i neccin. AREBBI d tayri u wenni i ɣa iqqimen di tayri, ad iqqim di AREBBI.

17 Di man aya tᵉttwakemmeř tayri nnes dayneɣ, ařami ad ɣarneɣ tiři ttiqqet deg wass n lḥisab, minzi am mammec iǧa Netta, ad niři neccin ɛawed di ddunect-a. 18 Di tayri war tᵉttiři tiggʷudi, maca tayri nican tessuffuɣ tiggʷudi, minzi tiggʷudi tᵉttas-dd ak-d unexřiɛ. Wenni itteggʷeden, war ittiři ikmeř di tayri. 19 X uya ad nexs AREBBI, minzi Netta tuɣa ittexs aneɣ d amezwaru. 20 Mařa ca n ijjen iqqar: “Necc ttexseɣ AREBBI!”, am icarreh umas, aqa netta d bu-ixarriqen. Minzi wenni war ittexsen umas wenni ittwařa, xenni mammec ɣa yegg ad ixs AREBBI wenni war ittwiři. ◘4:20 1 Yḥ. 2:4. 21 Aqa tawṣeyyet-a neṭṭef i-tt zzayes, belli kuř ijjen i ittexsen AREBBI, ad ixs uřa d umas. ◘4:21 Lawi 19:18; Mt. 22:39; Yḥ. 13:34; 15:12; Afa. 5:2; 1 Ts. 4:9; 1 Bṭ. 4:8; 1 Yḥ. 3:23.