Adlis Iqeddsen Luka 22

Řɣedran n Yahuda Isxariyuṭi

1 Iqarreb-dd Řɛid n Weɣrum břa Antun umi qqaren Řɛid n Taɣarṣt n Useɛdu. ◘ 2 Tuɣa imeqqranen n ikehhanen d imseřmaden n idlisen arezzun ict n tewwart, ḥima ad t nɣen, maca nitni ggʷeden zeg iwdan. ◘ 3 Xenni yudef cciṭan di Yahuda wenni umi qqaren Isxariyuṭi. Netta tuɣa d ijjen zi tenɛac n imeḥḍaren. ◘ 4 Iruḥ, issiweř ak-d imeqqranen n ikehhanen d imseřmaden n idlisen d imgewwaden n iɛessasen n Zzawect Tameqqrant mammec t i ɣa isellem i nitni. 5 Farḥen uca ttafqen ad as wcen tinɛacin n nnuqart. 6 Netta iwca asen awař uca yarzu ict n tewwart, ḥima ad asen t isellem barra i řɣaci.

Asewjed n Umensi n Useɛdu

7 Yiweḍ-dd wass n Weɣrum břa Antun i di tuɣa ittxeṣṣa ad tᵉttwaɣarṣ i Tɣarṣt n Useɛdu. ◘ 8 Yasuɛ issekk-dd Buṭrus d Yuḥanna, inna asen: “Ruḥem, tesswejdem aneɣ i umensi n Useɛdu ḥima ad necc.” 9 Nnan as: “Mani texsed ad nessewjed?” 10 Inna asen: “Xzar, xmi ɣa tadfem ɣar tendint ad kenniw iřqa ijj n weryaz, yarbu ict n teqbuct n waman. Ḍfarem t! 11 Inim i bab n taddart: ‘Amseřmad nneɣ isseqsa: Mani iǧa wexxam n inewjiwen i di i ɣa cceɣ umensi n Useɛdu ak-d imeḥḍaren inu?’ 12 Netta ad awem isscen ict n tɣurfet tmiriwt sennej, yessu s ipayasen. Swejdem din kuřci!” 13 Nitni ruḥen, ufin marra am mammec tuɣa d asen inna uca sswejden i umensi n Useɛdu.

Amensi n Siditneɣ

14 Umi dd-tiweḍ tsaɛɛet, yusa-dd Yasuɛ, iqqim ɣar ṭṭabřa d tenɛac n rrusul akides. ◘ 15 Inna asen: “Necc tuɣa weḥḥceɣ aṭṭas ad cceɣ amensi-ya n Useɛdu akidwem qbeř i ɣa weddbeɣ. 16 Minzi ad awem iniɣ, aqa war zzayes ttᵉtteɣ ɛad ař ɣa tᵉttwakemmeř di Tgeldit n AREBBI.” 17 Xenni iṭṭef ijj n řkas uca iqada, inna: “Ksim wa, bḍam t jar awem! 18 Minzi Necc ad awem iniɣ, war sesseɣ ca zi řɣiǧet n tzayart ař dd tusa Tgeldit n AREBBI.” 19 Iksi aɣrum, iqada, yarẓa i-t uca iwca asen t, inna: “Ta d Arrimet inu tenni xawem immewcen. Ggem aya i řidaret inu.” ◘ 20 Ammu i inna ɛawed x řkas awarni i umensi: “Řkas-a d Řɛahd n Jdid s Idammen inu inni i xawem i ɣa ittwassizzřen. ◘

21 Maca aqa da, afus n wenni d ayi ɣa iɣdaren aqa-t akidi ɣar ṭṭabřa. ◘ 22 Mmis n bnadem ad iraḥ am mammec xas ittwakkes, maca uct x bnadem nni i t ɣa iɣdaren!” ◘

23 Bdan ttemsseqsan jar asen, man wen zzaysen i ɣa yegg man aya.

24 Tuɣa jar asen ɛawed amcubbec x man wen zzaysen iǧan d ameqqran qaɛ. 25 Xenni inna asen Yasuɛ: “Ijeǧiden n řegnus ṣellṭen xasen, u inni xasen iṣellṭen ttwařaɣan ‘tarwa n rejwad!’ ◼ ◘ 26 Kenniw maca war tteggem ammu, maca ameqqran daywem ad yiři am umaẓuẓ, u amezwar ad yiři am umsexxar. ◘ 27 Minzi man wen iǧan d ameqqran? Ma d wenni iqqimen ɣar ṭṭabřa niɣ d wenni ittsexxaren? Maca Necc di řwesṭ nwem am wenni ittsexxaren. ◘

28 Aqa kenniw d inni akidi iqqimen deg ijarriben inu. 29 Necc ad awem weɛdeɣ ict n Tageldit am mammec i d ayi tt iwaɛd Baba, ◘ 30 ḥima ad teccem ad teswem x ṭṭabřa inu di Tgeldit inu uca ad teqqimem x řekrasi n tgeldit, ad tḥekmem x tenɛac n tqebbař n ayt n Israil.” ◘

Qqimem tcebbarem di l’iman

31 Inna Yasuɛ i Cimɛun: “Cimɛun, Cimɛun, aqa cciṭan tuɣa yarezzu ad kenniw izzuzar am yirden. ◘ 32 Maca Necc ẓuǧeɣ xak ḥima war ifenni l’iman nnec. Uřa d cek, tub di řweqt ittwaggen, stebbet aytmac.” 33 Inna as Cimɛun: “A Sidi, necc aqa wejdeɣ ḥima ad kik raḥeɣ uřa ɣar řeḥbes d řmewt.” 34 Maca Yasuɛ inna as: “Necc ad ac iniɣ, a Cimɛun, war issququɛ uyaẓiḍ ass-a qbeř ma ad ayi tenkared třata n twařawin belli aqa tessned ayi.” ◘

35 Inna asen: “Řami kenniw ssekkeɣ břa tacyart, břa ttesṭim niɣ sandaliyat, ma tuɣa ittxeṣṣa awem ca?” Nnan as: “Walu!” ◘ 36 Xas uca inna asen: “Maca řexxu wenni ɣar iǧa tecyart, ad tt iksi, ammu uřa d ttesṭim, uca wenni war ɣar iǧi ssif, ad izzenz arruḍ nnes uca ad zzayes iseɣ ssif i yixef nnes. 37 Minzi Necc ad awem iniɣ, aqa ittxeṣṣa ad ttwakemmřent tira-ya dayi: ‘Aqa ittwaḥseb ak-d inni war iseggden!’, minzi marra min xafi yuran, ad ittwakemmeř.” ◘ 38 Nnan asen: “A Siditneɣ, aqa da tnayen n řesyuf!” Inna asen: “Ikfa!”

Taẓaǧit n Yasuɛ x wedrar n Taddart n Zzitun

39 Iffeɣ, iruḥ ɣar wedrar ‘Taddart n Zzitun’ am mammec tuɣa innum, uca ḍfaren t ɛawed imeḥḍaren nnes. ◘ 40 Umi ixecc ɣar wemcan nni, inna asen: “Ẓaǧem ḥima war dd-tᵉttidfem deg ujarreb.” 41 Ifekk Ixef nnes zzaysen ɛřaḥař ticti n ijj n uḥejjar n weẓru, yuḍar x ifadden nnes, iẓẓuǧ, 42 inna: “A Baba, mařa texsed, ejj řkas-a ad xafi iɛdu. Maca war ittiři min xseɣ Necc maca min texsed Cek.” ◘ 43 Xenni iḍhar as-dd ijj n lmalak zeg ujenna, iwca as jjehd. 44 Tuɣa Netta iggwed aṭṭas, ittẓaǧa aṭṭas uca tidi nnes tuɣa tᵉttegg am tneqqiḍin n idammen weṭṭant ɣar temmurt. ◘ 45 Xenni ikkar zi tẓaǧit, yusa-dd ɣar imeḥḍaren nnes uca yufa i-ten ṭṭṣen s wecḍan. 46 Inna asen: “Mayemmi tᵉṭṭṣem? Kkarem, teẓẓaǧem ḥima war tᵉttidfem deg ujarreb.”

Uḍuf n Yasuɛ

47 Am tuɣa ɛad issawař, xzar, aqa yusa-dd ijj n řɣaci ak-d wenni i d as qqaren Yahuda, wenni d ijjen zi tenɛac, uca netta tuɣa izwar asen, iqarreb-dd ɣar Yasuɛ, issudem i-t, maɣar aqa iwca asen ijj n wescan: “Wenni i ɣa ssudmeɣ, d wenni Netta!” ◘ 48 Inna as Yasuɛ: “A Yahuda, ma s usudem ad teɣdared Mmis n bnadem?” 49 Umi ẓrin inni d as dd-innḍen min imsaren, nnan as: “A Siditneɣ, ma ad t newwet s řesyuf?” 50 Ijjen zzaysen tuɣa iwta amsexxar n arrays n ikehhanen, iqess as amezzuɣ afusi. ◘ 51 Iṭṭef Yasuɛ deg wawař, inna: “Ṣafi, baraka!” Xenni iḥada as amezzuɣ uca issgenfa i-t.

52 Inna Yasuɛ i imeqqranen n ikehhanen d imɣaren n řgens d imgewwaden n iɛessasen n Zzawect Tameqqrant, inni tuɣa ɣares dd-yusin: “Ma teffɣem-dd ɣari axmi dd-teffɣem ɣar ijj n uxewwan, s řesyuf d iɛumad, maḥend ad ayi tᵉttfem? ◘ 53 Ass x wass tuɣa ayi akidwem di Zzawect Tameqqrant, kenniw war ɣari tesswiẓẓḍem s ifassen, maca ta d tasaɛɛet nwem d ṣṣulṭa n taǧest.”

Ankar n Buṭrus

54 Ṭṭfen t, nedhen t uca ssidfen t di taddart n arrays n ikehhanen. Uca iḍfar i-t Cimɛun zi řaggʷaj. ◘ 55 Nitni ssarɣen timessi di řwesṭ n řemraḥ, xenni qqimen deg wenneḍ nnes. Uca Cimɛun iqqim jar asen. ◘ 56 Teẓra i-t ict n tayya am iqqim ɣar tmessi uca texzar dayes mliḥ, tenna: “Uřa d wa tuɣa-t akides.” 57 Maca netta inkar t, inna: “A tamɣart, necc war t ssineɣ!” 58 War din min iɛdun iẓra i-t wenneɣni, inna: “Uřa d cek d ijjen zzaysen.” Maca Buṭrus inna: “War iǧi bu d necc!” 59 Umi teɛdu ɛřaḥař ict n tsaɛɛet, ibda wenneɣni ad iqaceḥ, inna: “S tidett, uřa d wa tuɣa-t akides, minzi uřa d netta d Ajalili.” 60 Inna Buṭrus: “A bnadem, necc war ssineɣ min xef tessawařed!” Řexdenni, am tuɣa ɛad issawař, issquqeɛ uyaẓiḍ. 61 Inneqřeb Yasuɛ uca ixzar ɣar Buṭrus. Uca iɛqeř Cimɛun x wawař i d as inna Siditneɣ: “Qbeř i ɣa issquqeɛ uyaẓiḍ, ad ayi tenkared třata n twařawin!” ◘ 62 Uca iffeɣ-dd Cimɛun barra, iru imeṭṭawen imerzagen.

Aseḥqar n Yasuɛ

63 Iryazen nni iṭṭfen Yasuɛ, tuɣa sthezzan zzayes, ◘ 64 dřin tiṭṭawin nnes, xenni wtin t ɣar uɣembub, nnan: “Nabb, man wen i Cek iwtin?” 65 S waṭṭas n tmesřayin nneɣni tuɣa ttceqqafen dayes, ssawařen ḍidd nnes.

Yasuɛ zzat i Jmaɛet Tameqqrant n Wudayen

66 Umi dd-yiweḍ uziř, munen imɣaren n řgens d imeqqranen n ikehhanen d imseřmaden n idlisen uca nedhen t ɣar wexxam n Jmaɛet nsen. ◘ 67 Nnan as: “Mařa Cek d Lmasiḥ, xenni ini aneɣ t.” Inna asen: “Mařa nniɣ awem t, war dayi tᵉttimnem, 68 u mařa sseqsiɣ kenniw, war xafi dd-tarrim niɣ war d ayi tarexxum. 69 Zi řexxu d tsawent ad iqqim Mmis n bnadem x ufus afusi n jjehd n AREBBI.” ◘ 70 Nnan marra: “Ma Cek d Mmis n AREBBI?” Inna asen: “Kenniw s yixef nwem teqqarem, aqa d Necc!” 71 Nnan: “Umi neḥdaj ɛad řechud? Minzi aqa neccin s yixef nneɣ nesřa t zeg uqemmum nnes.”