1 Amɣar, i tmeṭṭut ittwafarzen d tarwa nnes, inni ttexseɣ di tidett, war iǧi necc waha, maca ɛawed qaɛ inni issnen tidett, 2 di ṭṭweɛ n tidett i dayneɣ izeddɣen uca ad kidneɣ tiři i řebda: 3 arḍa d arreḥmet d řehna ad kidneɣ iřin zi AREBBI, Babatneɣ, u zi Siditneɣ Yasuɛ Lmasiḥ, Mmis n Babas, di tidett u di tayri. ◼1:3 kidneɣ - marra irisfusen (řmaxṭuṭat) ɣarsent ‘akidneɣ’, mɣir di Tekstus Reseptus nettaf ‘akidwem’.

4 Aqa farḥeɣ aṭṭas umi ufiɣ jar tarwa nnem ca inni igguren di tidett, am mammec tawṣeyyet nni neksi zi Babatneɣ. 5 Uca řexxu ttᵉttareɣ am, a tameṭṭut, war iǧi axmi d am uriɣ tawṣeyyet n jdid, maca tenni aqa-tt ɣarney zeg umezwaru: ejj aneɣ ad nexs ayawya. ◘1:5 Yḥ. 13:34; 15:12; Efez; 5:2; 1 Ts. 4:9; 1 Bṭ. 4:8; 1 Yḥ. 2:7; 3:23; 4:21. 6 Ta d tayri, aqa ad nuyur ɛlaḥsab tiweṣṣa nnes. Ta d tawṣeyyet am mammec i tesřim zeg umezwaru, aqa ittxeṣṣa ad tuyurem dayes. ◘1:6 Yḥ. 15:10.

7 Minzi aṭṭas n ixeddaɛen udfen ɣar ddunect, inni war icehhden ca i twasit n Yasuɛ Lmasiḥ di ddat. D wa d axeddaɛ d amḍidd n Lmasiḥ. ◘1:7 Mt. 24:5, 24; 2 Bṭ. 2:1; 1 Yḥ. 4:1. 8 Ḥḍam ixef nwem, ḥima war txessarem ca min xef txedmem kenniw, maca ad tawyem řmunet tmun. 9 Marra wenni i ɣa ixḍan uca war iqqim ca di tɣuri n Lmasiḥ, war ɣares bu AREBBI deg yixef nnes. Wenni i ɣa iqqimen di tɣuri nnes, aqa ɣares Babas d Mmis 10 Mařa yusa-dd ɣarwem ca n ijjen uca war dd-yiwi ca taɣuri-ya, xenni war t qebbřem di taddart nwem, war zzayes areḥḥbem. ◘1:10 Rum. 16:17; 2 Tim. 3:5; Tit. 3:10. 11 Minzi wenni xas i ɣa yareḥḥben, ɣares amuni ak-d řexdayem nnes tiɛeffanin.

12 Aqa ɣari aṭṭas i d awem ɣa ariɣ, maca tuɣa war xseɣ ad t ariɣ di tewriqt s ssmex, maca ssitimeɣ ad ɣarwem dd-aseɣ, ḥima ad kiwem ssiwřeɣ zeg uqemmum ɣar uqemmum, ḥima řefraḥet nneɣ ad tiři tekmeř.

13 Tarwa n učmam ittwafarzen, ttseǧamen xam s řehna. Amin.