1 Qbeř i Řɛid n Tɣarṣt n Useɛdu, umi issen Yasuɛ aqa tasaɛɛet nnes tiweḍ-dd belli ad iffeɣ zi ddunect-a ɣar Babas, tuɣa ittexs inni iǧan nnes, inni iǧan di ddunect, uca Netta ittexs i-ten ař aneggaru. ◘13:1 Mt. 26:2; Mk. 14:1; Lk. 22:1.

2 Ɣar umensi, umi iɛarn cciṭan uř n Yahuda, mmis n Cimɛun Isxariyuṭi, maḥend ad t isellem, ◘13:2 Lk. 22:3; Yḥ. 13:2. 3 ikkar-dd Yasuɛ x umensi, minzi tuɣa issen belli Babas iwca as kuřci deg ifassen nnes u belli iffeɣ-dd zi ɣar AREBBI u ɣar AREBBI i ɣa iraḥ, ◘13:3 Mt. 11:27; Yḥ. 3:35; 16;28. 4 uca ikkes arruḍ nnes, iksi ijj n umendiř uca ibyes i-t i Yixef nnes. 5 Ifarreɣ aman di tbanyut uca ibda issirid iḍaren n imeḥḍaren, imesseḥ asen s umendiř i zi tuɣa ibyes.

6 Řami dd-yusa ɣar Cimɛun Buṭrus, inna as Cimɛun: “A Sidi, ma ad tessirded iḍaren inu?” ◘13:6 Mt. 3:14. 7 Yarra-dd Yasuɛ, inna as: “Cek war tefhimed ca řexxu min tteggeɣ, maca ad tfehmed man aya awarni manawenni.” 8 Inna as Cimɛun Buṭrus: “Qaɛ ɛemmarṣ ad tessirded iḍaren inu.” Yarra-dd xas Yasuɛ: “Mařa war d ac ssirdeɣ, war ɣarek tᵉttiři bu tasɣart akidi.” 9 Inna as Cimɛun Buṭrus: “A Sidi, xenni war tessirid iḍaren inu waha, maca uřa d ifassen inu d uzeǧif inu.” 10 Yasuɛ inna as: “Wenni ittwasirden qaɛ di tbanyut, war iḥdij mɣir ad ttwasirden iḍaren nnes waha, minzi ɛad netta d amezdag. Uřa d kenniw tizdigem, maca war iǧi marra.” ◘13:10 Yḥ. 15:3. 11 Yasuɛ tuɣa issen wi t ɣa iɣdaren, s uyenni inna: “Kenniw war teǧim ca marra d imezdag.” ◘13:11 Yḥ. 6:64.

12 Awarni řami issird iḍaren nsen, yarḍ arruḍ nnes ɛawed, xenni iqqim, inna asen: “Ma tfehmem min daywem ggiɣ? 13 Kenniw tᵉttřaɣam ayi ‘Amseřmad nneɣ!’ d ‘Siditneɣ!’, uca tidett i tennam, minzi wa d Necc. ◘13:13 Mt. 23:8, 10; 1 Kur. 8:6; 12:3; Fil. 2:11. 14 Mařa Necc d Sidi nwem d Amseřmad nwem, uca ssirdeɣ iḍaren nwem, mahu ittxeṣṣa uřa i kenniw ad tessirdem iḍaren ijjen i wenneɣni! ◘13:14 Gal. 6:1, 2. 15 Minzi Necc zeɛma wciɣ awem amedya-ya, ḥima, am mammec ggiɣ Necc akidwem, ad teggem kenniw ɛawed ak-d wayawya. ◘13:15 1 Bṭ. 2:21; 1 Yḥ. 2:6. 16 S tidett, s tidett, Necc ad awem iniɣ: War din iǧi umsexxar wenni yuɛřan x sides, uřa d areqqas yuɛřan x wenni i-t-i-dd-issekken. ◘13:16 Mt. 10:24; Lk. 6:40; Yḥ. 15:20. 17 Mařa tessnem timesřayin-a, ad tiřim tᵉttwabarkem mařa teggim zzaysent.

18 War t qqareɣ ca xawem marra, maɣar ssneɣ inni i xḍareɣ, maca ḥima ad ittwakemmeř min yuran deg Wedlis i iqqaren: ‘Wenni i ɣa iccen zeg weɣrum akidi, aqa issgeɛɛed xafi anirz nnes.’ ◘13:18 [Mt. 26:20-25; Mk. 14:17-21; Lk. 22:21-23] — Izhd. 41:10; Mt. 26:23; 1 Yḥ. 2:19. 19 Řexxu ad awem t iniɣ qbeř ma ad imsar, ḥima, x minni i ɣa imsar, ad tamnem belli aqa d Necc. ◘13:19 Yḥ. 14:29; 16:4. 20 S tidett, s tidett, Necc ad awem iniɣ: Wenni i ɣa iqebřen wenni dd ɣa ssekkeɣ, ad ayi iqbeř, u wenni d ayi ɣa iqebřen, ad iqbeř uřa d Wenni d ayi dd-issekken.” ◘13:20 Mt. 10:40; Lk. 10:16. 21 Řami inna Yasuɛ man aya, innehweř Arruḥ nnes aṭṭas, uca iched, inna: “S tidett, s tidett, Necc ad awem iniɣ: Ijjen zzaywem ad dayi iɣder!” ◘13:21 Mt. 26:21; Mk. 14:18; Lk. 22:21; Řex. 1:17; 1 Yḥ. 2:19. 22 Imeḥḍaren xzaren ɣar wayawya, minzi war ssinen di min xef tuɣa issawař. 23 Tuɣa din ijjen zeg imeḥḍaren nnes i tuɣa ittexs Yasuɛ, tuɣa isenned ɣar weḥsin n Yasuɛ. ◘13:23 Yḥ. 20:2; 21:7, 20. 24 Isscen Cimɛun Buṭrus ɣares, ḥima netta ad t isseqsa min iɛna wenni min xef tuɣa issawař ammu. 25 Ameḥḍar nni yarra ixef nnes ittmeyyeř ɣar idmaren n Yasuɛ, inna as: “A Sidi, min iɛna?” 26 Yarra-dd Yasuɛ, inna: “D wenni umi ɣa ssisneɣ ařeqqim n weɣrum, ad as t wceɣ.” Řexdenni issisen ařeqqim n weɣrum, iwca as t-i-dd i Yahuda, mmis n Cimɛun Isxariyuṭi.

27 Awarni iṭṭef uřeqqim n weɣrum, yudef i-t cciṭan. Inna as Yasuɛ: “Min texsed ad t tegged, egg i-t deɣya.” 28 Uřa d ijj zeg inni tuɣa iqqimen ɣar umensi war issin mayemmi Netta i d as inna man aya. 29 Maɣar ittɣiř asen i ca zzaysen, umi Yahuda aqa-t x ssenduq, aqa Yasuɛ yumur i-t ḥima ad iseɣ ca min ḥdajen nitni i Řɛid, niɣ ḥima ad iwc ca i imezřaḍ. ◘13:29 Yḥ. 12:6. 30 Wanita, awarni řami iṭṭef ařeqqim n weɣrum, iffeɣ deɣya. Tuɣa d ǧiřet umi iffeɣ.

31 Inna Yasuɛ: “Aqa řexxu ittwassɛuǧ Mmis n bnadem uca ittwassɛuǧ AREBBI dayes. 32 Mařa AREBBI aqa ittwassɛuǧ dayes, řexdenni AREBBI ad issɛuǧ Ixef nnes dayes, wah, ad t issɛuǧ deɣya. ◘13:32 Yḥ. 12:23; 17:1. 33 A iḥenjiren inu imeẓyanen, Necc aqa ayi akidwem drus n řweqt ɛad. Kenniw ad xafi tarzum, uca am mammec nniɣ i Wudayen: ‘Mani ɣa raḥeɣ Necc, war tzemmarem ad dd-tasem!’, ammu i d awem ɣa iniɣ ɛawed řexxu. ◘13:33 Yḥ. 7:34; 8:21.

34 Tawṣeyyet n jdid i d awem ɣa wceɣ ḥima ad texsem ijjen wenneɣni. Am mammec Necc ttexseɣ kenniw, ittxeṣṣa uřa d kenniw ad texsem ayawya. ◘13:34 Lawi 19:18; Mt. 22:39; Yḥ. 15:12; Afa. 5:2; 1 Ts. 4:9; 1 Bṭ. 4:8; 1 Yḥ. 2:23, 3:23; 4:21. 35 S man aya ad ssnen marra, aqa kenniw d imeḥḍaren inu, mařa din ɣarwem tayri jar awem.” ◘13:35 1 Yḥ. 2:5; 4:20.

36 Cimɛun Buṭrus inna as: “A Siditneɣ, mani ɣa traḥed?” Yarra-dd Yasuɛ, inna as: “Mani ɣa raḥeɣ Necc, war tzemmared řexxu ad ayi teḍfared, maca ɣar uneggaru ad tased.” ◘13:36 [Mt. 26:31-35; Mk. 14:27-31; Lk. 22:31-34] — Yḥ. 21:18; 2 Bṭ. 1:14. 37 Cimɛun Buṭrus inna as: “A Sidi, mayemmi war zemmareɣ ad aseɣ awarni ac řexxu? Necc ad wceɣ tudart inu i Cek.” ◘13:37 Mt. 26:33; Mk. 14:29; Lk. 22:33. 38 Inna as Yasuɛ: “Ma texsed ad tessarsed tudart nnec di ṭṭweɛ inu? S tidett, s tidett, Necc ad ac iniɣ: War isququɛ uyaẓiḍ, qbeř ma ad ayi tenkared třata n twařawin.” ◘13:38 Mt. 26:34; Mk. 14:30; Lk. 22:34.